Gipagawas sa Kamatuoran

SA Tinipong Bansa, kapin sa usa ka milyong tawo ang nabilanggo. Niini nila, duolan sa tulo ka libo ang gihukman nga mamatay. Handurawa ang imong kaugalingon nianang kahimtanga. Unsay imong bation? Ang paghunahuna sa maong palaaboton makapasubo gayod. Bisan pa, sa usa ka diwa, ang tanang tawo anaa sa susamang kahimtang. Ang Bibliya nag-ingon: “Ang tanan nakasala ug wala makaabot sa himaya sa Diyos.” (Roma 3:23) Oo, ingong mga kaliwat ni Adan, kita “nabilanggo” sa usa ka makasasalang kahimtang. (Roma 5:12) Atong gibati ang mga epekto sa atong pagkabilanggo matag adlaw, sama sa Kristohanong apostol nga si Pablo, kinsa misulat: “Akong nakita sa akong mga sangkap ang laing balaod nga nagapakigbugno batok sa balaod sa akong kaisipan ug nagadala kanakong bihag ngadto sa balaod sa sala nga ania sa akong mga sangkap.”​—Roma 7:23.

Ingong resulta sa atong makasasalang kinaiya, ang matag usa kanato nailalom sa hukom nga kamatayon, ingnon ta, kay ang Bibliya nag-ingon: “Ang suhol nga ginabayad sa sala maoy kamatayon.” (Roma 6:23) Ang salmistang si Moises haom nga nagbatbat sa atong kahimtang: “Setenta ka tuig maoy ato lamang nabatonan​—otsenta ka tuig, kon kita malig-on; bisan pa niana ang idulot niining tanan mao ang kasamok ug kagul-anan; ang kinabuhi sa dili madugay matapos, ug kita mahanaw na.”​—Salmo 90:​10, Today’s English Version; itandi ang Santiago 4:14.

Diha sa hunahuna ang pagkaulipon sa katawhan sa sala ug kamatayon nga si Jesus miingon sa iyang mga sumusunod: “Ang kamatuoran magpagawas kaninyo.” (Juan 8:32) Nianang mga pulonga, si Jesus nagpaabot ngadto sa iyang mga sumusunod sa paglaom sa usa ka butang nga mas labaw pa kay sa kagawasan gikan sa Romanhong pagmando​—gitanyag niya kanila ang kapasayloan gikan sa sala ug kagawasan gikan sa kamatayon! Sa unsang paagi kini ihatag kanila? “Kon ang Anak magpagawas kaninyo,” giingnan sila ni Jesus, “kamo sa tinuod mahimong gawasnon.” (Juan 8:36) Oo, pinaagi sa pagtugyan sa iyang kinabuhi, “ang Anak,” si Jesus, nagsilbing usa ka halad pasig-uli aron sa pagpalit ug balik sa nawala ni Adan. (1 Juan 4:10) Kini nag-abli sa dalan alang sa tanang matinumanong katawhan nga mapahigawas sa pagkaulipon sa sala ug kamatayon. Ang bugtong Anak sa Diyos namatay “aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.”​—Juan 3:16.

Busa ang kamatuoran nga magpahigawas kanato nagalibot kang Jesu-Kristo. Kadtong mahimong mga sumusunod sa iyang mga lakang adunay paglaom nga mapagawas gikan sa sala ug kamatayon sa dihang ang Gingharian sa Diyos magkontrolar sa bug-os sa mga kalihokan sa yuta. Bisan karon, kadtong modawat sa kamatuoran sa Pulong sa Diyos makasinati ug tinuod nga kagawasan. Sa unsang mga paagi?

