Ikaw ba Usa ka “Hingkod” nga Kristohanon?
“SA DIHANG ako bata pa, ako nagasulti ingon sa bata, nagahunahuna ingon sa bata, nangatarungan ingon sa bata.” Mao kana ang gisulat ni apostol Pablo. Tinuod, kitang tanan kanhi maoy makaluluoy nga mga masuso. Apan, wala kita magpabilin nga ingon niana hangtod sa hangtod. Mikomento si Pablo: “Karon nga ako nahingkod na, ako nang giwagtang ang mga kinaiya sa usa ka bata.”—1 Corinto 13:11.
Sa samang paagi, ang tanang Kristohanon nagsugod ingong espirituwal nga mga masuso. Apan sa ngadtongadto, ang tanan “makadangat ngadto sa pagkausa diha sa pagtuo ug diha sa tukmang kahibalo sa Anak sa Diyos, ngadto sa usa ka hingkod nga tawo, ngadto sa sukod sa pamarog nga iya sa kabug-osan sa Kristo.” (Efeso 4:13) Sa 1 Corinto 14:20, kita giawhag: “Mga igsoon, ayaw kamo pagpakabata diha sa mga kagahom sa pagsabot . . . Pagpakahingkod diha sa mga kagahom sa pagsabot.”
Ang presensiya sa hamtong, hingkod nga mga Kristohanon maoy usa ka panalangin alang sa katawhan sa Diyos karon, ilabina tungod kay daghan kaayo ang mga bag-ohan. Ang hingkod nga mga Kristohanon makadugang sa kalig-on sa kongregasyon. Sila dunay positibong epekto sa disposisyon, o nagpatigbabaw nga tinamdan, sa bisan unsang kongregasyon nga ilang tambongan.
Bisan tuod ang pisikal nga pagtubo medyo awtomatiko, ang espirituwal nga pagtubo mahitabo lamang sa paglabay sa panahon ug pinaagig paningkamot. Dili ikatingala, balik sa panahon ni Pablo, ang ubang Kristohanon wala ‘mouswag ngadto sa pagkahamtong,’ bisan pag nag-alagad sa Diyos sulod na sa daghang tuig. (Hebreohanon 5:12; 6:1) Ikaw, komosta? Kon nag-alagad ka sa Diyos sulod sa daghan nang tuig o medyo sa mubo pang panahon, angayan nga imong susihon ang imong kaugalingon sa matinud-anon. (2 Corinto 13:5) Ikaw ba nalakip niadtong matawag gayod ug hamtong, o hingkod, nga mga Kristohanon? Kon dili, sa unsang paagi ka mahimong hamtong?
‘Hingkod Diha sa mga Kagahom sa Pagsabot’
Ang usa ka espirituwal nga masuso dali rang ‘matuyatuya sama sa mga balod ug madala ngadto ug nganhi sa matag hangin sa pagtulon-an pinaagi sa bitik-bitik sa mga tawo, pinaagi sa kamalipatlipaton sa pagmugnag sayop.’ Busa si Pablo miawhag: “Managtubo kita sa tanang butang pinaagi sa gugma ngadto kaniya nga mao ang ulo, si Kristo.” (Efeso 4:14, 15) Sa unsang paagi kini himoon sa usa ka tawo? Ang Hebreohanon 5:14 nag-ingon: “Ang gahi nga pagkaon ilaha sa hamtong nga mga tawo, kanilang kinsa pinaagi sa pagginamit nakabansay sa ilang kagahom sa pag-ila nga mailhan ang husto ug ang sayop.”
Matikdi nga ang kagahom sa pag-ila sa hamtong nga mga tawo nabansay pinaagig paggamit, o eksperyensiya sa pagpadapat sa mga prinsipyo sa Bibliya. Nan, dayag nga ang usa ka tawo dili mahimong hamtong sa kalit; nagkinahanglag panahon aron motubo sa espirituwal. Bisan pa niana, dako kag mahimo aron mapasayon ang imong espirituwal nga pagtubo pinaagi sa personal nga pagtuon—ilabina sa mas lalom nga mga butang sa Pulong sa Diyos. Sa di pa dugayng mga panahon Ang Bantayanang Torre naghisgot ug daghang laglom nga mga ulohan. Ang mga hamtong dili molikay sa maong mga artikulo tungod kay kini naundan ug “pipila ka butang nga lisod sabton.” (2 Pedro 3:16) Hinunoa, sila maikagong mokaon sa maong gahi nga pagkaon!
Masibotong mga Magsasangyaw ug mga Magtutudlo
Gisugo ni Jesus ang iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Ang masibotong pagpakigbahin sa buluhatong pagsangyaw makadasig usab sa imong espirituwal nga pagtubo. Nganong dili paningkamotang makigbahin sa bug-os taman sa itugot sa imong mga kahimtang?—Mateo 13:23.
