Kalinaw, Kasegurohan, ug ang ‘Larawan sa Mananap’
“Ug iya akong gidala sa gahom sa espiritu ngadto sa kamingawan. Ug nakita ko ang usa ka babaye nga nagkabayo sa mapintas nga mananap nga mapula nga nalukop sa mga ngalan nga mapasipad-anon ug may pito ka ulo ug pito ka sungay.”—PINADAYAG 17:3.
1. Nganong nalangkit kita sa panan-awon ni Juan sa pito ka ulo, napulo ka sungay nga mananap?
NAKITA ni apostol Juan kining makalilisang nga mananap sa balaang pagkadasig nga panan-awon. Apan dili si Juan lamang ang nakakita niini. Malagmit, ikaw, usab, nakakita niini, o labing menos nakabasa bahin niini sa mga mantalaan. Nakaila ka ba niini?
2, 3. Unsang serye sa mga mananap ang nakita ni Juan sa iyang panan-awon?
2 Sa pagkamatuod, kon atong makita karon kining mananapa, dili kini samag panagway sa pagkabatbat ni Juan nga nakita. Ang nakita ni Juan simboliko sa usa ka butang nga maglungtad “sa adlaw sa Ginoo.” (Pinadayag 1:10) Karon atong nakita ang katumanan niini. Ang mangil-ad nga dagway sa mananap nga nakita ni Juan nagpakita sa panan-aw ni Jehova sa gilarawanan niini—makaluod kini alang Kaniya! Nakita ni Juan sa iyang panan-awon si Satanas nga Yawa nga gitambog sa yuta nga “puno sa dakong kapungot, sanglit nasayod man siya nga hamubo na lamang ang iyang panahon.” (Pinadayag 12:12) Nakita usab niya ang politikal nga mga sistema sa kalibotan ni Satanas nga gilarawan ingong mapintas nga mananap nga adunay pito ka ulo ug napulo ka sungay nga migimaw sa “dagat” sa katawhan. (Pinadayag 13:2; 17:15; Isaias 57:20; Lucas 4:5, 6) Adunay gahom kining mananapa ibabaw sa katawhan, ug ang katawhan napugos sa pagpasakop sa ‘timaan sa mananap’ sa ilang tuong kamot o sa ilang agtang, nga nagpaila sa ilang pagpaluyo niini.—Pinadayag 13:7, 16, 17.
3 Nakakita si Juan sa gihimo samtang naghimo ang mga tawo ug larawan niining mananapa. (Pinadayag 13:14, 15) Kining larawana ang iyang nakita sa ibabaw nga panan-awon nga gibatbat sa Pinadayag kapitulo 17. Kining pito ka ulo, napulo ka sungay nga “larawan” nagdula ug dakong bahin sa umaabot nga mga hitabo; busa maayong atong ilhon kini. Sa unsang paagi mahimo nato kana?
Ang “Larawan” sa Mananap Karon
4, 5. Unsay gilarawanan sa mga ulo sa mananap sa panan-awon?
4 Gihatagan sa usa ka manulonda si Juan ug impormasyon nga makatabang kanato, siya miingon: “Ang pito ka ulo nagkahulogan sa pito ka bukid, nga niini nagalingkod ang babaye. Ug adunay pito ka hari: lima ang napukan, ang usa nagapabilin, ug ang usa wala pa moabot, apan kon moabot na siya magpabilin lamang siya makadiyut.” (Pinadayag 17:9, 10) Ang gihisgotang “mga hari” ug “mga bukid”—diin sa Bibliya gilarawan kanunay sa politikal nga mga gahom—nagpaila nga ang mga ulo sa mananap naglarawan sa mga kagamhanan. (Jeremias 51:25) Hain sa pito ka kagamhanan ang nalangkit?
