Mga Panig-ingnan sa Pagkamapaubsanon nga Pagaawaton
“Ang imong kaugalingong pagkamapaubsanon magapadako kanako.”—SALMO 18:35.
1. Unsang ebidensiya sa pagkamapaubsanon ang makita sa kanhi presidente sa Watch Tower Society?
SI Joseph F. Rutherford barogan, kay ang kataas maoy kapig unom ka piye ug ang timbang kapig 90 kilos. Siya usab may kusog nga tingog, nga gigamit niya dili lang sa pagpaila sa ngalan ni Jehova sa paaging wala pa ikapaila sukad masukad apan sa pagyagyag usab sa pagkamabudhion sa relihiyosong mga pangulo sa Kakristiyanohan, nga nagtawag sa ilang relihiyon nga “usa ka bitik ug pangilad.” Bisan pag ang iyang mga pakigpulong maoy kusganon, sa dihang nag-ampo siya kauban sa pamilyang Bethel sa hedkuwarter, siya nahisama sa batang gamay nga paminawon nga nakigsulti sa iyang amahan, sa ingon naghatag ug ebidensiya sa iyang suod nga relasyon uban sa iyang Magbubuhat ug sa iyang pagkamapaubsanon. Oo, siya mapaubsanon sama sa usa ka gamayng bata.—Mateo 18:3, 4.
2. Sa unsang linaing bahin nga ang mga alagad ni Jehova lahi kaayo sa mga tawo sa kalibotan?
2 Walay duhaduha, ang tanang matuod nga mga alagad ni Jehova nga Diyos mapaubsanon. Niining bahina sila lahi kaayo sa katawhan sa kalibotan. Karong adlawa, labaw pa kay sukad masukad, kini napunog mga tawong garboso. Ang mga tawong tag-as ug katungdanan ug gamhanan, ang dato ug ang edukado, ug bisan ang daghang kabos ug kadtong alaot sa ubang mga paagi maoy magarbohon.
3. Unsay ikaingon mahitungod sa mga bunga sa garbo?
3 Ang garbo mohinabog daghan kaayong panag-away ug kaalaotan. Sa pagkamatuod, ang tanang kaalaotan sa uniberso nagsugod kay usa ka manulonda nahimong garboso, kay gusto nga pagasimbahon siya sa paagi nga sa linain maoy angay lang sa Maglalalang, si Jehova nga Diyos. (Mateo 4:9, 10) Dugang pa, kana siya, kinsa nagbuhat sa iyang kaugalingon nga Yawa ug Satanas, milampos sa pagtental sa unang babaye, si Eva, pinaagi sa pagtandog sa iyang garbo. Siya misaad kaniya nga kon siya mokaon sa gidiling bunga, mahisama siya sa Diyos mismo, nga nasayod sa maayo ug daotan. Kon mapaubsanon pa siya, nakaingon unta siya, ‘Ngano mang buot kong mahisama sa Diyos?’ (Genesis 3:4, 5) Kon palandongon nato ang alaot nga kahimtang nga nahiagoman sa katawhan, sa lawasnon, mental, ug moral nga paagi, dili gayod makataronganon ang garbo sa bahin sa mga tawo! Dili katingad-an nga mabasa natong gidumtan ni Jehova ang “pagbayaw-sa-kaugalingon ug garbo”! (Proverbio 8:13) Lahi kaayo sa tanang garboso ang mga panig-ingnan sa pagkamapaubsanon nga makaplagan sa Pulong sa Diyos, ang Bibliya.
Si Jehova nga Diyos Maoy Mapaubsanon
4. Unsang mga kasulatan ang nagpakita nga si Jehova mapaubsanon?
4 Si Jehova nga Diyos—ang Labing Hataas, ang Soberano sa Uniberso, ang Hari sa kahangtoran—maoy mapaubsanon. (Genesis 14:22) Matuod ba kana? Oo, tinuod gayod! Si Haring David miingon, segon sa natala sa Salmo 18:35: “Ikaw magahatag kanako sa taming sa imong kaluwasan, ug ang imong tuong kamot mismo magasapnay kanako, ug ang imong kaugalingong pagkamapaubsanon magapadako kanako.” Tin-aw, gipasidungog ni Haring David sa pagkamapaubsanon ni Jehova ang paghimo kaniya, si David, nga dako. Unya usab, mabasa nato sa Salmo 113:6 nga si Jehova “nagapaubos aron pagtan-aw sa langit ug sa yuta.” Ang ubang hubad mabasa, “nagaduko aron pagtan-aw,” (New International Version) “nagpahiangay aron pagtan-aw sa ubos kaayo.”—The New English Bible.