Kagawasan Gikan sa Kahadlok sa mga Patay

Minilyon karong adlawa ang nagkinabuhi uban ang kahadlok sa mga patay. Ngano? Tungod kay ang ilang mga relihiyon nagtudlo kanila nga ang kalag mobiya sa lawas inigkamatay ug mopanaw ngadto sa espiritung dominyo. Maoy hinungdan nga naandan sa pipila ka nasod nga ang mga paryente sa namatay magbilar sulod sa daghang adlaw ug mga gabii. Kini subsob maglakip sa lanog nga pagpanganta ug pagbasal sa tambol. Ang mga nagbalata nagtuo nga kini makapahimuot sa minatay ug magpugong sa iyang espiritu sa pagbalik aron paghadlok sa mga buhi. Ang bakak nga mga pagtulon-an sa Kakristiyanohan mahitungod sa mga patay nagpatunhay lamang niining tradisyona.

Apan, ang Bibliya nagpadayag sa kamatuoran mahitungod sa kahimtang sa mga patay. Kini tin-awng nag-ingon nga ang imong kalag mao ikaw, dili usa ka misteryosong bahin nimo nga magpadayong buhi human sa kamatayon. (Genesis 2:​7; Ezequiel 18:4) Dugang pa, ang mga patay wala sakita sa usa ka kalayonhong impiyerno, ni sila bahin sa usa ka espiritung dominyo nga makaapektar sa mga buhi. “Mahitungod sa mga patay,” nag-ingon ang Bibliya, “sila wala mahibalo sa bisan unsa . . . Walay buluhaton ni lalang ni kahibalo ni kaalam sa Sheol [ang lubnganan], ang dapit diin ikaw moadto.”​—Ecclesiastes 9:​5, 10.

Kining mga kamatuorana sa Bibliya nagpahigawas sa daghang tawo sa kahadlok sa mga patay. Dili na sila motanyag ug mahal nga mga halad aron sa pagpahimuot sa ilang mga katigulangan, ni sila mabalaka nga ang ilang mga minahal sa walay kokaluoy gisakit gumikan sa ilang mga kasaypanan. Ilang nakat-onan nga ang Bibliya nagtanyag ug kahibulongang paglaom alang niadtong nangamatay, kay kini nagtug-an kanato nga sa tinudlong panahon sa Diyos, aduna unyay “pagkabanhaw sa mga matarong ug mga dili-matarong.” (Buhat 24:​15; Juan 5:​28, 29) Busa, ang mga patay sa pagkakaron nagapahulay lamang, nga daw nahinanok sa pagkatulog.​—Itandi ang Juan 11:​11-14.

Ang kamatuoran mahitungod sa kahimtang sa mga patay ug sa paglaom sa pagkabanhaw makapahigawas kanato gikan sa kawalay-paglaom nga mahimong dalhon sa kamatayon. Ang maong paglaom nagpalig-on sa usa ka magtiayon sa Tinipong Bansa sa dihang ang ilang kuwatro-anyos nga anak lalaki namatay sa usa ka aksidente. “Adunay kahaw-ang sa among kinabuhi nga dili mahulipan hangtod nga among makita pag-usab ang among anak pinaagi sa pagkabanhaw,” miangkon ang iyang inahan. “Apan kami nasayod nga ang among kasakit maoy temporaryo lamang, sanglit si Jehova nagsaad nga pahiran ang among mga luha sa kagul-anan.”​—Pinadayag 21:​3, 4.

Kagawasan Gikan sa Kahadlok sa Umaabot

Unsay anaa sa umaabot? Ang ato bang yuta masunog sa usa ka nukleyar nga holocaust? Ang paglaglag ba sa kalikopan sa yuta maghimo sa atong planeta nga dili-mapuy-an? Ang moral nga pagkahugno motultol ba sa anarkiya ug kagubot? Mao kini ang tinuod nga gikahadlokan sa daghan karong adlawa.

Apan, ang Bibliya nagtanyag ug kagawasan gikan sa dili-maayong kahadlok. Kini nagpasalig kanato nga “ang yuta magpabilin hangtod sa panahong walay tino.” (Ecclesiastes 1:4) Si Jehova wala maglalang sa atong planeta aron lamang makita kini nga gilaglag sa iresponsableng mga tawo. (Isaias 45:18) Hinunoa, gilalang ni Jehova ang yuta aron magsilbing paraisonhong puloy-anan alang sa nahiusang tawhanong pamilya. (Genesis 1:​27, 28) Ang iyang katuyoan wala mausab. Ang Bibliya nagtug-an kanato nga ang Diyos ‘magagun-ob niadtong mga nagagun-ob sa yuta.’ (Pinadayag 11:18) Tapos niana, “ang mga maaghop mismo makapanunod sa yuta,” nag-ingon ang Bibliya, “ug sila makakaplag sa ilang tumang kalipay diha sa kadagaya sa pakigdait.”​—Salmo 37:11.

