Ang Ganghaan sa Pagpayunir Bukas na ba Karon Alang Kanimo?
TUMONG: 20,000 KA REGULAR PAYUNIR!
1 Ang atong 1999 nga tinuig nga teksto nagpahinumdom kanato nga kita anaa pa gihapon sa “adlaw sa kaluwasan” nga iya ni Jehova. (2 Cor. 6:2) Apan ang iyang adlaw sa kaluwasan matapos na sa dili madugay. Dayon ang iyang “adlaw sa paghukom” mosugod. (2 Ped. 2:9) Samtang si Jehova padayong maglugway sa kahigayonan alang sa kaluwasan sa katawhan, pagkamakapalipay ang pagtan-aw sa padayong nagakadakong gidaghanon nga misanong!
2 Ang katawhan ni Jehova nanglimbasog sa hagit sa pag-abot sa masanongong mga tawo sa dili pa kini ulahi na kaayo. Alang sa daghang magmamantala sa Gingharian, kini nagkahulogang pagsulod sa payunir nga pag-alagad. Ang ganghaan sa pagpayunir bukas na ba karon alang kanimo? Nganong kita nangutana?
3 Pagpabili Gipahayag: Sumala sa gipahibalo diha sa Enero 1999 nga Atong Ministeryo sa Gingharian, ang kinahanglanong oras alang sa regular ug oksilyare nga mga payunir gikunhoran na. Aron makab-ot ang bag-ong kinahanglanon, ang regular nga mga payunir nagkinahanglang mogugol ug 70 ka oras sa ministeryo matag bulan sa total nga 840 ka oras matag tuig sa pag-alagad. Ang oksilyare nga mga payunir mogugol ug 50 ka oras sa pag-alagad matag bulan. Ania ang pipila sa daghang pahayag sa pagpabili nga nadawat ingong resulta niini nga mga pagpasibo:
“Pagkabulahang gasa gikan sa atong langitnong Amahan!”
“Walay mga pulong nga makahubit sa mga pagbati sa kalipay, gugma, ug pasalamat niini nga tagana!”
“Mas mopasayon kini pag-ayo sa pagkab-ot sa among mga eskedyul!”
“Ang among pag-ampo mao nga daghan pa ang mosulod karon sa bug-os-panahong ministeryo ug tagamtamon ang mga panalangin nga nagsumikad sa pag-alagad kang Jehova diha sa dakong paagi.”
4 Samtang kita nagkaduol sa sangkoanan sa adlaw sa kaluwasan nga iya sa Diyos, dayag nga si Jehova nagtinguha sa iyang katawhan sa paghatag ug pangataposan, kusganong singgit sa pagdayeg. Ang gidak-on ug gikusgon niini nga mensahe mapauswag (1) pinaagi sa padayong pagtubo sa gidaghanon sa mga magmamantala sa Gingharian ug (2) pinaagi sa pagtinguha sa matag usa sa pagpauswag kon unsay iyang maarangan sa pagbuhat diha sa pagsangyaw sa Gingharian. Si Jehova, ang usa “nga maoy nagpatubo niini,” nagpalampos sa maong duha ka paagi pinaagi sa pagpanalangin sa mahinangpong espiritu sa tanang midawat sa kaluwasan.—1 Cor. 3:6, 7; Sal. 110:3.
5 Ayawg Sipyata ang Katuyoan Niini: May kalabotan kadto sa adlaw sa kaluwasan nga iya ni Jehova nga si Pablo nagtambag sa kaubang mga Kristohanon: “Nga nagabuhat duyog kaniya [Jehova], kami usab matinuorong nagahangyo kaninyo nga dili dawaton ang dili-takos nga kalulot sa Diyos ug sipyaton ang katuyoan niini.” Dili ta “sipyaton ang katuyoan niini” kon atong tamdon kini ingong “ang panahon nga ilabinang dalawaton” sa pagbuhat alang sa kaluwasan sa uban sa matag kahigayonan. (2 Cor. 6:1, 2) Karong adlawa, ang mga pulong ni Pablo nagpasiugda ug mas dakong pagkadinalian. Ang mga Kristohanon nga nagpadayag ug tim-os nga gugma kang Jehova nag-isip niana nga usa ka pribilehiyo ang pagpakig-ambit sa bug-os kutob sa maarangan diha sa ministeryo nga iyang gipabuhat kanila. Makahimo ka na ba karon sa pagpakig-ambit nga mas bug-os diha sa ministeryo ingong regular payunir?
