Ang Akong Karera sa Basketbol—Napulihan sa Duha ka Laing Gugma!
SIETE anyos pa akong nakagusto sa basketbol. Kanunay akong mag-adtoan sa tugkaran sa kasilinganan ug mag-itsa-itsa sa bola sa daghang oras sa usa ka adlaw. Sa miabot ako sa akong senyor nga tuig sa hayskol, ang ang akong gitas-on maoy 6ʹ 5 1/2ʹʹ ug nagtimbang ug 185 ka libra. Nianang tuiga nakadaog ang among tem sa titulo sa among dibisyon. Nadawat ako sa pag-eskuyla sa UCLA (University of California sa Los Angeles) nga walay bayad, nagdula ubos ni John Wooden nga mao ang coach, ug duha sa tulo sa akong kataposang tuig didto, nadaog namo ang titulo sa nasod.
Ang akong unang tuig gawas sa kolehiyo, sa 1975, okupado kaayo. Mipirma akog kontrata uban sa Los Angeles Lakers—sa 1.6 ka milyong dolyares o duolduol niana, sa lima ka tuig. Usa ka semana human niana gibaylo ako ngadto sa Milwaukee Bucks. Sa milabay ang usa ka bulan akong gipakaslan si Linda, ug human sa usa ka bulan nagsabak siya.
Buweno, nasayran ko dayon nga lahi kaayo ang pagdula uban sa NBA (National Basketball Association)! Sa UCLA sunodsunod ang among kadaogan sa 88 ka dula, apan ang akong unang tuig sa Milwaukee Bucks napildi kamig 44 ka dula! Magdula ako matag ikaduha ka gabii, batok sa hawod kaayong propesyonal nga mga magdudula. Nagkinahanglan kadtog paningkamot. Imo na kadtong kinabuhi! Ilabina sa tempo sa tingdula, nga magsigeg biyahe—lamyon ka niini! Apan gimahal ko kini?
Apan, sa ulahi, duha ka butang ang mitungha nga mahalon ko—mga butang nga dili magkaangay sa akong karera sa propesyonal nga basketbol.
Mahimong ikaingon nga ang binhi niining pagbinutaray nasabud na balik pa sa 1972 sa akong nahibalag si Linda. Nahigugma dayon ako kaniya. Gibawtismohan siya sa sayo nianang tuiga ingong usa sa mga Saksi ni Jehova apan nahimong dili aktibo. Apan, kanunay niyang hisgotan ang relihiyon.
“Unsay imong hunahuna bahin sa Bibliya?” nangutana siya.
“Maayong libro kana sa mitolohiya,” matud ko.
Gipadako sa debotadong Katoliko, apan karon ania ako sa kolehiyo ug matugoton kaayo ug pilosopo. Wala gayoy tinuorayng diskusyon ug dili magdugay.
Dayon dihay nahitabo sa 1974 nga nakapasulod nako sa Kingdom Hall sa mga Saksi ni Jehova. Dihay usa ka lalaki—si Brian Good ang iyang ngalan—kauban nako sa hayskol. Kontra kaayo ko niya. Matang kadto sa indiganay nga panag-away, mga magkaatbang sa mga dula. Mga Saksi ni Jehova ang iyang mga ginikanan, apan wala siya magtagad sa ilang relihiyon. Migamit siyag mga droga, nagpataas sa buhok, ug salawayon kaayo. Sa milabay ang mga tuig mibisita ako sa balay ni Linda, ug didto si Brian. Minyo na, mubog buhok, nakakurbata, hinlo kaayong tan-awon. Nahimo siyang usa sa mga Saksi ni Jehova.
Sa ulahi siya ug ang iyang asawa nagsangyaw sa bug-os panahon sa Kansas, ug samtang nagmaneho padulong sa usa ka asembliya ang duha namatay sa aksidente. Gihimo ang pakigpulong sa patay diha sa Kingdom Hall. Miadto ako, agig pagtahod kang Brian.
Katingalahan kaayo kadto. Nagbarog didto ang mamumulong nga naghisgot bahin kang Brian nga makita ra unya sa tanan pag-usab. Daw dili siya patay, sumala sa pagkadungog ko niana. Ang iyang pamilya naglingkod sa atubangan nga hilom nga naghilak, apan wala ako batiag kaguol! Tagsaon kadto. Ania kining mamumulong nga naghisgot sa positibong mga butang, ug ako dinhi naglingkod nga nagpalandong: ‘Pagkaanindot niining pakigpulonga! Makita nila pag-usab si Brian, ug maghimo sila niining mga butanga uban kaniya!’