5. Unsang mga hitabo ang nagpamatuod sa pagkamapaubsanon ni Jehova?
5 Si Jehova nga Diyos tinong nagpaubos sa paagi nga siya nakiglabot kang Abraham, nga gitugotan si Abraham nga magduhaduha sa pagkamatarong sa Iyang katuyoan sa paglaglag sa daotang mga siyudad sa Sodoma ug Gomora.a (Genesis 18:23-32) Ug sa gipahayag ni Jehova ang iyang tinguha nga laglagon ang nasod sa Israel—sa usa ka panahon tungod sa pagsimbag diyosdiyos, sa laing panahon tungod sa rebelyon—si Moises sa matag higayon nangatarongan kang Jehova nga samag siya nakigsulti lamang sa laing tawo. Sa matag panahon si Jehova mauyonong mitubag. Ang Iyang pagtugot sa mga hangyo ni Moises bahin sa Iyang katawhang Israel nagpakita sa pagkamapaubsanon. (Exodo 32:9-14; Numeros 14:11-20) Ang ubang panig-ingnan sa mapaubsanong pakiglabot ni Jehova sa mga tawo sa tawo-por-tawo nga paagi, ingnon ta, makita sa iyang mga pakiglabot kang Gideon ug Jonas, sumala sa natala sa Maghuhukom 6:36-40 ug Jonas 4:9-11.
6. Unsang kinaiya ni Jehova ang dugang nagpadayag sa iyang pagkamapaubsanon?
6 Sa pagkamatuod, labing menos siyam ka beses, si Jehova giingon nga “mahinay sa kasuko.”b Ang pagkahataas ug pailob, pagkahinay sa kasuko, ni Jehova, sa pagpakiglabot sa di-hingpit nga mga tawo sa tanang milenyo maoy dugang pamatuod sa iyang pagkamapaubsanon. Ang garbosong mga tawo dili mapailobon, daling mopahayag sa kapungot, nga lahi kaayo sa hataas-nga-pailob. Ang pagkamapaubsanon ni Jehova nagahimong kataw-anan sa garbo sa di-hingpit nga mga tawo! Sanglit gisugo kita nga ‘mahimong mga tig-awat sa Diyos ingong minahal nga mga anak,’ kinahanglang magmapaubsanon kita ingon nga siya mapaubsanon.—Efeso 5:1.
Panig-ingnan ni Kristo sa Pagkamapaubsanon
7, 8. Unsay giingon sa Kasulatan mahitungod sa pagkamapaubsanon ni Jesu-Kristo?
7 Ang ikaduhang labing talagsaong panig-ingnan sa pagkamapaubsanon nga pagaawaton nato mao ang gihisgotan sa 1 Pedro 2:21: “Sa pagkamatuod, alang niining dalana kamo gitawag, tungod kay bisan si Kristo nag-antos alang kaninyo, nga nagbilin kaninyo ug sumbanan aron pagasundon ninyo pag-ayo ang iyang mga lakang.” Dugay na sa wala pa siya moanhi sa yuta ingong tawo, gitagna mahitungod kaniya sa Zacarias 9:9: “Singgit nga madaogon, Oh anak nga babaye sa Jerusalem. Tan-awa! Ang inyong hari mismo moanha kanimo. Siya matarong, oo, linuwas; mapaubsanon, ug nagasakay sa usa ka asno.” Kon si Jesu-Kristo garboso pa, dawaton unta niya ang tanyag sa Yawa nga mao ang tanang gingharian sa kalibotan baylo sa usa ka buhat sa pagsimba. (Mateo 4:9, 10) Gipakita usab niya ang iyang pagkamapaubsanon pinaagi sa paghatag kang Jehova sa tanang pasidungog tungod sa iyang pagpanudlo, nga miingon: “Sa diha nga maisa na ninyo ang Anak sa tawo, nan inyong mahibaloan nga ako mao siya, ug wala akoy ginabuhat sa akong kaugalingong pagbuot; apan sumala sa gitudlo kanako sa Amahan ako nagasulti niining mga butanga.”—Juan 8:28.