5 Buweno, lima ang napukan na sa panan-awon ni Juan, ang usa naglungtad pa, ang usa umaabot pa. Sa kasaysayan sa Bibliya, lima ka dagkong imperyo ang milambo, nanglupig sa katawhan sa Diyos, ug dayon napukan una pa sa mga adlaw ni Juan: Ehipto, Asiria, Babilonya, Medo-Persia, ug Gresya. Sa buhi pa si Juan, ang Romanong imperyo ang nagmando. Sa milabay ang mga siglo tapos namatay si Juan, nawala sa esena sa yuta ang Romanong imperyo ingong nangibabawng gahom sa kalibotan ug gipulihan sa imperyo sa Britanya. Sa ulahi ang kasadpang mga koloniya niini nakabaton ug kagawasan ug suod nga nalangkit sa Britanya ug nahimong Anglo-Amerikanong gahom sa kalibotan. Mao kini ang “hari” nga “wala pa moabot” sa mga adlaw ni Juan. Unsay relasyon sa mananap nga nakita ni Juan ug sa pito ka imperyo nga gilarawanan sa ulo niini? “Ikawalo usab siya nga hari, apan nagagikan sa pito.”—Pinadayag 17:11.
6. (a) Unsay kahulogan sa mga sungay sa mananap? (b) Sa unsang paagi nga sila “wala pa makadawat sa gingharian”?
6 Hinumdomi, usab, nga adunay napulo ka sungay ang mananap. Mahitungod niini, ang manulonda miingon: “Ang napulo ka sungay nga imong nakita nagkahulogan sa napulo ka hari, nga wala pa makadawat ug gingharian, apan ilang nadawat ang pagbulot-an ingong mga hari sa sulod sa usa ka takna kauban sa mapintas nga mananap.” (Pinadayag 17:12) Diha sa Bibliya, ang numerong napulo naglarawan sa kabug-osan may kalabotan sa mga butang sa yuta. Busa, kining mga sungaya nagsimbolo sa tanang kagamhananong mga gahom sa tibuok yuta nga nagpaluyo sa mapintas nga mananap sa hamubo nga panahon (“usa ka takna”) sa panahon sa “adlaw sa Ginoo.” Lakip kanila ang ikapitong gahom sa kalibotan, maingon man sa modernong mga kagamhanan nga gikan sa laing unom ka ‘ulo sa mananap,’ bisan ug kining unom dili na mga gahom sa kalibotan. Kining maong “mga hari” wala maglungtad sa mga adlaw ni Juan.a Karon nga may gahom na sila, ilang “gitugyan ang ilang kagahom ug pagbulot-an ngadto sa mapintas nga mananap.”—Pinadayag 17:13.
7, 8. (a) Unsang mananapa ang nakita ni Juan, sumala sa gibatbat sa Pinadayag kapitulo 17? (b) Unsay relasyon niini sa mga ulo ug sa mga sungay?
7 Nailhan na ba nimo ang mananap karon? Oo, sama kini sa “dulumtanang butang nga mopahinabog kalaglagan” nga nagsugod ingong Liga sa Kanasoran ug nga karon naglungtad ingong Hiniusang Kanasoran. (Mateo 24:15; Daniel 12:11) Sa unsang paagi kining organisasyona ‘nagagikan sa ikapitong gahom sa kalibotan’? Sa pagkaagi nga ang tibuok samag-mananap nga organisasyon, sama sa ikawalong gahom, gimugna gikan sa naglungtad nang mga kagamhanan, uban sa Anglo-Amerikanong gahom sa kalibotan ingong iyang dakong tigpaugda ug tigpaluyo.
8 Dugang pa, sa gisultihan sa manulonda si Juan, ang tanang “napulo ka sungay” mihatag sa “kagahom ug pagbulot-an sa mapintas nga mananap.” (Pinadayag 17:3) Sa pagkatinuod, kon walay pagpaluyo sa mga kagamhanan nga gilarawanan sa mga ulo ug sa sungay, walay gahom ang mananap. Ngano? Tungod kay larawan lamang kini. (Pinadayag 13:14) Sama sa tanang mga larawan, kini walay gahom sa iyang kaugalingon. (Isaias 44:14-17) Ang iyang kinabuhi nagagikan sa mga tigpaluyo niini. (Pinadayag 13:15) May mga panahon nga ang pipila kanila mihimog mahukmanong buhat pinaagi sa Hiniusang Kanasoran, ingong pananglitan, sa panahon sa Gubat sa Korea.
