Pagdayeg ni Jehova Nabatian Diha sa Kapuloan

SA 1969 usa ka misyonaryo sa mga Saksi ni Jehova nakakontak kang Obasan, edaran nang ginang sa panimalay nga deakonesa sa Seventh-Day Adventist Church sa Belau, usa ka matahom nga pundok sa tropikanhong kapuloan sa kasadpanhong Pasipiko. Nasugdan ang senerhanang pagtuon sa Bibliya sa balay, bisag ang misyonaryo naglisodlisod sa pinulongang Palauano.

Usa ka teksto sa Bibliya nga nakapahingangha kang Obasan mao ang Salmo 37:10, 11, diin iyang nabasa nga katuyoan ni Jehova nga ang mga maaghop magapanunod sa yuta ug magpuyo sa kadagaya sa pakigdait. Sa wala madugay iyang nasayrang banhawon ni Jehova bisan ang mga dili-matarong ug hatagan silag higayon nga makabaton ug kinabuhing dayon sa Usa ka Libo ka Tuig nga Pagmando ni Kristo.—Buhat 24:15.

Siya nahibulong pag-ayo sa pagkasayod sa gugma, hustisya ug pagkawalay-pinalabi sa Diyos. Giduaw siya sa mga pangulo sa simbahan sa iyang balay adlaw ug gabii, nga misulay sa pagkombinsir kaniya sa paghunong sa pagtuon sa Bibliya uban sa mga Saksi ni Jehova. Iyang gisukna sila sa mga pangutana bahin sa mga ulohan sa Bibliya pero wala makadawat sa makapatagbawng mga tubag. Usa ka adlaw siya gitawag diha sa simbahan aron manguna sa pag-ampo sa kongregasyon. Siya nasayod nga kon siya moampo kang Jehova, kana makapahinabog dakong panaway gikan sa isigkamembro. Apan kon dili siya moampo kang Jehova, ang iyang pag-ampo mahasupak sa iyang gituohan sa iyang kasingkasing. Busa siya mitindog ug mitumong sa iyang pag-ampo kang Jehova, ug kana sa wala madugay misangko sa pagbulag niya sa simbahan. Siya mikuyog dayon sa mga misyonaryo sa balay-balay.

Ang iyang bana supak sa iyang “bag-ong” relihiyon. Siya mahubog ug manghulga nga moadto sa balay sa misyonaryo ug bangkawon sila. Si Obasan nahinumdom: “Ang akong mga paryente maulaw nga makit-an ako nga magsangyaw sa balay-balay. Kadaghanan sa akong mga higala mibulag kanako, ug, sa paglingi karon, akong naamgohang dili gayod unta ako makapadayon kon wala ang tabang ni Jehova.” Gitabangan siya sa mga misyonaryo sa pagsabot sa Kristohanong prinsipyo sa pagkasakop sa asawa, ug siya mitaho nga tapos sa pagpadapat niana ug paglikay sa tagdugay nga mga pakig-ergo sa iyang bana, “siya mihunong sa pagsupak kanako ug sa kataposan misugod sa pagtuon.”—Efeso 5:22.

Si Obasan nabawtismohan sa 1971 ug anaa sa bug-os-panahong buluhaton sa pagsangyaw sukad sa 1975. Upat ka tawo nga iyang gitunan miuswag sa punto nga nagpahinungod sa ilang mga kinabuhi sa Diyos ug nagpasimbolo niana sa bawtismo sa tubig. Siya mitabang usab sa paghubad sa magasing The Watchtower ug sa ubang basahon gikan sa Ingles ngadto sa iyang nitibong Palauano. Pinaagi sa katawhang sama kang Obasan, ang kasulatan natuman: “Ipahatag nila ang himaya kang Jehova, ug sa kapuloan ipasugilon nila ang iyang pagdayeg.”—Isaias 42:12.