6 Makataronganon Kini nga Tumong: Sa Pilipinas, maoy atong tumong nga makitang 20,000 ka regular nga mga payunir ang magpatala sa pagka-Septiyembre 1. Kita nagtuo nga kini makataronganon ug makab-ot nga tumong. Nganong kita masaligon kaayo? Sa Abril 1997 atong nakita ang 22,410 ka igsoong lalaki ug babaye nga nag-oksilyare payunir, ug sa Abril 1998 19,593 ang mihimo sa ingon. Ang kadaghanan mitahog 60 ka oras—10 ka oras lamang ang kulang sa bag-ong kinahanglanon sa regular payunir! Bisan kon 4,000 lamang niadtong nag-oksilyre payunir magpalista ingong regular nga mga payunir sa dili pa ang kataposan niini nga tuig sa pag-alagad, kita makasugod sa Septiyembre uban sa 20,000 o kapin pang bug-os-panahong mga payunir!
7 Usa ka Eskedyul ang Gikinahanglan: Ang 70 ka oras nga pag-alagad sa kanataran sa matag bulan daw malisod ba gihapon alang nimo sa pagkab-ot? Tingali ang paghunahuna mahitungod sa 17 ka oras matag semana makatabang. Ginamit ang sampol nga mga eskedyul sa sunod nga panid, sulayi ang pagmugnag usa ka eskedyul sa regular payunir nga mohaom sa imong personal nga mga kahimtang. Sa paghikay niana, pakigsulti sa may kasinatiang mga payunir sa pagkuha sa ilang tambag ug opinyon kon giunsa nila pagbalanse ang payunir nga pag-alagad duyog sa personal ug pamilyahanong mga responsabilidad. Pangutan-a ang inyong magtatan-aw sa sirkito kon giunsa sa mga payunir sa sirkito pag-eskedyul ang ilang kalihokan sa pag-alagad matag semana. Dayon salig kang Jehova nga panalanginan ang imong mga plano sa pagpayunir.—Prov. 16:3.
8 Himoa Kini nga Usa ka Proyekto sa Pamilya: Gitagad na ba ninyo ang paghimo sa pagpayunir nga usa proyekto sa pamilya? Tingali manglingkod mo ingong pamilya ug hisgotan kon sa unsang paagi—uban sa maampingong pagplano ug maayong pagtinabangay—ang usa o duha ka membro sa pamilya mahimong makapayunir. Nga masabtan, ang uban makakaplag nga ang matinud-anong pagtimbangtimbang sa ilang mga kahimtang dili motugot sa regular nga pagpayunir karon dayon. Kon mao, himoa ang pagpayunir ingong tumong sa umaabot. Apan pagsugod sa paghimog mga plano nga mohatod ngadto sa tinong petsa aron mosugod sa pagpayunir. Hayan makaoksilyare payunir ka sa ubay-ubayng panahon sulod sa tuig aron sa inanay makab-ot ang tumong sa regular payunir nga pag-alagad.
9 Ang kapin sa 16,000 ka regular payunir nga sa pagkakaron anaa sa listahan sa Pilipinas adunay lainlaing mga kahimtang. Dili ang tanan anaa sa maayo kaayong panglawas, ug ang kadaghanan adunay pamilyahanon ug pinansiyal nga mga obligasyon. Kapin sa 3,600 ka payunir ang lapas na sa edad 50, ug mga 2,800 kanila ang lapas sa edad 65. Mga 1,000 ang 20 anyos ang pangedaron o mas bata pa. Gibanabana nga un-kuwarto sa tanang payunir maoy mga igsoong lalaki, daghan kanilang adunay pamilyahanon ug kongregasyonal nga mga responsabilidad. Ang tanan niini nila ‘nagpalit sa nahiangayng panahon’ sa pagpayunir, nga sa daghang kahimtang nagkahulogan sa pagkinabuhi sa mas yano apan mas tagbaw nga kinabuhi.—Col. 4:5.