8 Siya sa angay nakasulti ngadto sa iyang mga mamiminaw: “Isangon ninyo ang akong yugo ug makakat-on gikan kanako, kay ako malumo ug mapaubsanon sa kasingkasing, ug makakaplag kamog kapahulayan sa inyong mga kalag.” (Mateo 11:29) Ug pagkamaayong panig-ingnan sa pagkamapaubsanon ang iyang gihatag pinaagi sa paghugas sa mga tiil sa iyang mga apostol sa kataposang gabii nga siya nahiuban kanila ingong tawo! (Juan 13:3-15) Labing angay, sa Filipos 2:3-8, si apostol Pablo nagtambag sa mga Kristohanon nga magbaton sa “pagpaubos sa hunahuna,” nga naghisgot kang Jesu-Kristo ingong panig-ingnan: “Batoni ninyo kining tinamdan sa panghunahuna nga diha usab kang Kristo Jesus, kinsa, bisan pag naglungtad siya sa dagway sa Diyos, wala maghunahuna nga mangilog, nga mao, aron siya mahisama sa Diyos. Wala, apan siya naghukas sa iyang kaugalingon ug nagbaton sa dagway sa usa ka ulipon ug nahimong sama sa mga tawo. Labaw pa niana, sa dihang iyang nakaplagan nga siya nahisama sa usa ka tawo, siya nagpaubos sa iyang kaugalingon ug nagmasinugtanon hangtod sa kamatayon, oo, kamatayon sa usa ka kahoy sa pagsakit.” Sa nag-atubang sa kinadak-ang krisis sa iyang kinabuhi, siya mapaubsanong miampo ngadto sa iyang Amahan: “Dili sumala sa akong pagbuot, kondili sumala sa imong pagbuot.” (Mateo 26:39) Sa tinuoray, aron kita mahimong mga tig-awat kang Jesu-Kristo, nga magasunod pag-ayo sa iyang mga lakang, kinahanglang kita magmapaubsanon.
Si Apostol Pablo, Maayong Panig-ingnan sa Pagkamapaubsanon
9-12. Sa unsang mga paagi si apostol Pablo mihatag ug maayong panig-ingnan sa pagkamapaubsanon?
9 Si apostol Pablo misulat: “Mahimong mga tig-awat kanako, maingon nga ako tig-awat kang Kristo.” (1 Corinto 11:1) Si apostol Pablo ba miawat kang Jesu-Kristo pinaagi sa pagkamapaubsanon sa hunahuna, sa ingon nagahatag kanatog laing panig-ingnan sa pagpaubos nga atong maawat? Segurado gayod nga iyang gibuhat kana. Sa pagsugod, siya mapaubsanong miangkon nga siya usa ka ulipon ni Jesu-Kristo. (Filipos 1:1) Gisultihan niya ang mga ansiano sa Efeso mahitungod sa iyang ‘pagpaulipon sa Ginoo uban sa kinadak-ang pagkamapaubsanon sa hunahuna ug sa mga luha ug sa mga pagsulay nga midangat kaniya gumikan sa daotang mga laraw sa mga Hudiyo.’ (Buhat 20:17-19) Kon dili pa siya mapaubsanon, dili gayod niya isulat ang mga pulong nga makaplagan sa Roma 7:18, 19: “Nahibalo ako nga diha kanako, nga mao, diha sa akong unod, walay maayo nga nagapuyo . . . Kay ang maayo nga buot ko nga buhaton wala nako buhata, apan ang daotan nga dili ko buot buhaton mao ang akong ginabuhat.”