9. Sa unsang paagi napalig-on ang atong pag-ila sa mananap?
9 Ang atong pagkaila niining mananapa napalig-on sa pila ka dugang detalye nga gihatag sa manulonda: “Ang mapintas nga mananap nga imong nakita mao ang sa kaniadto, ug dili ang sa karon, ug mao ang molugwa gikan sa bung-aw, ug mopadulong sa pagkalaglag.” (Pinadayag 17:8) Natuman na ang bahin niini. Ang ikaduhang gubat sa kalibotan sa pagkaepektibo nakapatay sa Liga sa Kanasoran. Sa 1942, sa nasabtan sa mga Saksi ni Jehova kining tagnaa sa mas tin-aw pa, ikaingon nga ang Liga nga mananap: “Dili ang sa karon.”b Apan sa 1945 kini ‘milugwa gikan sa bung-aw’ ingong organisasyon sa Hiniusang Kanasoran. Molampos kaha kini sa misyon niini sa pagpatunghag kalinaw ug kasegurohan? Ang tagna nag-ingon dili. Hinunoa, kini “mopadulong sa pagkalaglag.”
Ang Nagkabayo sa Mananap
10, 11. (a) Kinsa ang nagkabayo sa mananap sa panan-awon ni Juan? (b) Sa unsang paagi natuman kining bahina sa panan-awon sa modernong panahon?
10 May namatikdan ka bang laing butang sa mananap? Dihay usa ka “babaye” nga nagkabayo niana. Nailhan siya ingong tibuok kalibotang imperyo sa bakak nga relihiyon, ang “Babilonyang Bantogan, ang inahan sa mga babayeng bigaon ug sa dulumtanang mga butang sa yuta.” (Pinadayag 17:3-5, 15) Ang relihiyon ba sa kalibotan ‘nagkabayo’ sa duha ka organisasyon, nga naningkamot sa paggiya kanila sa ilang dalan? Oo, ilabina sa mga relihiyon sa Kakristiyanohan.
11 Pananglitan, ang magsusulat nga Olandes si Pierre van Paassen nagbatbat sa “usa ka butang nga sama sa relihiyosong kasibot” sa mga hawas sa Protestanteng mga iglesya sa Amerika, Britanya, ug sa mga nasod sa Scandinavia nga mitambong sa mga sesyon sa Liga sa Kanasoran. Sa 1945 ang Pederal nga Konsilyo sa Churches of Christ sa Amerika miingon: “Kami determinado sa pagpaningkamot sa padayong pagpalapad sa makaayo ug mamugnaong mga obra sa Organisasyon sa Hiniusang Kanasoran.” Sa 1965 si Papa Paulo VI mideklarar nga iyang nakita diha sa organisasyon “ang banaag sa mahigugmaon ug superyor nga katuyoan sa Diyos alang sa kauswagan sa tawhanong panimalay sa yuta—usa ka banaag nga niini Atong makita ang mensahi sa Ebanghelyo nga langitnon nga nahimong yutan-on.” Sa pagkatinuod, ang mga lider sa relihiyon naghimo nianang organisasyona nga “nalukop sa mapasipad-ong mga ngalan.”—Pinadayag 17:3; itandi sa Mateo 24:15; Marcos 13:14.
Dili Puwersa sa Kalinaw
12. Unsay relasyon sa mga tigpaluyo sa organisasyon sa Hiniusang Kanasoran ug sa Gingharian sa Diyos?
12 Ang Hiniusang Kanasoran wala makatagamtam ug maayong relasyon sa Gingharian sa Diyos. Sa pagkatinuod, ang mga tigpaluyo niini nagabatok nianang Ginghariana. Gisultihan sa manulonda si Juan: “[Ang napulo ka sungay] magapakiggubat sa Kordero, sanglit, siya man mao ang Ginoo sa mga ginoo ug Hari sa mga hari, dag-on sila sa Kordero. Ug, sila nga mga tinawag ug pinili ug matinumanon uban kaniya mao usay buhaton.” (Pinadayag 17:14) Tinuod sumala sa tagna, ang mga nasod padayong ‘nagapakiggubat sa Kordero’ sa tibuok panahon sa iyang kataposan, nga nakigbatok ug nagalutos niadtong nagalihok ingong mga sinugo sa iyang Gingharian. Apan, ang Kordero, dili madaog, ug maingon man sa iyang mga alagad sa yuta nga nagpadayon sa pagwali sa maayong balita sa Gingharian sa Diyos bisan pa sa mga pagbando, pagbilanggo, ug kamatayon.—Mateo 10:16-18; Juan 16:33; 1 Juan 5:4.
