Mga Magmamantala sa Gingharian Nagtaho
Ang mga Batan-on Nagpahayag sa Maayong Balita sa Aprika
WALA madugay human sa pagbanhaw kang Jesus, usa ka Aprikano miduaw sa Jerusalem. Wala ihatag sa Bibliya ang iyang ngalan. Siya nailhan lamang ingong “usa ka tawong anaa sa gahom ilalom ni Candace nga rayna sa mga Etiopiano, ug kinsa maoy tinugyanan sa tanan niyang bahandi.” Nganong nahisgotan siya sa Bibliya? Tungod kay ang usa ka manulonda nagtultol sa Kristohanong ebanghelisador nga si Felipe sa pagpahayag ngadto kaniya “sa maayong balita mahitungod kang Jesus.” Ang Etiopiano maoy unang Aprikano nga nasulat nga nahimong membro sa Kristohanong kongregasyon.—Buhat 8:26-39.
Karong adlawa, adunay gatosan ka libong Saksi ni Jehova sa Aprika. Gigamit nila ang tanang kahigayonan sa pagpakig-ambit sa uban sa maayong balita bahin kang Jesus. Ang mosunod nga mga kasinatian nagpakita nga bisan ang mga batan-on sa Aprika adunay papel nga gidula niini.
◻ Si Sandy ug si Priya, duha ka 11-anyos nga mga batang babaye sa Nairobi, Kenya, maoy managsilingan. Nalingaw sila nga magdula nga magkauban ug magbayloay ug mga libro sa mga estorya. Ang mga ginikanan ni Priya misugod pagtuon sa Bibliya uban sa mga Saksi ni Jehova. Niana si Priya may piniling bag-ong mga libro nga idugang sa iyang koleksiyon, lakip sa linaing usa nga nahimong paborito niya, ang Pagpatalinghog sa Dakong Magtutudlo, nga gipatik sa Watchtower Bible and Tract Society. Iyang gipaambit ang iyang Dakong Magtutudlo nga libro sa iyang higala nga si Sandy, ug ang duha ka batang babaye misugod pagtuon niana nga regular.
Ugaling, ang inahan ni Sandy, si Una, tigtambongan sa Anglikanong Simbahan ug dili buot nga ang iyang anak babaye mobasa ug mga libro gikan sa mga Saksi ni Jehova. Bisan pa sa pagsupak sa inahan, ang pagtuon nagpadayon. Usa ka adlaw si Sandy mihangyo sa iyang mama nga maminaw sa ilang panaghisgot bisag kausa lang. Ang kapitulo nga gibasa sa mga batang babaye niadtong adlawa nag-ulohang “Duha ka Tawo nga Nagsaulog ug mga Adlawng-Natawhan.” Si Una namati ug nadani pag-ayo. Giduol dayon niya ang inahan ni Priya uban ang daghang pangutana sa Bibliya.
Ang inahan ni Priya mihikay nga ang usa ka Saksi magtuon sa Bibliya uban kang Una. Sa wala madugay si Una mismo nakig-ambit sa iyang nakat-onan uban sa iyang kauban sa trabaho nga si Dolly. Sa kasamtangan, ang 11-anyos nga si Priya padayon nga mihimog pag-uswag ug mihukom nga simbolohan ang iyang pahinungod kang Jehova nga Diyos pinaagi sa bawtismo sa tubig sa usa ka distritong kombensiyon sa mga Saksi ni Jehova. Niadtong samang kombensiyon, sa kalipay ni Priya, si Una ug Dolly nabawtismohan usab!
◻ Adunay pipila ka Aprikanhong mga nasod diin ang buluhaton sa mga Saksi ni Jehova dili rehistrado. Sa usa nianang maong nasod, adunay kasagarang pagkamatugoton ngadto sa relihiyosong mga kalihokan ug mga pagtulon-an sa mga Saksi. Sa usa ka tunghaan sa maong nasod, ang usa ka siyete-anyos nga batang lalaki ug ang iyang sayes-anyos nga igsoong lalaki—mga anak sa mga Saksi—gitugotan nga mogawas sa lawak-klasehanan panahon sa relihiyosong mga pag-ampo.
Usa ka adlaw usa ka bag-ong magtutudlo nagsugo nga ang mga batang lalaki moduyog sa pag-ampo uban sa ubang kabataan. Ang magulang midumili ug gibunalan sa magtutudlo. Ang iyang manghod, ang sayes-anyos nga si Shadrack, miinsister nga makigkita sa prinsipal didto sa iyang opisina. Ang prinsipal ug ang bag-ong magtutudlo nangutana kaniya kon nganong dili niya buot nga moduyog sa uban. Ilang gipangutana siya kon nahadlok ba siya nga bunalan sa iyang mga ginikanan. Siya mitubag sa maayo kaayong Arabiko: “Wala, ang Diyos nga akong gisimba dili Diyos sa kasamok kondili sa kahusay. Dili mahimong ako usa ka Saksi ni Jehova sa balay ug lain ug relihiyon sa tunghaan!” Ingong resulta, siya gihatagag eksempsiyon.
Human mabawtismohi, ang Etiopiano nga gihisgotan sa basahon sa Mga Buhat ‘padayong nagpanaw nga nagmaya.’ (Buhat 8:39) Sa susama karong adlawa, ang mga magmamantala sa Gingharian sa dakong kontinente sa Aprika nagamaya diha sa ilang pribilehiyo sa ‘pagpahayag sa maayong balita bahin kang Jesus.’—Buhat 8:35.