Mga Buhat sa Pagluwas ni Jehova Karon

GINASUGID kini sa Bibliya bahin kang Jehova: “Daghan ang mga katalagman sa matarong, apan si Jehova magaluwas kaniya gikan kanilang tanan” ug, “Si Jehova mahibalo kon unsaon pagluwas sa mga tawong diyosnon gikan sa pagsulay.”​—Salmo 34:19; 2 Pedro 2:9.

Sa unsang paagi motabang si Jehova sa iyang katawhan sa dihang anaa sila sa kasakitan? Dili pinaagi sa milagrosong pagbali sa mga gahom sa kinaiyahan o pinaagi sa laing labaw-tawhanong buhat, sama sa gihunahuna sa daghang tawo nga angay niyang pagabuhaton, apan pinaagi sa laing gahom nga dili gayod hisabtan sa kinabag-ang tawo​—ang gugma. Oo, si Jehova nahigugma sa iyang katawhan, ug siya nag-ugmad sa ilang taliwala sa gugma alang sa usag usa nga kusganon kaayo nga maarangan niya ang pagbuhat alang kanila sa butang nga maorag halos milagroso.​—1 Juan 4:10-12, 21.

Mahimong mangatarongan ang pipila nga sa panahon sa emerhensiya, ang gikinahanglan mao ang pagkaon, medisina, ug kasangkapan​—dili ang gugma. Siyempre, hinungdanon ang pagkaon, medisina, ug kasangkapan. Bisan pa, si apostol Pablo nangatarongan niining paagiha: “Kon ako may bug-os nga pagtuo nga arang ko mabalhin ang mga bukid, apan ako walay gugma, ako walay kapuslanan. Ug kon ipanghatag ko ang tanan kong kabtangan sa pagpakaon sa uban, ug kon itugyan ko ang akong lawas, aron ako makapasigarbo, apan ako walay gugma, dili kini magapulos kanako.”​—1 Corinto 13:2, 3.

Sagad nga atong mabasahan nga ang pagkaon ug mga suplay nga hinabang nagpondo sa mga pantalan nga nagakadunot o gikaon sa mga ilaga samtang ang mga tawo nga nagkinahanglan nangamatay gumikan sa sakit ug gutom. O daotan pa, ang maong hinabang nga pagkaon ug suplay mahulog sa mga kamot sa dalo ug way-konsensiyang mga tawo nga magapanapi niana. Busa, ang pagtagana sa suplay maoy usa ka butang, apan ang pagtino nga ang mga naglisod makapahimulos niana maoy laing butang. Ang tinuod nga gugma ug kamahunahunaon maoy makahatag ug kalainan.

Gugma nga Gipadapat

Niadtong Septiyembre 1, 1992, ang Urakan Iniki mihapak sa Hawaiianong isla sa Kauai, populasyon 55,000. Kay ang urakan may hangin nga 210 kilometros matag oras ug huros nga 260 kilometros matag oras, kadto nakapatayg 2 ka tawo ug nakasamad ug 98, miguba sa 75 porsiento sa kabalayan, nagbilin sa 8,000 ka tawong walay puy-anan, ug nagpahinabog kalkuladong $1 bilyong bili sa kagun-oban. Nahilakip sa mga nagpuyo niining gamayng isla mao ang mga 800 ka Saksi ni Jehova sa unom ka kongregasyon. Unsay nahitabo kanila?

Sa wala pa mohapak si Iniki, ang mga ansiano sa kongregasyon, ubos sa pagdumala sa nagapanawng magtatan-aw, mikontak na sa tanang membro sa mga kongregasyon sa pagtino nga sila luwas ug layo sa kapeligrohan, nga andam na alang sa pag-atake. Kanang mahigugmaong pagtagad mao ang hinungdan nga ang grabeng kadaot o pagkamatay nalikayan taliwala sa mga Saksi.​—Itandi ang Isaias 32:1, 2.