13. Nganong dili gayod mahimong puwersa sa tinuod nga kalinaw ang Hiniusang Kanasoran?
13 Tinuod, ang Hiniusang Kanasoran dili gayod mahimong puwersa sa tinuod nga kalinaw. Ang nagkabayo niini, ang “Babilonyang Bantogan,” mao ang usa sa labing daotang tigmugnag gubat sa kasaysayan, ug siya ‘nahubog sa dugo sa mga balaan ug sa dugo sa mga saksi ni Jesus.” (Pinadayag 17:6) Natuhop ang yuta sa dugo sa mga gubat sa kanasoran nga nagpaluyo nianang organisasyona. (Mateo 24:6, 7) Ug ang gahom nga nagpaluyo kanila, si Satanas nga Yawa, “ang dakong dragon,” dili makigdaiton. (Pinadayag 12:9, 17; 13:2) Dili gayod makatagamtam ang katawhan ug kasegurohan samtang maglungtad pa kining mga linalanga. Kinahanglang paphaon sila.
Ang Hinungdanong mga Lakang Alang sa Kalinaw
14. (a) Sa panan-awon ni Juan, unsay nahitabo sa nagkabayo sa mananap? (b) Sa unsang paagi matuman kini?
14 Ang unang wagtangon mao ang bakak nga relihiyon, sa dili madahom nga paagi. Mao kini ang mahitabo: “Ang napulo ka sungay nga imong nakita, ug ang mapintas nga mananap, mao ang magadumot sa babayeng bigaon ug siya ilang pagalaglagon ug pagahuboan, ug ang iyang unod ilang pagakan-on ug siya ilang pagasunogon pinaagig kalayo.” Pagkadako nga kakurat alang sa katawhan! (Pinadayag 17:16; 18:9-19) Ang malaglagon, nasyonalistikong “mga sungay,” ang prominente sa organisasyon sa Hiniusang Kanasoran, mao ang magalaglag kaniya. Sa pagkatagsaon makapahinumdom kini kanato sa tagna ni Jesus nga “ang dulumtanang mga butang” molaglag sa “Jerusalem”! (Marcos 13:14-20; Lucas 21:20) Apan, samtang ang kanasoran ang magpahamtang niana nga silot, sa tinuod ginatuman lamang nila ang paghukom sa Diyos diha sa “dakong bigaon,” lakip sa Kakristiyanohan. Ang resulta? Ang bakak nga relihiyon “dili na gayod igkita pa.”—Pinadayag 17:1; 18:21.
15, 16. (a)Unsa ang “dakong kasakitan”? (b) Unsay resulta niini? (c) Sa unsang paagi mapugngan si Satanas sa pagdaot sa mga laraw sa kalinaw sa katawhan?
15 Si Jesus miingon nga ang kalaglagan sa Kakristiyanohan maoy pagsugod sa “dakong kasakitan nga ang ingon wala pa mahitabo sukad sa pagkatukod sa kalibotan, ug dili na gayod mahitabo pa pag-usab.” (Mateo 24:15, 21) Samtang magpadayon ang kasakitan, magpakanaog ug silot ang Gingharian sa Diyos sa tanang politikal ug komersiyal nga bahin sa organisasyon ni Satanas. (Daniel 2:44) Karon nakita ni Juan ang Hari nga nagalihok: “Nakita ko nga nabuksan ang langit, ug, tan-awa! usa ka maputing kabayo. Ug ang usa nga naglingkod niini gitawag nga Kasaligan ug Matuod, ug siya magahom ug magapakiggubat sa pagkamatarong.” Magapakiggubat batok kaniya ang politikal nga organisasyon sa yuta lakip ang ‘larawan sa mananap.’ Ang resulta sa gubat? Sa makausa pa, kalaglagan sa magpupukan sa kalinaw!—Pinadayag 19:11, 19-21.
