Pagtan-aw Dili Lamang sa mga Butang nga Imong Makita!
ANG maayong pisikal nga panan-aw maoy usa ka panalangin. Ngani, nag-ingon ang kadaghanang tawo nga pipila lamang ka butang nga ilang nabatonan ang mas bililhon kay sa panan-aw. Apan, alang sa mga Kristohanon adunay usa ka matang sa panan-aw nga gihisgotan ni apostol Pablo nga mas bililhon kay sa maayong pisikal nga panan-aw. “Kami nagapunting sa among mga mata, dili sa mga butang makita, kundili sa mga butang nga dili-makita,” misulat si Pablo. (2 Corinto 4:18) Tinuod nga linain gayod kaayo kining matanga sa panan-aw nga makahimo sa tawo sa pagkakita sa mga butang nga dili makita! Matawag nato kini nga 20/20 nga panan-aw sa espirituwal nga matang.
Nganong Adunay Panginahanglan?
Ang mga Kristohanon sa unang siglo may tinuod nga panginahanglan nga makabaton niining matanga sa espirituwal nga panan-aw. Sila nagtuman sa ilang Kristohanong ministeryo ubos sa daghang kalisod. Gipahayag kini ni Pablo niining paagiha: “Kami ginapiit sa tanang paagi, apan dili hagip-ot nga dili na makalihok; kami nalibog, apan dili bug-os nga walay kalingkawasan; kami ginalutos, apan wala biyaing nag-ungaw sa kapildihan; kami nangatumba, apan wala malaglag.”—2 Corinto 4:8, 9.
Bisan pa sa maong mga kahimtang, ang matinumanong mga tinun-an mibarog nga malig-on. Uban sa malig-ong pagtuo sa Diyos, sila nakaingon sama sa giingon ni Pablo: “Wala kami moangka, apan bisan pa kon ang among pagkatawo sa gawas nagakahugo, tino nga ang among pagkatawo sa sulod ginabag-o sa adlaw-adlaw.” Apan, unsay hinungdan niining adlaw-adlaw nga pagbag-o? Si Pablo nagpadayon sa pag-ingon: “Kay bisan tuod ang kasakitan makadiyot ug magaan, kini nagapatungha alang kanamo ug usa ka himaya nga labaw ug labaw pa gayod ang gibug-aton ug walay-kataposan; samtang kami nagapunting sa among mga mata, dili sa mga butang makita, kundili sa mga butang nga dili-makita. Kay ang mga butang nga makita lumalabay, apan ang mga butang nga dili-makita walay-kataposan.”—2 Corinto 4:16-18.
Gidasig ni Pablo ang iyang espirituwal nga mga igsoon sa dili pagtugot sa mga suliran, mga kalisod, mga paglutos—mga kasakitan sa bisan unsang matang—nga magpahanap sa ilang panan-aw sa mahimayaong ganti nga gibutang sa atubangan nila. Kinahanglan silang molantaw dili lamang sa presenteng mga kahimtang, nga magpunting sa ilang mga mata sa malipayong sangpotanan sa Kristohanong dalan. Mao kanay nakatabang kanila sa pagbag-o sa adlaw-adlaw nga paagi sa ilang determinasyon nga magpadayon sa gubat. Ang mga Kristohanon karon sa ingon nagkinahanglan sa maong maayong espirituwal nga panan-aw.
Lantawa ang Presenteng mga Kasakitan nga Lumalabay!
Dili kalikayan, atong makita sa adlaw-adlaw ang mga butang nga dili nato gustong makita. Sa pagtan-aw sa salamin makakita gayod kita sa di-tilinguhaong mga apan ug mga depekto sa pisikal nga lawas, nga mga timailhan sa pisikal nga pagkadili-hingpit. Sa dihang motan-aw kita sa salamin sa Pulong sa Diyos, atong makita ang espirituwal nga mga apan ug mga depekto, sa atong kaugalingon ug sa uban. (Santiago 1:22-25) Ug kon motan-aw kita sa inadlaw nga mantalaan o sa eskrin sa telebisyon, ang mga asoy sa inhustisya, kapintasan, ug trahedya daling makaabot sa atong pagtagad ug makahatag kanatog kaguol.