Bisan tuod ang komunikasyon ug transportasyon grabeng nadaot, tulo ka hawas sa sangang-buhatan sa Watch Tower Bible and Tract Society sa Honolulu nahilakip sa unang nangabot sa dapit human sa urakan, kay gihatagag espesyal nga permiso sa depensa sibil sa paglupad ngadto sa Kauai. Dihadiha, ilang gikontak ang lokal nga mga Saksi ug, sa pagkabuntag, ang usa ka miting giorganisar aron sa pagplano sa paagi sa hinabang. Gitukod ang usa ka komite sa hinabang aron banabanaon ang mga panginahanglan ug mabatonan ang gikinahanglang materyales pinaagi sa sangang buhatan sa Honolulu. Sa walay hunong, ilang gidumala ang trabaho sa paghatod sa mga suplay ngadto sa mga nanginahanglan ug paglimpiyo ug pag-ayo sa mga balay nga naguba.

Ang mga Saksi sa ubang kaislahan mitabang dayon sa ilang mga igsoon nga nanginahanglan. Sa dihang ang tugpahanan sa Kauai nabuksan, 70 ka Saksi ang misakayg ayroplano aron sa pagtabang. Ang mga suplay sa hinabang nga mikostar ug $100,000, lakip ang mga generetor, mga kusinilya, mga parol, ug pagkaon, gipadala sa barko. Usa sa mga Kingdom Hall sa isla ang gigamit nga pondohanan; hinuon, dihay kahadlok nga basin lungkabon kadto. Unya ang pila ka trak sa Army misulod sa parkingan sa Kingdom Hall, ug ang mga drayber mihangyo nga iparking nila ang ilang mga trak didto. Ang mga sundalo nga gipabantay sa mga trak nagsulbad usab sa suliran sa panglungkab sa mga suplay sa hinabang.

Ang mga igsoon nagdala sa mga generetor sa balay-balay, nga nagpaandar niana sa matag balay sulod sa duha o tulo ka oras aron matabangan ang mga tawo nga mausar ang ilang mga freezer. Ang mga grupo sa mga igsoon gipadala ngadto sa lainlaing mga balay aron sa pagtabang sa paglimpiyo ug pag-ayo sa naguba. Sa dihang nagtrabaho sila sa balay sa usa ka igsoong babaye kansang bana sa nangagi labihan ka supak, ang bana natandog pag-ayo nga ang iya lang nahimo mao ang pagtan-aw ug paghilak. Usa ka bisita nga gikan sa dakong-yuta nga nakakita sa laing grupo sa mga Saksi nga nagtrabaho nakadayeg kaayo sa ilang pamatasan ug organisasyon nga siya miduol kanila ug nangutana kon unsay nakapalahi kaayo kanila. Sa dihang ang usa ka igsoong lalaki misaysay nga tungod kadto sa ilang gugma sa Diyos ug sa ilang isigka-Kristohanon, ang lalaki mitubag: “Unsaon ko man pagkaila sa Diyos?” (Mateo 22:37-40) Dayon midugang siya: “Kamo organisado kaayo nga lagmit may naghulat na kanako sa akong balay inigpauli ko sa Florida!”

Sa katibuk-an, ang mga Saksi ni Jehova mitabang sa paglimpiyo ug pag-ayo sa 295 ka balay sa Kauai. Niini kanila, 207 nagkinahanglag ginagmayng mga alayohon, apan 54 grabeng naguba, ug 19 bug-os nalumpag. Ang ilang buluhaton naglakip usab sa pagduaw sa matag nailhang Saksi sa isla sa pagtino nga naatiman ang matag usa. Sa dihang gihatod ang suplay ngadto sa usa ka igsoong babaye, usa ka Budhistang silingan miingon nga wala gani siya makadawat bisag usa ka puyo sa tsa gikan sa iyang grupo. Ang laing babaye, kansang balay gilimpiyohan sa usa ka grupo sa Saksi, miingon: “Sa dugay nang panahon kamo nag-anhaan sa akong pultahan, ug giisip ko kamong maayong mga silingan, apan kining pahayag sa sinilingang gugma nagpakita kanako kon unsa ang inyong organisasyon. Salamat sa tanan ninyong kahago.”