10 Nagpaila usab sa pagkamapaubsanon ni Pablo ang iyang gisulat ngadto sa mga Kristohanon sa Corinto, sumala sa natala sa 1 Corinto 2:3: “Ako miabot kaninyo diha sa kahuyang ug sa kahadlok ug sa dakong pagkurog.” Nga mapaubsanong nagtumong sa iyang nangaging pagkinabuhi sa wala pa mahimong Kristohanon, siya misulat: “Sa nangagi ako usa ka mapanamastamason ug usa ka maglulutos ug usa ka tawong lampingasan. . . . Si Kristo Jesus mianhi sa kalibotan aron sa pagluwas sa mga makasasala. Niini kanila ako ang kinalabwan.”—1 Timoteo 1:13, 15.
11 Ang iyang pagpasidungog kang Jehova nga Diyos sa tanang kalamposan sa iyang mga paningkamot dugang nagpakita sa iyang pagkamapaubsanon. Siya misulat mahitungod sa iyang ministeryo: “Ako ang nagtanom, si Apolos ang nagbisibis, apan ang Diyos ang nagpadayon sa pagpatubo niini; busa ang may bili dili ang nagtanom o ang nagbisibis, kondili ang Diyos nga nagpatubo niini.” (1 Corinto 3:6, 7) Gihangyo usab niya ang iyang mga igsoon sa pag-ampo alang kaniya aron siya makahatag ug maayong pamatuod, sumala sa atong mabasa sa Efeso 6:18-20: “Magpadayon kamo sa pag-ampo . . . alang kanako, aron ang katakos sa pagsulti ikahatag kanako . . . aron ako makasulti mahitungod sa [ang balaang tinago sa maayong balita] nga may kaisog sumala sa angay nga ako magasulti.”
12 Si Pablo nagpakita usab sa iyang pagkamapaubsanon sa paagi sa iyang pakigtambayayong sa ubang mga apostol: “Si Santiago ug Cepas ug Juan . . . mihatag kanako ug kang Bernabe sa tuong kamot sa pagpakig-ambitay, aron kami moadto sa kanasoran, apan sila ngadto sa mga may sirkunsisyon.” (Galacia 2:9) Siya dugang nagpakita sa iyang kaandam makigtambayayong sa mga ansiano sa kongregasyon sa Jerusalem pinaagi sa pagkuyog sa upat ka batan-ong lalaki ngadto sa templo ug pag-abaga sa ilang galastohan samtang ilang gituman ang usa ka panumpa.—Buhat 21:23-26.
13. Unsay nakapatalagsaon sa pagkamapaubsanon ni Pablo?
13 Ang pagkamapaubsanon ni Pablo labi pang talagsaon sa misulat siya kon unsa ka dako ang paggamit kaniya ni Jehova nga Diyos. Pananglitan, atong mabasa nga “ang Diyos nagpadayon sa paghimog dagkong mga milagro pinaagi sa kamot ni Pablo.” (Buhat 19:11, 12) Labaw pa niana, siya nahatagan sa labaw-kinaiyanhong mga panan-awon ug mga pinadayag. (2 Corinto 12:1-7) Dili nato angay nga hikalimtan ang pagkadinasig niya sa pagsulat sa 14 sa 27 ka basahon (sa aktuwal mga sulat) sa Kristohanon Gregong Kasulatan. Kanang tanan wala maghimo kaniyang hambogiro. Siya nagpabiling mapaubsanon.
Modernong mga Panig-ingnan
14-16. (a) Sa unsang paagi ang unang presidente sa Watch Tower Society usa ka maayong panig-ingnan sa pagkamapaubsanon? (b) Ang iyang panig-ingnan lahi kaayo sa iya ni kinsa?
14 Sa Hebreohanon 13:7, atong mabasa ang tambag ni apostol Pablo: “Hinumdomi kadtong nagapanguna sa inyong taliwala, kinsa nagpahayag sa pulong sa Diyos nganha kaninyo, ug samtang gipalandong ninyo ang gisangpotan sa ilang kagawian awata ninyo ang ilang pagtuo.” Sumala sa maong prinsipyo, atong tagdon isip modernong-adlaw nga panig-ingnan ang unang presidente sa Watch Tower Bible and Tract Society, si Charles Taze Russell, kansang pagtuo mahimo natong awaton. Siya ba tawong mapaubsanon? Mao gayod! Sumala sa maayong pagkapahayag, diha sa teksto sa iyang Studies in the Scriptures, nga unom ka tomo nga may mga 3,000 ka panid, bisan kas-a siya wala magtumong sa iyang kaugalingon. Ang mga basahon sa Watch Tower Bible and Tract Society karong adlawa nagsunod niining prinsipyoha sa dili paghatag ug pagtagad sa mga tawo pinaagi sa dili pagpaila sa ilang mga magsusulat sa mga artikulo.