10 Kinahanglan ba Nimong Payanohon? Ang pagpayano sa imong kinabuhi mahimong mao ang yawi nga mag-abli sa ganghaan sa pagpayunir alang nimo. Ang imo bang kinabuhi sama sa usa ka dakong balay nga may wala-kinahanglanang mga lawak ug mga kasangkapan, nga nagkinahanglag daghang panahon, salapi, ug trabaho sa pag-atiman? Kon mao, ang pagpasibo sa mas kasarangan nga mga kahimtang hayan magtugot sa pagpayunir. Makunhoran ba nimo ang gidaghanon sa panahon nga imong gigugol sa sekular nga trabaho? Makapalit ka ba ug panahon gikan sa di-kinahanglanong kalihokan o makapakitag mas dakong pagkatimbang sa gidaghanon sa panahong gigugol sa paglulinghayaw?
11 Ang Bibliya, sa 1 Timoteo 6:8, nagtambag kanato: “Nga may makaon ug ikasapot, kita makontento na niining mga butanga.” Ang pagkakontento sa diyutay mao ang hinungdanong butang sa pagbuhat sa ato gayong maarangan diha sa pag-alagad kang Jehova ug maghimo niining mas sayon sa pag-una sa espirituwal nga mga interes. (Mat. 6:22, 33) Sa panid 104 sa 1998 Yearbook sa taho sa Hapon, ubay-ubay nga mga sugyot ang gihatag kon nganong adunay maayong espiritu sa pagpayunir sa maong nasod. Tagda ang usa: “Kasagarang tinuod nga ang mga puy-anang Hapon kasarangan kaayo, busa diyutayng panahon ang gikinahanglan sa pag-atiman, ug sa kadaghanang bahin, ang mga kinabuhi sa naandan gipadayong yano.” Dili ba kana ang paninugdang kahulogan sa 1 Timoteo 6:8?
12 Sa tibuok kalibotan, ang mga alagad sa Diyos nagsangyaw sa maayong balita nga may kanunayng-nagauswag nga gikusgon sa dili pa ang adlaw sa kaluwasan nga iya ni Jehova matapos. Nga dalayegon, sa miaging tuig ang aberids nga duolan sa 700,000 miambit sa pipila ka matang sa payunir nga pag-alagad matag bulan. Makapasibo ka ba sa imong kinabuhi aron makaduyog kanila? Among gidapit ka nga sa maampingon ug mainampoon susiha ang imong mga kahimtang samtang tubagon mo ang pangutana: “Ang ganghaan sa pagpayunir bukas na ba karon alang kanimo?”
[Blurb sa panid 4]
Sampol nga mga Eskedyul sa Regular Payunir
Gikinahanglan: 17 ka oras matag semana
Usa ka Adlaw sa Semana ug ang Hinapos sa Semana
Adlaw Oras
Biyernes 8
Sabado 6
Dominggo 3
Total nga Oras: 17
Duha ka Adlaw sa Semana ug Sabado
Adlaw Oras
Martes 7
Huwebes 7
Sabado 3
Total nga Oras: 17
Tulo ka Adlaw sa Semana ug Dominggo
Adlaw Oras
Lunes 5
Miyerkoles 5
Biyernes 5
Dominggo 2
Total nga Oras: 17
Duha ka Gabii ug ang Hinapos sa Semana
Adlaw Oras
Lunes 3
Miyerkoles 3
Sabado 8
Dominggo 3
Total nga Oras: 17
Paghimo ug Imong Kaugalingong Eskedyul sa Regular Payunir
Adlaw Oras
Lunes
Martes
Miyerkoles
Huwebes
Biyernes
Sabado
Dominggo
Total nga Oras: 17