Usahay, ang mga kapit-os sa kinabuhi makapalisod sa pagpangitag panahon nga makasangyaw. Apan, pinaagi sa ‘imong kusganong pagpanglimbasog’ ingong usa ka magsasangyaw, ikaw nagpasundayag sa importansiya nga imong gihatag sa “maayong balita.” (Lucas 13:24; Roma 1:16) Sa ingon ikaw pagaisipon ingong “panig-ingnan ngadto sa mga matinuohon.”—1 Timoteo 4:12.
Mga Tighupot ug Integridad
Ang pagtubo ngadto sa pagkahamtong nag-apil usab sa pagpaningkamot nga mahuptan ang imong integridad. Ingon sa gitala sa Salmo 26:1, si David mipahayag: “Hukmi ako, Oh Jehova, kay ako naglakaw sa akong integridad.” Ang integridad maoy maayong moral, pagkabug-os. Hinunoa, wala kini magkahulogan ug kahingpitan. Si David mismo nakahimog ubay-ubay nga grabeng mga sala. Apan tungod kay iyang gidawat ang pagbadlong ug gitul-id ang iyang dalan, iyang gipasundayag nga ang iyang kasingkasing duna gihapoy tim-os nga gugma alang kang Jehova nga Diyos. (Salmo 26:2, 3, 6, 8, 11) Ang integridad naglangkit sa pagkatugob, o pagkabug-os, sa kinasingkasing nga debosyon. Gisultihan ni David ang iyang anak nga si Solomon: “Ilha ang Diyos sa imong amahan ug alagara siya uban ang bug-os nga kasingkasing.”—1 Cronicas 28:9.
Ang paghupot sa integridad naglangkit sa pagkahimong “dili bahin sa kalibotan,” nga dili mag-apil-apil sa politika sa mga nasod ug sa ilang mga gubat. (Juan 17:16) Kinahanglan usab nimong likayan ang dunot nga mga buhat, sama sa pakighilawas, panapaw, ug pag-abuso sa droga. (Galacia 5:19-21) Apan, ang paghupot sa integridad nagkahulogan ug labaw pa kay sa paglikay niining mga butanga. Si Solomon nagpasidaan: “Ang patayng mga langaw mao ang magpalang-og, magpabulabula sa lana sa magbubuhat ug pahumot. Mao man usab ang mahimo sa diyutay nga kabuang ngadto sa usa nga bililhon sa kaalam ug himaya.” (Ecclesiastes 10:1) Oo, bisan ang “diyutay nga kabuang,” sama sa dili-angay nga tiawtiaw o pagbirigbirig sa kaatbang nga sekso, makadaot sa reputasyon sa usa nga “bililhon sa kaalam.” (Job 31:1) Busa, ipasundayag ang imong pagkahamtong pinaagi sa pagpaningkamot nga mahimong sulondan sa tanan nimong paggawi, nga likayan bisan ang “dagway sa pagkadaotan.”—1 Tesalonica 5:22, King James Version.
Mga Maunongon
Ang usa ka hingkod nga Kristohanon maunongon usab. Ingon sa atong mabasa sa Efeso 4:24, si apostol Pablo nag-awhag sa mga Kristohanon: ‘Isul-ob ang bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.’ Diha sa Gregong Kasulatan, ang pulong alang sa “pagkamaunongon” sa orihinal nga pinulongan dunay ideya sa pagkabalaan, pagkamatarong, pagtahod. Ang maunongong tawo debotado, diyosnon; mabinantayon siyang nagtuman sa tanan niyang katungdanan sa Diyos.
Unsa ang pipila ka paagi nga imong maugmad ang maong pagkamaunongon? Ang usa mao ang pagpakigtambayayong sa mga ansiyano sa imong lokal nga kongregasyon. (Hebreohanon 13:17) Kay nag-ila nga si Kristo mao ang tinudlong Ulo sa Kristohanong kongregasyon, ang hamtong nga mga Kristohanon maunongon niadtong gitudlo ‘sa pagbantay sa kongregasyon sa Diyos.’ (Buhat 20:28) Pagkadili-angay gayod nga dudahan o daoton ang awtoridad sa tinudlo nga mga ansiyano! Ikaw angay usab nga magmaunongon sa ‘matinumanon ug maalamong ulipon’ ug sa mga instrumento nga gigamit sa pag-apod-apod sa espirituwal nga “pagkaon sa hustong panahon.” (Mateo 24:45) Magmaalisto sa pagbasa ug pagpadapat sa impormasyon nga makaplagan diha sa Ang Bantayanang Torre ug sa kaubang mga publikasyon niini.
Pagpakitag Gugma Pinaagi sa Imong mga Lihok
Misulat si Pablo ngadto sa mga Kristohanon sa Tesalonica: “Ang gugma sa matag usa ug ninyong tanan nagauswag ngadto sa usag usa.” (2 Tesalonica 1:3) Ang pagtubo diha sa gugma maoy hinungdanon gayod nga bahin sa espirituwal nga pagtubo. Si Jesus nag-ingon, sumala sa gitala sa Juan 13:35: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” Ang maong inigsoong gugma dili mailhan pinaagi sa emosyon o pagbati lamang. Nagkomento ang Vine’s Expository Dictionary of Old and New Testament Words: “Ang gugma mailhan lamang pinaagi sa mga lihok nga itukmod niini.” Oo, ikaw mouswag sa pagkahamtong niining paagiha pinaagi sa pagpalihok sa imong gugma!