15 Sa Watch Tower, si Russell kas-a misulat nga siya walay nahibaloan nga “Russellism” ug “Russellite,” mga termino nga gigamit sa mga magsusupak niya apan laktod niyang gisalikway. Siya misulat: “Ang among buluhaton . . . mao ang pagtingob sa dugay nang nakatag nga mga tipik sa kamatuoran ug ipahayag kana ngadto sa katawhan sa Ginoo—dili ingong bag-o, dili ingong among kaugalingon, kondili ingong iya sa Ginoo. . . . Ang buluhaton diin gikahimut-an sa Ginoo ang paggamit sa among ubos nga hiyas dili maoy buluhaton sa pagmugna apan maoy buluhaton sa pagtukod pag-usab, pagpasibo, pagpahiuyon.” Tinuod, iyang gipahayag ang mga pagbati ni apostol Pablo, sumala sa makaplagan sa 1 Corinto 3:5-7.
16 Ang iyang tinamdan bug-os nga kaatbang sa iya ni Charles Darwin. Sa iyang unang edisyon sa The Origin of Species sa 1859, si Darwin subsob naghisgot sa “akong” teoriya, nga wala manumbaling kon unsay giingon sa uban nga una kaniya mahitungod sa ebolusyon. Ang usa ka iladong magsusulat niadtong sigloha, si Samuel Butler, nagsaway kang Darwin, nga nagpunting nga daghan pang uban sa nangagi nga nagduso sa teoriya sa ebolusyon; dili gayod si Darwin ang nagsugod niadto.
17. Unsa ang dugang nga mga panig-ingnan sa pagkamapaubsanon ni Igsoong Rutherford?
17 Ang laing matinumanong alagad sa modernong panahon nga gigamit pag-ayo ni Jehova nga Diyos mao si Joseph F. Rutherford, nga gihisgotan sa sinugdan. Siya usa ka maisogong tigpaluyo sa kamatuoran sa Bibliya ug ilabina sa ngalan ni Jehova. Bisan pag kaylap nailhan nga Judge Rutherford, siya sa kasingkasing maoy tawong mapaubsanon. Pananglitan, siya kas-a mipahayag ug pipila ka dogmatikong pahayag bahin sa pagadahomon sa mga Kristohanon sa 1925. Sa dihang ang mga panghitabo napakyas sa pagpaluyo sa iyang mga pagdahom, sa mapaubsanon iyang gisultihan ang pamilyang Bethel sa Brooklyn nga siya wala magpadayag ug maayong panghukom. Usa ka dinihogang Kristohanon nga suod kaayo niya nagpamatuod nga sa makadaghan iyang nadunggan si Igsoong Rutherford nga nangayog pasaylo sa espiritu sa Mateo 5:23, 24, sa publiko ug sa pribado, tungod kay nakasakit sa isigka-Kristohanon pinaagi sa wala-hunahunaa-kaayong mga pulong. Gikinahanglan ang pagkamapaubsanon aron ang usang may dakong katungdanan mangayog pasaylo niadtong ubos kaniya. Si Igsoong Rutherford naghatag ug maayong panig-ingnan alang sa tanang magtatan-aw, diha sa kongregasyon kaha, sa buluhaton sa nagapanawng magtatan-aw, o sa usa sa mga sanga sa Sosyedad.
