Paghatag nga Malipayon Ingong Payunir
1 “Ang Diyos nahigugma sa malipayong maghahatag.” (2 Cor. 9:7) Ang apostol nga si Pablo mipabili sa pagkamahinatagon ni Jehova ug mipakitag di-madaginotong mga paghago taliwala sa mga taga-Tesalonica. Busa sa ulahi siya misulat: “Kami nahimuot pag-ayo sa paghatag kaninyo . . . sa maayong balita sa Diyos.”—1 Tes. 2:8.
2 Sama ba niana ang atong pagbati maylabot sa pagpaambit niining espirituwal nga bahandi ngadto sa uban? Kon mao, kita ba sa tininuod makatagad sa pagsulod sa regular payunir nga pag-alagad sa dihang mosugod ang bag-ong tuig sa pag-alagad sa Septiyembre?
KON UNSAY IMONG MAHIMO
3 Ang pagsulod sa buluhatong katabang o regular nga payunir dili gayod mahitabo kon ibutang kana sa pamasin. Ang positibong paningkamot nga nagasumikad sa hustong pagkatukbil nga kasingkasing magpatungha sa panalangin ni Jehova. Dad-a ang maong butang ngadto sa pag-ampo kang Jehova. Ibutyag ngadto kaniya ang tinguha sa imong kasingkasing. (1 Juan 5:14; 2 Tes. 3:1) Himoa ang tininuod nga pagtino sa imong mga kahimtang aron makita kon unsang bahina ang mga kausaban himoon aron sa pagkab-ot sa mga kinahanglanon. Hayan ang sayosayo nga pagbangon sa mabuntag o pag-eskedyol sa pagsangyaw sa gabii magpaposible alang kanimo sa pagkab-ot niini.
4 Ang prangkang panaghisgot uban sa ubang mga payunir, sa imong magtatan-aw sa pag-alagad, o sa imong konduktor sa Pagtuon sa Basahon makataganag mapuslanong mga sugyot. (Prov. 15:22; 16:3) Ang mga membro sa pamilya makapalig-on usab, ilabina kon sila maoy kaubanang mga magsisimba. Ang kasinatian sa daghang payunir nga may mga obligasyon sa banay nga pagaatimanon mao nga ang ilang mga membro sa pamilya nagapaluyo kanila ug nagakalipay sa napauswag nga atmospera sa espirituwal nga paagi diha sa panimalay nga nagaresulta sa usa ka membro nga nagapayunir.
PAG-UGMAD SA MAAYONG NAANDAN
5 Ang pagsunod gayod sa timbang nga naandang paagi sa pagpakig-ambit sa dinaliang buluhatong pagwali maoy hinungdanon kaayo. Ang disiplina-kaugalingon, paninguha, ug determinasyon gikinahanglan.—1 Cor. 9:23, 25, 27.
6 Mahimong realistiko sa imong paagi maylabot sa katabang ug regular payunir nga pag-alagad. Dili ka gayod bug-os makakaplag ug maayong mga kahimtang niining daang sistema. Miingon si Jesus nga silang nagauna sa Gingharian makadahom gayod ug mga kasakitan uban sa gisaad nga mga kangaya ug mga panalangin karon, ug “sa umaabot nga mga sistema sa mga butang, kinabuhing walay kataposan.” (Mar. 10:29, 30; Buh. 14:22) Busa maayong sundogon ang pagtuo ug ehemplo niadtong nagapayunir bisan pa sa dili maayong panglawas, limitadong panalapi, ug ubang seryosong mga kakulian. Wala nila himoa nga dakong butang sa ilang kinabuhi ang bisan unsang butang sa daang sistema. (1 Cor. 7:29-31) Sama sa pagkanayon sa ubang mga payunir, sila nakakat-on sa ‘pag-ayom-ayom sa ilang mga suliran’ aron makapayunir.—Itanding 2 Corinto 12:7-10.
7 Ang tanan nga mahinangpong nagapatugbaw gikan sa maayong kasingkasing gibutyag ni Jehova nga malipayon. (Isa. 65:14) Sila nagaani nga madagayaon pinaagig pansulod nga kalinaw ug pagkakontento uban sa napauswag nga pagkamabungahon pinaagig pagtabang sa mga tawo nga makadangat sa kiliran ni Jehova. Ang maong mga panalangin maimo kon dawaton mo ang pagdapit nga magmalipayon sa paghatag ingong katabang o regular nga payunir.—2 Cor. 9:6; Prov. 11:25.