Pananglitan, sa Roma 15:7, atong mabasa: “Mahinangpong dawata ang usag usa.” Ang usa ka paagi sa pagpakitag gugma mao ang pagtimbaya sa imong mga isigkamagtutuo ug sa mga bag-ohan diha sa mga tigom sa kongregasyon—sa mainiton ug maikagong paagi! Sinatia sila sa personal. Pagpakitag ‘personal nga interes’ sa uban. (Filipos 2:4) Tingali mapakita pa gani nimo ang pagkamaabiabihon ug maimbitar ang lainlaing mga igsoon ngadto sa imong balay. (Buhat 16:14, 15) Ang mga kahuyangan sa uban usahay makasulay sa kalalom sa imong gugma, apan samtang ikaw nagtuon nga “mag-inantosay sa usag usa diha sa gugma,” imong gipasundayag nga ikaw nagakahingkod.—Efeso 4:2.
Paggamit sa Atong mga Kahinguhaan sa Pagpalambo sa Putling Pagsimba
Sa karaang kapanahonan, dili tanan sa katawhan sa Diyos nagtuman sa ilang katungdanan sa pagsuportar sa templo ni Jehova. Busa ang Diyos nagpadalag mga manalagna, sama ni Hageo ug Malaquias, sa pagdasig sa Iyang katawhan maylabot niini. (Hageo 1:2-6; Malaquias 3:10) Ang hamtong nga mga Kristohanon karon malipayong naggamit sa ilang mga kahinguhaan sa pagsuportar sa pagsimba kang Jehova. Sundoga sila pinaagi sa pagsunod sa prinsipyo sa 1 Corinto 16:1, 2, nga regular nga ‘dunay gigahin’ aron iamot ngadto sa kongregasyon ug ngadto sa tibuok-kalibotang buluhaton sa mga Saksi ni Jehova. Ang Pulong sa Diyos nagsaad: “Siya nga nagapugas nga madagayaon magaani usab nga madagayaon.”—2 Corinto 9:6.
Ayawg ibalewala ang ubang kahinguhaan nga imong gipanag-iya, sama sa imong panahon ug kusog. Sulayi nga ‘paliton ang panahon’ gikan sa dili kaayo hinungdanong mga kalihokan. (Efeso 5:15, 16; Filipos 1:10) Tun-i nga mahimong mas episyente sa imong paggamit sa panahon. Ang paghimo niini magpaposible kanimo sa pagpakigbahin sa mga proyekto sa pagmentinar sa Kingdom Hall ug sa ubang susamang mga kalihokan nga nagpasiugda sa pagsimba kang Jehova. Ang paggamit sa imong mga kahinguhaan niining paagiha maghatag ug dugang pamatuod nga ikaw anam-anam nga nahimong hingkod nga Kristohanon.
Pag-uswag Ngadto sa Pagkahamtong!
Ang mga lalaki ug babaye nga hinuon ug daghag nahibaloan, kinsa masibotong mga magsasangyaw, nga walay-ikasaway sa ilang integridad, kinsa maunongon ug mahigugmaon, ug andam sa paghatag ug pisikal ug materyal nga pagpaluyo sa buluhaton sa Gingharian tinuod gayod nga dakong panalangin. Nan, dili ikatingala nga si apostol Pablo nag-awhag: “Karon nga ato nang gibiyaan ang pang-una nga doktrina bahin sa Kristo, manag-uswag kita ngadto sa pagkahamtong”!—Hebreohanon 6:1.
Ikaw ba usa ka hingkod, hamtong nga Kristohanon? O ikaw ba, sa pipila ka paagi, sama gihapon sa usa ka espirituwal nga masuso? (Hebreohanon 5:13) Bisan hain ka man niini, magmadeterminado nga magkugi sa personal nga pagtuon, pagsangyaw, ug pagpakitag gugma ngadto sa imong mga igsoon. Dawata ang bisan unsang tambag ug disiplina nga ihatag kanimo sa mga hamtong. (Proverbio 8:33) Abagaha ang imong bug-os nga lulan sa Kristohanong katungdanan. Uban ang panahon ug paningkamot, ikaw usab “makadangat ngadto sa pagkausa diha sa pagtuo ug diha sa tukmang kahibalo sa Anak sa Diyos, ngadto sa usa ka hingkod nga tawo, ngadto sa sukod sa pamarog nga iya sa kabug-osan sa Kristo.”—Efeso 4:13.
[Blurb sa panid 27]
Ang hingkod nga mga Kristohanon makadugang sa kalig-on sa kongregasyon. Sila dunay positibong epekto sa disposisyon, o nagpatigbabaw nga tinamdan niini
[Mga hulagway sa panid 29]
Ang mga hamtong makaamot sa espiritu sa kongregasyon pinaagi sa pagpakitag interes sa uban