Gawas sa pag-atiman sa materyal nga mga panginahanglan sa tanan nilang isigka-Kristohanon, kadtong nagdumala sa panghinabang samang nabalaka sa ilang espirituwal nga kaayohan. Walay duha ka adlaw human sa urakan, ang ubay-ubayng kongregasyon naghimo na sa ilang mga tigom. Sa madali, ang gagmayng mga grupo sa pagtuon sa basahon nahibalik sa paglihok. Napulo ka ansiano gikan sa ubang kaislahan nangabot sa Kauai sa pagtabang sa lokal nga mga ansiano aron mahimo ang mga pagduaw isip magtatan-aw sa matag Saksi sa isla. Sa pagkasunod Dominggo, ang tanang unom ka kongregasyon may Pagtuon sa Bantayanang Torre, 30-minutos nga pakigpulong bahin sa mga paagi sa hinabang sa usa ka membro sa Komite sa Panghinabang, ug panapos nga 30-minutos nga pakigpulong sa usa ka membro sa Komite sa Sanga nga miabot gikan sa Honolulu alang sa maong katuyoan. Ang taho sa usa nga nakasaksi nag-ingon: “Ang tanan nahupay sa maayong pagdumala nga gihatag ug mibating andam sa pagsugakod sa nahibilin nilang mga suliran. Daghan sa mamiminaw ang nanghilak pagkatapos sa programa, ug ang pakpak tiunay.”

Tibuok-Kalibotang Pag-igsoonay

Ang ingon nga gugma ug pagkamahunahunaon maoy timaan sa katawhan ni Jehova sa tibuok kalibotan. Sa dihang ang Bagyong Val milampornas sa tibuok Western Samoa mga usa ka tuig nga miagi, nakapahinabo kadto ug dakong kadaot, apan ang mga Saksi ni Jehova sa ubang mga bahin sa kalibotan mitabang dayon sa ilang mga igsoon didto. Sa ulahi, sa dihang ang gobyerno mihatag ug salapi sa tanang relihiyon​—lakip ang mga Saksi ni Jehova​—aron ayohon ang ilang palibot, gibalik sa mga Saksi ang salapi uban sa sulat nga nag-ingon nga ang tanan nilang guba naayo na, ug ang salapi magamit pa sa pag-ayo sa pila ka tinukod sa gobyerno. Ang ilang aksiyon gitaho sa usa ka lokal nga mantalaan. Sa pagmatikod niadto, usa ka opisyal sa gobyerno miingon sa usa ka Saksi nga naulaw siya bahin sa iyang simbahan mismo kay ilang gidawat ang salapi gikan sa gobyerno bisan pag ang ilang tanang tinukod nga naguba panahon sa bagyo may insyurans.

Sa susama, sa Septiyembre 1992, sa dihang ang Subang Ouvèze sa habagatan-sidlakang Pransiya nagbaha ug nagdaot sa Vaison-la-Romaine ug sa 15 ka komunidad sa palibot, misanong dayon ang mga Saksi. Sa tibuok gabii, ang baha nagkalas sa 40 ka kinabuhi, nagguba sa 400 ka balay, nagdaot sa ginatos pa nga uban, ug nagbilin sa linibong pamilya nga walay tubig o koryente. Sa pagkabuntag, ang mga Saksi gikan sa lokal nga mga kongregasyon mao ang unang mitabang sa mga biktima sa baha. Kadtong nagkinahanglan ug puy-anan sa kamahigugmaon gipapuyo sa Saksing mga pamilya sa rehiyon. Ginatos ka Saksi gikan sa layo ug duol mitanyag sa pagtabang. Natukod ang usa ka komite sa hinabang sa duol nga siyudad sa Orange aron mapatakdo ang mga singkamot sa upat ka pundok sa mga boluntaryo, kinsa nagtangtang sa lapok ug naglimpiyo sa mga balay, naglaba sa daghan kaayong sinina nga nalumok sa lapok, ug nagluto ug naghatag sa pagkaon ug tubig ilimnon sa tibuok apektadong mga dapit. Miboluntaryo pa sila sa paglimpiyo sa lokal nga eskuylahan ug sa ubay-ubayng munisipyo. Ang ilang makugihong paghago gipabilhan sa ilang mga igsoon ug sa katawhan sa komunidad.