16 Usa na lamang ang mahibiling dakong kaulangan sa kalinaw: si Satanas mismo. Mipadayon si Juan sa pagbatbat sa pagpukan niining dakong kaaway sa katawhan: “Ug unya akong nakita nga gikan sa langit nanaog ang usa ka manulonda nga may dalang yawi ug talikala sa iyang kamot. Ug iyang gidakop ang dragon, ang orihinal nga serpente, nga mao si Satanas nga Yawa, ug gigapos siya sulod sa usa ka libo ka tuig.”—Pinadayag 20:1-3.
Panahon sa Pagpili
17. Unsang mga lakang ang kinahanglang buhaton karon sa mga indibiduwal nga nagtinguhang makakitag tinuod nga kalinaw?
17 Pagkadakong panahon sa kausaban alang sa katawhan! Samtang pagalaglagon ang mga organisasyon ug mga kagamhanan, kon unsay mahitabo sa mga indibiduwal ila na kining kaugalingong pagpili. Sa pagpakitag gugma si Jehova miingon: “Ngadto sa tanang kanasoran kinahanglang iwali una ang maayong balita sa gingharian,” sa dili pa ang dakong kasakitan. (Marcos 13:10) Ang mahigugmaog kalinaw gidapit sa “paggula” sa Babilonyang Bantogan. (Pinadayag 18:4) Kadtong anaa sa Kakristiyanohan giawhag sa ‘pagkalagiw ngadto sa kabukiran.’ (Lucas 21:21) Kadtong magpasakop sa Gingharian sa Diyos kinahanglan maglikay sa ‘timaan sa marka sa mananap.’ (Pinadayag 14:9-12; Juan 17:15, 16) Ang dakong panon sa matinud-anon ug kasingkasing “mogula sa dakong kasakitan.” (Pinadayag 7:9-14) Sa pagkatinuod, dili kinahanglang malaglag ang usa duyog sa sistema ni Satanas.—Proverbio 2:21, 22.
18, 19. (a) Unsay ikasulti bahin sa kon kanus-a magsugod ang dakong kasakitan? (b) Sa unsang paagi nangandam ang mga Kristohanon karon nianang panahona?
18 Kanus-a mahitabo kining makatay-og sa yuta nga mga hitabo? Buweno, ang “maayong balita” madunggan na sa tibuok kalibotan karon. “Ang dulumtanang butang” nagpahimutang na. (Mateo 24:14-16) Sa pagkatinuod, ang ‘larawan sa mananap,’ nga midangat na sa iyang ikaduhang ang-ang sa paglungtad, hapit na karon “mopadulong sa pagkalaglag.” (Pinadayag 17:8) Ang katumanan sa “ilhanan” nagpakita nga kita nagkinabuhi na sa panahon sa presensiya ni Jesus sa 71 ka tuig, sukad sa 1914. (Mateo 24:3) Si Jesus miingon: “Inigkakita ninyo nga mahitabo kining mga butanga, masayran ninyo nga haduol na siya sa mga pultahan. Sa pagkatinuod magaingon ako kaninyo nga dili pa mahanaw kining kaliwatana hangtod nga mahitabo kining mga butanga.” (Mateo 24:33, 34) Busa, ang “dakong kasakitan” haduol na gayod kaayo. Ikasulti ba nato kon unsa na gayod ka duola? Dili karong panahona.
19 Si apostol Pablo nagtagna: “Sa diha ang tawo magakanayon: ‘Kalinaw ug kasegurohan!’ nan moabot kanila ang kalit nga kalaglagan.” (1 Tesalonica 5:3) Busa makurat sa hilabihan ang katawhan sa katibuk-an sa dakong kasakitan. Apan, dili makurat niini ang mga Kristohanon. Sila nasayod nga umaabot kini, ug ilang gisunod ang tambag ni Jesus: “Nan, pagtukaw kamo, sa tanang panahon nga manag-ampo nga makalingkawas kamo sa tanan niining mga butanga nga gitakdang mahitabo.”—Lucas 21:36.
