Ang Malinawong Hunahuna Makapahimsog sa Panglawas

Maapektohan ba ang hunahuna sa lawas? Kini maoy gituohan sa duha ka taga Sweden nga prodyuser sa pelikula. Mihikay silag dokumentaryong pelikula bahin sa sakit sa utok nga ipasalida sa Scandinavia. Sa paglig-on sa ilang punto bahin sa sakit sa kasingkasing, ilang gisentro ang gamayng kaayong baryo sa Roseto, nga nahimutang sa tiilan sa kabukiran sa Pennsylvania.

“Ang akong impresyon mao nga ang mga tawo nga nagpuyo sa Roseto masaligon ug kontento kaayong mga tawo,” miingon ang usa sa mga prodyuser, sumala sa Express sa Easton, Pennsylvania. “Halos malipayon silang tanan, kon itandi sa normal nga mga tawo karon. Mas himsog silag kaisipan. Wala kaayo sila matugaw sa modernong katilingban.”

Balik sa katuigang 1960, gitun-an ni Dr. Stewart Wolf ang paagi sa kinabuhi ug mga batasan sa mga taga Roseto. Iyang nadiskobrehang “ang mga taga Roseto kaniadto mas kubos ug mga atake sa kasingkasing ug ubang nalangkit sa kapit-os nga mga sakit sa panglawas.” “Ang grupo sa pagdukiduki [ni Wolf] nag-ingon nga tungod kini sa kinaraan, suod nga pamilya, binase sa pamilya nga paagi sa kinabuhi.”

Sa 20 ka tuig nga milabay, midangat ug samang konklusyon ang duha ka prodyuser nga taga Sweden. “Among nasayran nga kon magpuyo ang gamayng komunidad sa kinaraang paagi sa Italyano​—magkahiusa sa pagpuyo ug mag-atiman sa kaugalingon”​—himsog ang ilang panglawas. “Apan, kon mobulag sila sa tradisyon sa sinugdanan sa katuigang 60 ug 70, dili sila maayog panglawas.”

Ang medikal nga mga tigdukiduki karon nagpalanog lamang sa kaalam sa kasiglohang sanglitanan sa Bibliya: “Ang kalinaw sa hunahuna makapahimsog sa lawas.”​—Proverbio 14:30, Today’s English Version.