Mga Batan-on—Ugmara ang Malig-ong Relasyon Uban Kang Jehova
1 Makalipay ang mga pulong sa Salmo 24:3-5: “Kinsa ang motungas ngadto sa bukid ni Jehova, ug kinsa ang motindog sa iyang dapit nga balaan? Bisan kinsa nga malinis sa iyang mga kamot ug maputli sa kasingkasing, nga wala magdala sa Akong kalag ngadto sa walay kapuslanan, ni makapanumpa nga malimbongon.” Oo, si Jehova gustong ang iyang suod nga pakiglabot maoy uban kanilang mahinlo ug malinis, kadtong wala maghimog dobleng pagkinabuhi pinaagig malimbongong panumpa. Maoy usa ka kangaya sa pagtan-aw nga panon-panon sa Kristohanong mga batan-on karon nahaom sa maong paghubit. Ang ilang moral nga kaputli nagahimo kanilang matahom sa panan-aw sa Diyos.
2 Sayon ba alang sa mga batan-on nga magmahinlo sa moral karon? Dili. Sa matag adlaw adunay mga hagit nga kinahanglang atubangon. Adunay tibuok-kalibotang epidemya sa mahugaw nga mga impluwensiya ug daotang panggawi. Unsay imong buhaton sa pagpanalipod sa imong kaugalingon? Adunay panginahanglang ugmaron ang malig-ong relasyon uban kang Jehova.
KON UNSAY IMONG KINAHANGLANG BUHATON
3 Sanglit kay ang malig-ong relasyon uban kang Jehova nagalangkit man sa kinasingkasing nga pagpabili sa iyang mga hiyas, gikinahanglan mo nga makat-onan kon unsa gayod ang iyang pagkamao. Nagakinahanglan kinig maikagong pagtuon sa iyang Pulong. Sama kang Timoteo, gikinahanglan mo nga “napakaon sa mga pulong sa pagtuo ug sa maayo kaayong pagtulon-an nga imo gayong gisunod.” (1 Tim. 4:6) Ang maong pagtuon moabag kanimo sa pagtan-aw “sa katahom ni Jehova.” (Sal. 27:4) Ang dugang nimong pagkakat-on bahin kaniya, ikaw man mas suod nga mabutad ngadto kaniya.
4 Ang pag-ugmad sa maong relasyon nagakinahanglan ug panahon ug panlimbasog. (1 Tim. 4:15) Kon ikaw wala pa mabawtismohi, nan panlimbasog padulong sa pahinungod ug bawtismo. Tungod kay duol na kita sa kataposan niining sistemaha, ato gayong puntingon “kon unsang matang sa mga tawo” kita diha sa “mga buhat sa diyosnong pagkamahinalaron.” (2 Ped. 3:11) Kon atong ugmaron ang pagkasuod kang Jehova nga susama sa nabatonan sa usa alang sa gitahod ug gimahal gayong amahan, nan ang atong mga buhat magabanaag niini.—Mal. 1:6.
5 Mga tagnapulo ka libo sa batan-ong mga lalaki ug mga babaye karon ang nagagamit sa ilang kusog ug kadasig sa pagpakig-ambit sa buluhatong pagwali. Sila nagatambong sa mga tigom ug mahinangpon ug andam sa pagkomento. Mga linibo ang nagagamit sa ilang kusog sa pagkabat-on diha sa buluhatong payunir. Ang Proverbio 20:29 nagatawag sa maong kusog nga “ang katahom sa batan-ong mga lalaki.” Bisan tuod ang pag-ugmad sa malig-ong personal nga relasyon uban kang Jehova nagakinahanglan ug panikaysikay, kini takos man sa maong panlimbasog!
6 Daghan kaninyong mga batan-on adunay Kristohanong mga ginikanan nga nagapahimutang sa dalan nga inyong pagasundon. Paminaw sa inyong mga ginikanan nga anaa sa Ginoo. (Efe. 6:1) Sila gayod nahigugma kaninyo ug sila buot nga kamo molampos. Buot nila nga kamo mahiadto sa bag-ong kalibotan, busa mokooperar kanila diha sa mga yugto sa pagtuon nga ilang ginahikay. Himoa ang kamatuoran nga inyoha gayod. Kat-oni kutob gayod sa inyong mahimo bahin kang Jehova, ug kamo magatubo sa paghigugma kaniya ug sa pag-alagad kaniya sa walay kataposan.