Atong Mahimo ang Gikinahanglan ni Jehova Kanato
1. Unsang mga pagbati ang kinahanglan natong pakigbisogan usahay, ug ngano?
1 Ang pagsunod sa mga balaod ug mga prinsipyo ni Jehova mao ang labing maayong paagi sa kinabuhi karon, ug kini motabang kanato sa pagpahilunag maayong pundasyon alang sa dumalayong kaugmaon. (Sal. 19:7-11; 1 Tim. 6:19) Apan, ang kalibotan ni Satanas nagpit-os pag-ayo kanato. Ang atong di-hingpit nga unod nakapasamot sa maong suliran. Sa pagpaningkamot sa pagtuman sa atong Kasulatanhong mga kaakohan, kita tingali usahay mibating nabug-atan. (Sal. 40:12; 55:1-8) Maghunahuna pa gani kita kon mahimo ba kaha nato ang tanang gikinahanglan ni Jehova kanato. Sa maong mga panahon, unsay makatabang kanato aron mahuptan kanunay ang atong espirituwal nga pagkatimbang?
2. Sa unsang paagi si Jehova makataronganon bahin sa iyang gikinahanglan kanato?
2 Ang mga Sugo ni Jehova Dili Mabug-at: Si Jehova dili gayod mangayog di-makataronganong mga kinahanglanon gikan kanato. Ang iyang mga sugo dili mabug-at kondili maoy alang sa atong kaayohan. (Deut. 10:12, 13; 1 Juan 5:3) Iyang giila ang atong tawhanong mga kahuyangan, “nga nahinumdom nga kita abog.” (Sal. 103:13, 14) Ang Diyos mapuangorong nagadawat sa atong kinamaayohang mga paningkamot sa pag-alagad kaniya, bisan tuod kini limitado tungod sa atong mga kahimtang. (Lev. 5:7, 11; Mar. 14:8) Siya nagdapit kanato sa pagtugyan sa atong mga palas-anon ngadto kaniya, ug siya nagpasalig kanato nga tabangan niya kita nga magpabiling magmatinumanon.—Sal. 55:22; 1 Cor. 10:13.
3. Sa unsang paagi si Jehova nagpalig-on kanato aron makalahutay?
3 Ang Panginahanglan sa Paglahutay: Ang mga asoy sa Bibliya bahin sa mga maghuhupot sa integridad sama kang Elias, Jeremias, ug Pablo nagpakita nga gikinahanglan ang paglahutay. (Heb. 10:36) Si Jehova nagpalig-on kanila sa mga panahon sa kalisdanan ug kahigawad. (1 Hari 19:14-18; Jer. 20:7-11; 2 Cor. 1:8-11) Ug kita nadasig pinaagi sa pagkamaunongon sa atong mga igsoon sa modernong mga panahon. (1 Ped. 5:9) Ang pagpamalandong sa maong mga panig-ingnan makatabang kanato nga dili mahigawad.
4. Nganong hinungdanon nga hinumdoman kanunay ang mga saad sa Diyos?
4 Ang paglaom sa mga saad sa Diyos maoy usa ka “angkla sa kalag.” (Heb. 6:19) Kini nagpalihok kang Abraham ug Sara sa pagdawat sa hangyo ni Jehova sa pagbiya sa ilang pinuy-anan ug ‘mopuyo ingong mga langyaw diha sa yutang saad.’ Kini nagpalig-on kang Moises sa pagbarog nga way-kokahadlok dapig sa matuod nga pagsimba. Kini nagpalig-on kang Jesus sa paglahutay sa sakitanang estaka. (Heb. 11:8-10, 13, 24-26; 12:2, 3) Ang paghupot sa saad sa Diyos bahin sa usa ka matarong nga bag-ong kalibotan nga buhi diha sa atong kasingkasing motabang usab kanato nga magpabiling lig-on.—2 Ped. 3:11-13.
5. Nganong makapadasig ang pagpalandong sa atong nangaging mga buhat sa pagkamaunongon?
5 Ang paghinumdom sa atong nangaging mga buhat sa pagkamaunongon, pagsakripisyo-sa-kaugalingon, ug kaisog makapadasig usab kanato diha sa atong pag-alagad. (Heb. 10:32-34) Kini magpahinumdom kanato sa kalipay nga atong nasinatian sa dihang gihatag nato kang Jehova kon unsay iyang gikinahanglan kanato—ang atong tibuok-kalag nga debosyon.—Mat. 22:37.