18. Unsang pamulong nga nagpadayag sa mapaubsanong panghunahuna ang gibungat sa ikatulong presidente sa Sosyedad?
18 Ang ikatulong presidente sa Watch Tower Bible and Tract Society, si Nathan H. Knorr, nagpakita usab nga, bisan pag prominente siya taliwala sa katawhan ni Jehova, wala siya mobating binayaw tungod sa iyang katungdanan. Bisan pag siya mihawod sa katakos sa pag-organisar ug pagpahayag sa publiko, siya dakog pagtahod alang sa gibuhat sa uban. Sa ingon, siya kas-a miduaw sa usa ka membro sa Departamento sa Pagsulat sa iyang opisina ug mipahayag: “Dinhi nagakahitabo ang labing hinungdanon ug labing lisod nga buluhaton. Kanay hinungdan diyutay ra ang akong ginabuhat niana.” Oo, siya mapaubsanong nagpadapat sa tambag sa Filipos 2:3, nga ‘uban sa pagpaubos sa hunahuna ang usa ka tawo magaisip nga ang uban labaw kay kaniya.’ Giila niya nga bisan pag hinungdanon ang pag-alagad ingong presidente sa Sosyedad, ang ubang buluhaton hinungdanon usab. Nagkinahanglag pagpaubos sa iyang bahin aron mobati niana ug ipahayag kanang tin-aw. Siya maoy laing panig-ingnan nga pagaawaton natong tanan, ilabina niadtong tingali may prominenteng katungdanan sa pagkamagtatan-aw.
19, 20. (a) Unsang panig-ingnan sa pagpaubos ang gihatag sa ikaupat nga presidente sa Sosyedad? (b) Unsang tabang ang ihatag sa sunod artikulo bahin sa atong pagpakitag pagkamapaubsanon?
19 Ang ikaupat nga presidente sa Sosyedad, si Fred W. Franz, usa usab ka maayong panig-ingnan sa pagpaubos. Ingong bise-presidente sa Sosyedad sulod sa 32 ka tuig, siya ang nagbuhat sa kadaghanang pagsulat alang sa mga magasin ug alang sa mga programa sa kombensiyon; apan bahin niini siya kanunayng nagpaluyo, nga wala gayod magtinguha nga makabaton sa pagtagad. Ang susamang karaang panig-ingnan mahisgotan. Sa dihang giparot ni Joab ang mga Amonhanon sa Rabbah, gitino niyang si Haring David ang nagdawat sa pasidungog tungod sa kadaogan.—2 Samuel 12:26-28.
20 Sa pagkatinuod, adunay daghan nga maayong panig-ingnan, sa nangagi ug karon, nga magahatag kanato ug kusganong mga katarongan sa pagpaubos. Bisan pa niana, adunay daghan pang katarongan nga kita magmapaubsanon, ug kini sila ingon man ang mga tabang sa atong pagkamapaubsanon pagahisgotan sa sunod artikulo.
[Mga footnote]
a Ang “condescend” o pagpaubos sagad gamiton nga may kahulogan nga “pagbaton sa hunahuna sa pagkalabaw.” Apan ang pangunang kahulogan niini—ug ang kahulogan niini diha sa New World Translation—maoy “pagtarong,” “pagsalikway sa mga pribilehiyo sa ranggo.”—Tan-awa ang Webster’s Ninth New Collegiate Dictionary.
b Exodo 34:6; Numeros 14:18; Nehemias 9:17; Salmo 86:15; 103:8; 145:8; Joel 2:13; Jonas 4:2; Nahum 1:3.
Nahinumdom Ka Ba?
◻ Unsa ang mga bunga sa garbo?
◻ Kinsay naghatag sa labing maayong panig-ingnan sa pagkamapaubsanon?
◻ Unsay nagpakita kon kinsa ang ikaduhang kinadak-ang panig-ingnan sa pagkamapaubsanon?
◻ Unsang maayong panig-ingnan sa pagkamapaubsanon ang gihatag ni apostol Pablo?
◻ Unsang iladong modernong-adlaw nga mga panig-ingnan sa pagkamapaubsanon ang atong nabatonan?
[Hulagway sa panid 15]
Si Jesus mihatag ug maayong pasundayag sa pagpaubos
[Hulagway sa panid 16]
Si Pablo mihatag ug maayong panig-ingnan sa pagkamapaubsanon
[Hulagway sa panid 17]
Si Igsoong Russell wala magdawat sa pasidungog sa iyang kaugalingon tungod sa mga butang iyang gisulat