May Kabayaran ang Pagtrabaho!
“DILI ko gusto nga motrabaho ang akong asawa,” miingon ang bana. “Apan kon ‘dili na maarangan ang kahimtang,’ kinahanglan kang magpaigo. Busa misugod siya sa pagtrabaho, ug nakatabang kana ug diyutay.”
Sa tibuok nga kalibotan nanag-ingon ang mga magtiayon nga malisod ang pagkabuhi sa usa ra ka suweldo. Sa Australia, Pransiya, ug Sweden ang gastos sa pagkaon ug pamalay halos midoble tali sa 1975 ug sa 1982. Sa Tinipong Bansa ang gasto sa pagpakaon sa pamilya nga upat misaka gikan sa mga $67 sa usa ka semana sa 1975 ug kapin sa $100 sa 1983! Ang gastos sa pagpanag-iya ug sa pagpadagan ug sakyanan sa Tinipong Bansa halos nahimong triple tali sa 1970 ug sa 1981.
Nagkataas ang makalilisang nga kaihapan. Ug kon dili makaapas ang suweldo sa implasyon (nga maoy kasagarang nahitabo), hayan bation sa mga magtiayon nga usa lamang ang ilang kapilian: Patrabahoon ang asawa. Ang himalitang awtor ug sosyal nga analista si John Naisbitt miingon nga kon magpadayon ang presente nga kiling, “85 porsiento sa kababayen-ang Amerikano managtrabaho, sa tuig 2000.”
Hinunoa, sa kasagaran, ang ikaduhang kinitaan dili gihapon makasulbad sa pinansiyal nga problema. Usa pa, sa kinatibuk-an menos ug suweldo ang mga babaye kay sa mga lalaki.a Tinuod, mosugot na lang ang ubang nangagpas nga mga magtiayon bisan pilay makita sa asawa. Apan, ang mga awtor sa Making It Together as a Two-Career Couple dugang mihisgot kanato: “Ang usa sa makasubong kamatuoran sa kinabuhi mao nga kadaghanan sa duhay-kinitaang mga magtiayon mapakyas sa pagsabot nga bayrag kuwarta ang pagpangitag kuwarta. . . . Gawas kon makaamgo sila sa masakit nga kamatuoran, kasagaran mokiling ang mga magtiayon sa dili-realistikong mga paghandom bahin sa kadakoon sa suweldo nga panggasto kon silang duha pareho nga nagtrabaho.”
Busa kuhaon gikan sa suweldo sa babaye mao ang mga buhis sa kinitaan, gastos sa pag-atiman sa bata, pagsaka sa badyet sa pagkaon (ang duhay-kitang mga magtiayon panagsa rang may panahon sa pagpamalit ug baratilyo ug kanunayng mokaon sa mga restawran o ubang mga kan-anan), transportasyon, besti, ug ubang mga galastohan—ug sagad diyutay na lamang ang mahibilin sa suweldo sa asawa. Maoy hinungdan nga si Joanne, duhay-pinulongan nga sekretarya ug maghuhubad, miundang sa iyang trabaho. Siya miingon: “Ako ug akong bana . . . nakatimbangtimbang nga dili gayod kini takos niini.”
Nakita usab sa mga pamilya nga ang suweldo sa asawa adunay kabayaran usab sa ubang mga paagi. Ug ang uban natingala kon kini takos ba niini.
[Mga footnote]
a Sa Tinipong Bansa ang aberids nga babaye makakitag 59 porsiento sa aberids nga suweldo sa lalaki. Sa Japan 34 porsiento sa mga babaye ang nagtrabaho, apan ang kinitaan sa babaye kapin kun kulang 50 porsiento nga makita sa lalaki. Bisan sa Sweden, diin “ang suweldo sa babaye halos managsama sa suweldo sa lalaki kay sa ubang bahin sa kalibotan,” makakita ang babaye ug mga 80 porsiento sa makita sa mga lalaki.