20. Nganong sa karon dili makatino ang mga Kristohanon kon kanus-a gayod moabot ang dakong kasakitan?
20 Bisan pa, dili makasulti sa abante ang mga Kristohanon kon kanus-a gayod moabot ang dakong kasakitan. Wala pa ibutyag ni Jehova “kanang adlawa o taknaa.” (Marcos 13:32; Mateo 24:42) Busa, kon, pananglitan, ideklarar sa Hiniusang Kanasoran ang tuig 1986 nga “Internasyonal nga Tuig sa Kalinaw,” bantayan sa mga Kristohanon ang mga hitabo nga may kaikag. Apan dili sila makasulti sa abante kon kini ba maoy katumanan sa mga pulong ni Pablo nga gikutlo sa ibabaw. Apan, sila hinunoa, mapasalamaton nga gihatagan sila ni Jehova ug pagsabot sa kahulogan sa ‘larawan sa mananap’ ug sa “dulumtanang butang nga mopahinabog kalaglagan.” Busa ilang gilantaw kining organisasyona sama sa paglantaw ni Jehova niini ug dili magpahisalaag sa mga paningkamot niini sa pagpatunghag kalinaw.
21. (a) Unsang kalinaw ang gitagamtam karon sa mga Kristohanon? (b) Unsa ang ilang masaligong ginapaabot?
21 Kadtong nagpabiling “nagtukaw” ug nagpasakop sa ilang kaugalingon sa Gingharian ni Jehova nakatagamtam ug kalinaw bisan karon. Si Jehova, “ang Diyos sa kalinaw,” kanunayng nagauban kanila ug naghatag kanila sa “kalinaw sa Diyos nga labaw sa tanang pagpanabot.” (Filipos 4:7, 9) Dugang pa, nagpaabot sila sa dili halayong panahon sa dihang ang tibuok yuta makatagamtam sa katumanan sa matahom nga tagna ni Isaias: “Ang buhat sa tinuod nga pagkamatarong mahimong kalinaw; ug ang pag-alagad sa tinuod nga pagkamatarong, kalinaw ug kasegurohan sa walay kataposan. Ug ang akong katawhan magapuyo sa usa ka makigdaitong puloy-anan ug sa mga puloy-anan nga puno sa pagsalig ug sa pahulayan nga malinawon.” (Isaias 32:16-18) Kasegurohan kini sa tibuok-yutang sukod. (Isaias 11:9) Ug tinuod kini nga kalinaw tungod kay si Jehova mismo ang magmumugna niini.
[Mga Foonote]
a Ang politikal nga situwasyon karon lahi niadtong sa mga adlaw ni Juan. Diyutay lang ganing membro sa mga nasod sa HK ang naglungtad niadto. Busa, matuod nga ipahayag nga sila “wala makadawat sa gingharian.” Dihay pipila ka eksipsiyon, sama sa Ehipto. Apan bisan niining mga yutaa, ang paagi sa pagdumala dako kaayog kausaban sa nangaging kasiglohan nga tungod niini matuod gihapon ang gipamulong sa manulonda: Ang kagamhanan karon nga nagagahom “wala makadawat sa gingharian” sa mga adlaw ni Juan.
b Samtang ang Gubat sa Kalibotan II nagpadayon sa bug-os niyang kapungot, ang presidente sa Watch Tower Society, sa Septiyembre 20, 1942, mipahayag sa Bag-ong Kalibotang Teokratikong Kombensiyon sa mga Saksi ni Jehova sa pakigpulong “Kalinaw—Molungtad ba Kini?” Dinhi, iyang gipakita gikan sa Pinadayag kapitulo 17 nga, sukwahi sa gilaoman sa kadaghanan, ang Gubat sa Kalibotan II dili matapos sa Armageddon. Una ang ‘mananap sa kalinaw’ kinahanglang mobangon pag-usab gikan sa bung-aw sa pagkawalay kalihokan sa pagmando sa mahulagwayong “usa ka takna” uban sa politikal nga mga gahom.
Makahinumdom Ka Ba?
◻ Unsa ang pila ka timaan sa mananap sa Pinadayag 17?
◻ Unsay gilarawanan niining mananapa?
◻ Nganong kining malarawanong mananap dili gayod makapatunghag kalinaw?
◻ Sa unsang paagi ipatungha sa kataposan sa Gingharian sa Diyos ang kalinaw ug kasegurohan sa katawhan?
◻ Sa unsang paagi makapahimulos ang mga indibiduwal sa pagkahibalo niini?