Himayaa ang Diyos Ingong Payunir Niining Ting-init
1 Ang atong tinuig nga teksto sa 1989 nagapahinumdom kanato sa atong pribilehiyo ug kaakohan sa pagkahadlok ug paghimaya sa atong dako gayong Maglalalang. Kini nagaingon: “Kahadloki ang Diyos ug ihatag kaniya ang himaya.” (Pin. 14:7) Sa unsang paagi ikahatag ta ang himaya kang Jehova?
2 Nagapakita ang 1 Pedro 2:12 nga ingong resulta sa atong maayo kaayong mga buhat, ang mga tawo nga makapaniid kanato “magahimaya sa Diyos sa adlaw sa iyang pagsusi.” Usab, sa Juan 15:8, si Jesus miingon: “Ang akong Amahan mahimaya niini, nga kamo padayong nagapamunga sa daghang bunga ug nagapamatuod sa inyong kaugalingon nga akong mga tinun-an.” Uyon niini, may mas maayo pa bang paagi sa paghatag ug himaya sa Diyos kay sa pagpamungag daghan sa bunga sa Gingharian diha sa buluhatong payunir?
TUKMANG PANAHON SA PAGPAYUNIR
3 Tino nga ang mga bulang anaa sa unahan kanato maoy haom nga mga panahon diha sa dugang buluhaton sa Gingharian. Sa Marso 22 ang Memoryal pagasaulogon sa tanang katawhan ni Jehova. Kini maoy usa ka panahon sa dihang ang tanan kanato magatinguha sa pagpadayag sa atong dulot nga gugma ug pagpabili sa gibuhat ni Jehova alang kanato pinaagi sa iyang Anak. Walay mas maayong paagi sa pagpakita niana nga apresasyon kay sa paggugol sa tibuok bulan diha sa buluhatong payunir. Ikaw ba magpakig-ambit ingong katabang nga payunir sa Marso? Sa Marso, 1988 diha kitay 6,662 niini nga buluhaton, pero atong mapaneguro nga adunay mas daghan pa niining tuiga.
4 Sa Abril sa kada tuig kita nagapanikaysikay gayod diha sa buluhaton sa Diyos. Niining Abril imong makaplagan nga mas sayon ang pagkahimong oksilyare payunir sanglit kay aduna may lima ka Sabado ug lima ka Domingo sa bulan. Sa miaging Abril diha kitay 18,891 ka oksilyare payunir nga nagtaho, nga kubos diyutay kay sa 1987. Aduna ba ing bisan unsang rason kon nganong dili ta makab-ot ang gidaghanong 25,000 niining buluhatona sa 1989? Kini maoy mga 25% sa total nga mga magmamantala, nga sayon ra nga makab-ot.
5 Sa ubay-ubay nga mga kongregasyon sa miaging tuig, ang bug-os nga lawas sa mga ansiyano, ministeryal nga mga alagad ug ilang mga asawa nagpahimutang ug maayo kaayong panig-ingnan pinaagig pag-oksilyare payunir. Sa miaging Abril sa usa ka kongregasyon dihay 83 nga mga oksilyare payunir, gawas pa sa mga regular payunir! Pagkadakong tinubdan sa kalig-on alang sa tanan diha sa kongregasyon!
6 Ang mga regular payunir usab mahimong dakong tabang sa pagdasig sa buluhatong katabang nga pagpayunir. Kon ang usa ka regular payunir makapalig-on lamang ug duha ka magmamantala nga mahimong katabang nga mga payunir sa Marso, Abril ug Mayo, palandonga lang ang mahimo unyang mga resulta sa tibuok nasod!
7 Among giagda ang tanan sa pagtambong sa miting sa Pebrero 19 alang niadtong nagaplano sa pag-oksilyare payunir. Maghunahunang positibo ug ibutang gayod sa hunahuna ang imong motibo ug tinguha nga “kahadloki ang Diyos ug ihatag kaniya ang himaya.”—Pin. 14:7.