Mag-Saksi ra Gihapon Ko

RELIHIYOSA kaayo ko ug aktibo sa Simbahang Katoliko. Membro ko sa koro sa simbahan ug tig-ubanan sa mga pari ngadto sa mga baryo diin sila mag-Misa. Dayon, sa 1955 gisultihan ko sa akong igsoong babaye bahin sa Paraiso. Gihatagan ko niyag Bibliya, pulyetong “Kining Maayong Balita sa Gingharian,” ug librong “Pasagdi Ang Diyos Maminatud-on.” Nainteres ko, maong gipangutana nako ang pari kon puwede ba kong mobasag Bibliya. Bisag giingnan ko niya nga makabuang ang pagbasag Bibliya, mibasa gihapon ko.

Pagbalhin nakog puyo sa balay sa akong mga apohan sa Boca Chica, gipangutana ko sa usa ka pari kon nganong wala na ko mosimba. Miingon ko nga akong nadiskobrehan nga daghang doktrina sa simbahan ang wala sa Bibliya. Puwerteng sukoa sa pari. Siya misinghag: “Paminaw ra god, karnero ka nga mibulag sa akong panon.”

“Dili,” mitubag ko, “ikaw ang mibulag gikan sa panon ni Jehova, kay si Jehova ang tag-iya sa mga karnero, dili si bisan kinsa.”

Wala na ko mobalik sa simbahan. Mibalhin kog puyo sa akong igsoon, ug unom lang ka bulan gikan sa akong pagkadungog sa kamatuoran, nagpabawtismo ko ug dayon nagpayunir. Usa ka tuig sa ulahi naminyo ko kang Enrique Glass, nga nag-alagad ingong circuit overseer. Kas-a dihang nagsangyaw mi sa parke sa La Romana, gidakop sa mga polis si Enrique. Dihang gidala siya, migukod ko ug miingon: “Saksi ni Jehova sab ko ug nagsangyaw pod ko. Nganong wa man ko ninyo apilag dakop?” Pero wala gyod ko nila dakpa.

Una pa niana, kadaghan nang napriso si Enrique nga tanantanan mikabat ug pito ug tunga ka tuig. Nianang higayona gisentensiyahan siyag 20 ka bulan. Mobisita ko niya kada Dominggo. Kas-a, gipangutana ko sa kapitan, “Nganong naa man ka diri?”

Mitubag ko, “Gipriso akong bana kay Saksi ni Jehova siya.”

“Bata pa ka ug dunay maayong kaugmaon,” matod niya. “Ayawg usiki imong panahon uban sa mga Saksi ni Jehova!”

“Saksi ni Jehova sab ko,” mitubag ko. “Bisag kapito pa ko ninyo patyon ug kapito pod banhawon, mag-Saksi ra gihapon ko.” Pagkadungog niana, iya kong gipapahawa.

Human gitangtang ang pagdili, kami ni Enrique nag-alagad sa sirkito ug distrito sa daghang tuig. Si Enrique namatay niadtong Marso 8, 2008 ug padayon kong nag-alagad ingong regular payunir.