Gusto ni Satanas nga kita mawad-ag paglaom tungod sa mga butang nga atong makita o malinga ug mosugod sa pagkaluya sa pagtuo. Unsaon nato kini pagsanta nga mahitabo? Kinahanglang sundon nato ang panig-ingnan nga gipakita ni Jesu-Kristo, ingon sa girekomendar ni apostol Pedro sa dihang siya miingon: “Sa pagkatinuod, nganhi niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.” (1 Pedro 2:21) Sa tanang bahin sa Kristohanong pagkinabuhi, si Jesus mao ang hingpit nga panig-ingnan.
Sa paghisgot kang Jesus ingong atong panig-ingnan, gihisgotan ilabina ni Pedro nga si Jesus nag-antos. Tinuod, nag-antos ug dako si Jesus sa dinhi pa sa yuta. Ingong “batid nga magbubuhat” ni Jehova nga presente diha sa paglalang sa katawhan, siya nasayod gayod kon unsay gimbut-an sa Diyos nga mahimo ang katawhan. (Proverbio 8:30, 31) Apan karon siya mismo nakakita kon unsay gipahinabo kanila sa sala ug pagkadili-hingpit. Sa adlaw-adlaw iyang nakita ug kinahanglang makiglabot sa mga pagkadili-hingpit ug mga kahuyangan sa katawhan. Dako gayod kana nga pagsulay alang kaniya.—Mateo 9:36; Marcos 6:34.
Gawas pa sa mga kasakitan sa uban, nasinati usab ni Jesus ang iyang kaugalingong mga kasakitan. (Hebreohanon 5:7, 8) Sanglit adunay hingpit nga espirituwal nga panan-aw, siya nagtan-aw dili lamang kanila aron makita ang ganti sa pagkahimong tinuboy ngadto sa dili-mamatay nga kinabuhi gumikan sa iyang dalan sa pagkamaunongon. Dayon ingong usa ka Mesiyanikong Hari, siya may pribilehiyo sa pagtuboy sa masakitong katawhan gikan sa ubos nga kahimtang niini ngadto sa kahingpitan nga gimbut-an ni Jehova sa sinugdan. Ang pagpunting sa iyang mata niining dili makitang mga palaaboton sa umaabot nakatabang kaniya sa pagbaton ug kalipay diha sa pag-alagad sa Diyos bisan pa sa mga kasakitan nga iyang nakita sa adlaw-adlaw. Si Pablo misulat sa ulahi: “Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.”—Hebreohanon 12:2.
Wala gayod itugot ni Jesus ang mga kalisod ug masulayong mga kahimtang nga magpasubo kaniya, magpalinga, o magpaluya sa iyang pagtuo. Ingong iyang mga tinun-an, kinahanglang sundon gayod nato ang iyang hingpit nga panig-ingnan.—Mateo 16:24.
Tutoki ang Dili Makita Dumalayong mga Butang!
Sa paghisgot bahin sa kon unsay nagpaarang kang Jesus sa paglahutay, gipunting usab ni Pablo ang dalan alang kanato sa dihang siya misulat: “Atong daganon nga may pag-agwanta ang lumba nga gibutang atubangan kanato, samtang kita nagatutok sa Pangulong Ahente ug Maghihingpit sa atong pagtuo, si Jesus.” (Hebreohanon 12:1, 2) Oo, aron madagan nga malamposon ug malipayon ang Kristohanong dalan, kinahanglang tan-awon nato dili lamang ang mga butang nga anaa mismo sa atong atubangan. Apan sa unsang paagi atong ‘tutokan’ si Jesus, ug unsay mahimo niini kanato?
Sa usa ka butang, niadtong 1914, si Jesus gipalingkod ingong Hari sa Gingharian sa Diyos, ug siya nagmando sa langit. Siyempre, kining tanan dili makita sa atong pisikal nga mga mata. Bisan pa, kon atong ‘tutokan’ si Jesus, ang atong espirituwal nga panan-aw motabang kanato sa pagkakita nga siya naghana na sa paglaglag sa presenteng daotang sistema sa mga butang ug sa pagbalhog kang Satanas ug sa iyang demonyohanong mga panon ngadto sa mga talikala sa pagkawalay kalihokan. Sa magtan-aw pa sa halayo, ang atong espirituwal nga panan-aw magbutyag ug kahibulongang bag-ong kalibotan nga niana “wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 19:11-16; 20:1-3; 21:4.