Kining maong saad kasaligan, tungod kay ang Diyos dili magbakak. Si Jehova namulong pinaagi sa iyang manalagna nga si Isaias: “Ang akong pulong nga magagula sa akong baba . . . dili mobalik kanako nga walay mga sangpotanan, apan kini magatuman sa akong gikahimut-an, ug kini magpalampos sa butang nga tungod niana kini akong gipadala.” (Isaias 55:​11; Tito 1:2) Busa, kita makalantaw uban ang pagsalig sa katumanan sa saad sa Diyos nga gisulat sa Bibliya sa 2 Pedro 3:​13: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.”

Kagawasan Gikan sa Kahadlok sa Tawo

Ang Bibliya nagtagana kanato ug maayong mga panig-ingnan sa mga lalaki ug mga babaye nga nagpasundayag ug kaisog sa ilang debosyon ngadto sa Diyos. Lakip kanila mao si Gideon, Barak, Debora, Daniel, Ester, Jeremias, Abigail, ug Jael​—sa pagngalan lang ug pipila. Kining matinumanong mga lalaki ug babaye nagpasundayag sa tinamdan sa salmista nga misulat: “Sa Diyos gipahiluna ko ang akong pagsalig. Dili ako mahadlok. Unsay mabuhat sa tawo kanako?”​—Salmo 56:11.

Sa unang siglo, ang mga apostol nga sila Pedro ug Juan nagpasundayag sa susamang kaisog sa dihang ang relihiyosong mga awtoridad nagbaod kanila sa paghunong sa pagsangyaw. “Alang kanamo,” sila mitubag, “dili kami makahunong sa pagsulti sa mga butang nga among nakita ug nadungog.” Ingong resulta sa ilang lig-ong pagbarog, si Pedro ug Juan sa ulahi gibilanggo. Tapos sa milagrosong pagbuhi kanila, mibalik sila sa ilang kalihokan ug padayon nga “nanagsulti sa pulong sa Diyos uban ang kaisog.” Sa wala madugay si Pedro ug ang ubang mga apostol gitaral atubangan sa Hudiyonhong Sanhedrin. “Mahugtanon kaming nagmando kaninyo nga dili na magpadayon sa pagpanudlo pinasukad niining ngalana,” ang hataas nga saserdote miingon kanila, “apan, tan-awa! inyong gipuno ang Jerusalem sa inyong pagpanudlo.” Si Pedro ug ang ubang mga apostol mitubag: “Kinahanglang among sugton ang Diyos ingong magmamando inay kay sa mga tawo.”​—Buhat 4:​16, 17, 19, 20, 31; 5:​18-20, 27-29.

Sa ilang buluhaton nga pagsangyaw sa maayong balita sa Gingharian sa Diyos, ang mga Saksi ni Jehova karong adlawa naningkamot sa pagsundog sa kasibot sa unang-siglong mga Kristohanon. Bisan ang mga batan-on taliwala kanila subsob nga nagpamatuod sa ilang kaugalingon nga maisog pinaagi sa pagsulti sa uban bahin sa ilang pagtuo. Tagda ang pipila ka pananglitan.

