Tabang Para sa mga Babaye nga Ginaabuso

Mao nay giingon sa introduksiyon sa jw.org nga artikulong “Pagtratar sa mga Babaye—Ang Giingon sa Bibliya.” Naay link sa tumoy niana nga artikulo aron ma-download nimo ang PDF nga bersiyon, nga puwede nimong i-print ug pil-on aron mahimong upat ka panid nga tract. Usa ka sister sa United States nga ginganlag Stacy miingon: “Gi-print nako ni, ug uban sa usa ka sister, amo ning gidala sa duol nga pasilidad nga dangpanan sa mga babayeng ginaabuso.”

Usa sa mga nagtrabaho didto ang mihangyog dugang nga mga kopya sa tract aron iyang ipanghatag sa mga babaye nga midangop sa maong pasilidad. Tungod ana, naghatod silag 40 pa ka kopya niini ug 30 ka jw.org nga contact card. Sa ulahi, ang nagdumala sa pasilidad mihangyo sa mga sister kon puwede ba nilang i-demo kon unsay ginahimo dihang mag-Bible study, aron makita ni sa mga babaye.

Naa pay laing pasilidad nga giadtoan si Stacy ug ang duha pa ka sister. Nakahatag sila didtog lima ka kopya sa tract, ug gihangyo sila nga magdalag dugang kopya sa sunod nilang pagbalik. Ang usa sa mga nagtrabaho didto miingon, “Kini nga basahon makatabang gyod sa mga babaye dinhi.” Miingon pod siya, “Gikinahanglan namo ni.” Sa ulahi, ilang gi-demo kon unsaon paghimo ang pagtuon sa Bibliya, ug naay mga babaye nga miadto aron motan-aw. Duha ka babaye ang miingon nga gusto silang motambong sa sunod nga weekend nga tigom sa Kingdom Hall.

Si Stacy miingon: “Wala mi magdahom nga ingon adto sila ka lipay nga makadawat niining makapahupay nga artikulo, nga among gi-print ug gipilo aron mahimong tract. Nindot ni nga paagi aron masangyaw ang mensahe sa Gingharian ngadto sa mga babaye nga giabuso. Natandog gyod mi sa ilang reaksiyon, ug eksayted ming makita kon unsaon pagpanalangin ni Jehova ang among paningkamot nga padayon pa silang masangyawan sa maayong balita.”