Busa, imbes magpadala sa kabug-at sa temporaryong mga kasakitan nga atong maatubang sa matag adlaw, nganong dili ipunting ang atong panan-aw sa mga butang nga walay kataposan? Pinaagi sa mga mata sa pagtuo, nganong dili molantaw luyo sa mga sakit ug sa kahakog niining nahugawang yuta aron makita ang paraiso nga puno sa mahimsog, malipayon, ug matinagdanong katawhan? Nganong dili molantaw luyo sa atong mga depekto, sa pisikal ug espirituwal, ug makita ang atong kaugalingon nga mahigawas gikan niini sa walay kataposan pinaagi sa bili sa halad lukat ni Kristo? Nganong dili molantaw luyo sa mga kamatayon nga agi sa gubat, krimen, ug kapintasan ug sa pagtan-aw sa bag-ong mga binanhaw nga ginatudloan diha sa pakigdait ug pagkamatarong ni Jehova?
Dugang pa, ang ‘pagtutok’ kang Jesus naglakip usab sa pagpunting sa atong espirituwal nga panan-aw kon unsay nahimo na sa Gingharian, bisag dili-makita, taliwala sa katawhan sa Diyos sa yuta: panaghiusa, pakigdait, gugma, inigsoong pagbati, ug espirituwal nga kauswagan. Usa ka Kristohanong babaye sa Alemanya, human nakakita sa video nga United by Divine Teaching, misulat: “Ang video dugang motabang kanako sa pagsilsil sa hunahuna nga daghan kaayong Kristohanong mga igsoong lalaki ug babaye sa tibuok kalibotan nga niining gutloa mismo maunongong nag-alagad kang Jehova—ug nagahimo niini bisan pa sa pagsupak sa publiko. Pagkabililhon sa atong inigsoong panaghiusa diha sa kalibotan sa kapintasan ug pagdumot!”
“Nakita” ba usab nimo si Jehova, si Jesus, ang matinumanong mga manulonda, ug ang minilyong kaubang mga Kristohanon nga nagbarog sa imong kiliran? Kon mao, ikaw dili sobrang mabalaka “sa kalisod niining sistema sa mga butang” nga moyudyod kanimo sa pagkawala sa imong kadasig ug magpahimo kanimo nga “dili-mabungahon” diha sa Kristohanong pag-alagad. (Mateo 13:22) Busa ‘tutoki’ si Jesus pinaagi sa pagpunting sa imong espirituwal nga panan-aw diha sa natukod nga Gingharian sa Diyos ug sa mga panalangin niini, karon ug sa umaabot.
Paningkamot mga Mabuhi Aron Makita ang Dili-Makita!
Nakakita sa dakong kalainan tali sa walay kataposang bag-ong kalibotan sa Diyos ug sa nagakagun-ob nga daang kalibotan karon, kinahanglan kitang mapalihok sa paggawi sa atong kaugalingon sa paagi nga kita pagaisipong takos nga mabuhi aron makita sa literal ang mga butang nga makita lamang nato pinaagi sa mga mata sa pagtuo karon. Daghan sa mga mabanhaw maglisod sa pagtuo sa ilang makita sa dihang sila mabanhaw na sa pagkakita sa usa ka matarong yutan-ong paraiso nga lahi kaayo sa kalibotan nga ilang nakita sa wala pa sila mamatay. Handurawa ang atong kalipay nga buhi sa pag-abiabi kanila ug sa pagpatin-aw kanila kon unsay gibuhat sa Diyos!—Itandi ang Joel 2:21-27.
Oo, pagkabililhon gayod sa maayong espirituwal nga panan-aw, ug pagkahinungdanon nga huptan kining mahait! Mahimo nato kini pinaagi sa regular nga pagtuon nga personal sa Bibliya, pagtambong sa Kristohanong mga tigom, pagpakigsulti sa uban bahin sa atong paglaom nga gipasukad sa Bibliya, ug labaw sa tanan, pag-ampo alang sa paggiya sa Diyos. Maghimo kini sa atong espirituwal nga panan-aw nga mahait ug tin-aw, nga magpaarang kanato sa pagtan-aw dili lamang sa mga butang nga atong makita!