Sa daghang ubang dapit, ang mga Saksi ni Jehova nag-antos sa mga katalagman, sama sa mga baha, mga bagyo, ug mga linog, sama ra kang bisan kinsa. Kay nakasabot nga kini ang sangpotanan sa dili-masayran-daan o dili-masanta nga mga kahimtang, sila dili mobasol sa Diyos o kang bisan kinsa. (Ecclesiastes 9:11) Hinunoa, sila masaligon nga ang nagsakripisyo-sa-kaugalingong gugma sa ilang isigka-magtutuo motabang kanila bisan unsang kaalaotan ang tingali modangat kanila. Ang maong mahigugmaong mga buhat mao ang sangpotanan sa pagtuo nga gihuptan nilang tanan. Ang disipulong si Santiago misaysay: “Kon ang usa ka igsoong lalaki o babaye maoy hubo ug kulang sa pagkaon nga igo alang sa adlaw, apan usa kaninyo magaingon kanila: ‘Panglakaw kamo sa kalinaw, painiti ug busga ang inyong kaugalingon,’ apan dili kamo mohatag kanila sa mga kinahanglanon alang sa ilang lawas, unsay kapuslanan niana? Sa ingon, usab, ang pagtuo, kon walay mga binuhatan, patay sa kaugalingon.”​—Santiago 2:15-17.

Ang Tinubdan sa Matuod nga Panalipod

Inay sa pagdahom ug mga milagro sa dagway sa usa ka matang sa balaang pagsalga, ang mga Saksi ni Jehova nakaamgo nga ang panalipod hikaplagan diha sa ilang tibuok-kalibotan nga Kristohanong pag-igsoonay. Sa pagkamatuod, ang maarangan sa pagbuhat sa maong pag-igsoonay panahon sa kasakitan halos milagroso. Sila nahinumdom sa mga pulong ni Jesus nga makita sa Mateo 17:20: “Kon may pagtuo kamo nga ingon sa lugas sa mustasa, kamo magaingon niining bukira, ‘Bumalhin ka gikan dinhi ngadto didto,’ ug kini mobalhin, ug walay butang nga dili mahimo alang kaninyo.” Oo, ang samag-bukid nga kababagan mahanaw sa dihang ang tinuod Kristohanong pagtuo, inubanan sa gugma, molihok.

Ang katawhan ni Jehova sa tibuok kalibotan mobati sa mapanalipdanong kamot sa ilang Diyos niining mabalhinon ug makuyawng mga panahon. Sila mibati sama sa salmista: “Sa pakigdait mohigda ug matulog ako, kay ikaw lamang, Oh Jehova, ang nagapapuyo kanako sa kasegurohan.” (Salmo 4:8) Sa pagkamasaligon, itumong nila ang ilang pagtagad sa buluhaton nga anaa: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:14) Ug sa pagkasegurado sila molantaw sa unahan sa katumanan sa saad ni Jehova nga malinawon, matarong nga bag-ong kalibotan, diin dili na sila makaagom sa bisan unsang matang sa mga katalagman, nga ginama-sa-tawo o kinaiyanhon.​—Miqueas 4:4.

[Mga hulagway sa panid 12]

Ang mga Saksi nangabot gikan sa layo ug duol sa pagtabang sa mga biktima sa baha