Si Stacie, usa ka tin-edyer, maoy maulawon. Ingong resulta, ang pagpakigsulti sa uban bahin sa iyang pagtuo sa sinugdan maoy usa ka hagit. Unsay iyang gibuhat aron mabuntog ang iyang kamaulawon? “Akong gitun-an ang Bibliya ug gitino nga akong nasabtan kon unsay akong gisulti,” siya miingon. “Kini nakapasayon niana, ug ako labi pang misalig sa akong kaugalingon.” Ang maayong dungog ni Stacie gitaho sa lokal nga mantalaan. Ang artikulo, nga gisulat sa usa ka maestra sa iyang tunghaan, mikomento: “Ang pagtuo [ni Stacie] daw naghatag kaniya sa kusog nga makigbisog sa daghang pagpit-os nga gibati sa kadaghanang mga tin-edyer. . . . Iyang gibati nga ang pag-alagad sa Diyos kinahanglang maoy panguna sa iyang hunahuna.”

Si Tommy misugod sa pagkakat-on bahin sa Bibliya gikan sa iyang mga ginikanan sa dihang siya singko anyos pa lamang. Bisan sa linghod nga pangedaron, siya mibarog nga malig-on dapig sa matuod nga pagsimba. Samtang ang iyang batang mga klasmet nagdibuho ug mga hulagway sa mga pangilin, si Tommy nagdibuho ug mga esena sa gisaad sa Diyos nga Paraiso. Ingong tin-edyer, namatikdan ni Tommy nga daghan sa mga tinun-an ang naglibog mahitungod sa mga pagtulon-an sa mga Saksi ni Jehova. Inay mahadlok, iyang gihangyo ang usa sa iyang mga magtutudlo kon siya makadumala ba ug pangutanag-tubag nga panaghisgot uban sa iyang klase aron iyang matubag ang tanan nilang pangutana sa usa ka higayon. Kini gitugot, ug ang maayong pamatuod nahimo.

Sa dihang siya 17 anyos, si Markietta nakakaplag ug maayo kaayong kahigayonan sa pagpakigsulti sa uban diha sa iyang klase bahin sa iyang pagtuo. “Gihatagan kami ug asaynment nga mohimog pakigpulong,” siya miingon. “Akong gipili ang akong ulohan gikan sa librong Mga Pangutanang Gisukna sa mga Batan-on​—Mga Tubag nga Mosaler.a Akong gipili ang lima ka kapitulo gikan sa libro ug akong gisulat ang mga ulohan diha sa pisara. Akong gihangyo ang klase nga ila kining ihan-ay sa pagkasunodsunod nga ilang gibating labing hinungdanon.” Usa ka panaghisgot nga may pagsalmot sa klase misunod. “Akong gipakita sa klase ang libro,” mihinapos si Markietta, “ug daghang estudyante ang mihangyo ug kopya. Bisan ang akong magtutudlo miingon nga buot niyag usa ka kopya.”

Ikaw Mapagawas sa Kamatuoran

Ingon sa atong nakita, ang kamatuoran nga anaa sa Bibliya adunay makapahigawas nga epekto diha sa mga tawo sa tanang pangedaron kinsa nagtuon niana ug nagsilsil sa kasingkasing sa mensahe niana. Kini nagpagawas kanila gikan sa kahadlok sa mga patay, kahadlok sa umaabot, ug kahadlok sa tawo. Labaw sa tanan, ang lukat ni Jesus magpahigawas sa matinumanong mga tawo gikan sa sala ug kamatayon. Pagkadakong kalipay ang mabuhi sa walay kataposan sa usa ka paraisong yuta, nga dili na mabilanggo sa atong napanunod nga makasasalang kahimtang!​—Salmo 37:29.

Buot ba nimong makakat-on ug dugang bahin sa mga panalangin nga gisaad sa Diyos? Kon mao, unsay imong buhaton? Si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Busa kon buot nimong masinati ang kagawasan nga gisaad ni Jesus sa iyang mga tinun-an, kinahanglang magtuon ka bahin kang Jehova nga Diyos ug sa iyang Anak. Kinahanglan nimong mahibaloan kon unsa ang kabubut-on sa Diyos ug dayon buhaton kana, kay ang Bibliya nag-ingon: “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”​—1 Juan 2:17.

[Mga footnote]

[Hulagway sa panid 7]

Ubos sa Gingharian sa Diyos, ang katawhan sa kataposan mapahigawas gikan sa sala ug kamatayon