Sa milabay ang usa ka tuig, sa 1975, nagdula ako sa Milwaukee Bucks. Ang usa sa akong kauban si Elmore Smith, gibaylo usab ngadto sa Bucks nianang tuiga. Ug nianang tuiga gibawtismohan siya ingong usa sa mga Saksi ni Jehova! Ang iyang asawa, si Jessica, tulo o upat na ka tuig nga Saksi. Daw ang mga Saksi kalit lamang nanagpamutho sa tanang bahin sa akong kinabuhi! Si Elmore ug ako nahimong suod nga mga higala, sanglit dili kami moinom o moapil-apil sa mga parti. Buweno, gigukod niya ako kanunay sa pagpakigtuon sa Bibliya ug sa pagkuyog sa Kingdom Hall uban kaniya. Dili pa ako andam niini. Sa usa ka adlaw niana human nga nakapraktis—tininuod gayod nga praktis, ug samtang nanglakaw kami ni Elmore sa pasilyo—si Elmore miingon:
“Dave, mohatag ako sa akong unang pakigpulong sa Ministeryong Tunghaang Teokratiko. Gusto kong motambong ka.” Nangigham ako, namalibad, mipauli sa balay—ug lain ang gibati! Sa pagkasunod adlaw sa pagpraktis akong gisultihan si Elmore: “Tan-awa ra, Elmore, pamati ra gud. Pasayloa ako. Isaad ko nimo, nga motambong kami ni Linda sa laing tigom.” Ug, oh, pagkalipay niya niana!
Busa sa ulahi mitambong kami ni Linda sa pakigpulong sa publiko ug sa Pagtuon sa Bantayanang Torre sa Kingdom Hall. Mahigalaon kaayo ang mga Saksi. Apan, ako, wala maikag sa pakigpulong, ug sa pagtuon sa Bantayanang Torre nga naghisgot bahin sa basahon sa Bibliya nga Haggeo o Habacuc. Wala ako masayod kon unsay gihisgotan. Naglingkod ako didto nga naghunahuna, ‘Unsa kini? Nag-unsa ako dinhi?’
Sa ulahi natapos ang yugto sa basketbol ug mipauli kami sa California. Anam-anam nga nagkalayo kami ni Linda. Nabalaka ako sa akong karera. Nagdula ako halos sa tibuok tuig bisan sa daot nga tuhod, ug karon nakita sa X ray ang buak nga tuhod. Ang akong unang tuig sa kontrata sa NBA, nga aduna pay nahibiling upat ka tuig, ug karon ambot kon makadula pa ako! Gieskedyol ang operasyon sa akong tuhod, ug sa misulod ako sa ospital akong gidala ang New World Translation.
“Magdala ka diay ug Bibliya?” nangutana si Linda nga natingala.
“Oo. Usa kini ka maayong libro sa mitolohiya. Gusto kong mobasa niini.”
Nianang gabhiona sa ospital akong gibasa ang daghang kapitulo apan gilaayan sa dihang miabot ako sa taas kaayong seksyon nga nagsubay sa mga kaliwatan. Gibati akog katulogon ug akong gibutang ang libro. Sa pagkasunod buntag malamposong gihimo ang akong operasyon. Miduaw si Linda sa pakigkita kanako, sanglit gisakitan sa hilabihan ug gihatagag pagpalimot—wala akoy kalibotan nga didto siya. Wala siya didto sa nahigmata ako, ug nasuko kaayo ko niadto.
Migawas ako sa ospital sa pipila ka adlaw, ug milabay ang usa ka semanang wala kami magtingganay ni Linda.
Dayon dihay butang nga nahitabo nga nakapauli kanamong duha. Sa usa ka gabii niana mitan-aw akog sine uban sa usa ka higala. The Omen ang among gitan-aw. Usa kadto sa mga salida bahin sa makuyawng sugilanon sa siyensiya. Nalangkit niadto ang mga demonyo. Sa migawas ako niadtong salidaha, nahadlok kaayo ko. Bahin kadto sa anak ni Satanas. Duha ka teksto sa basahon sa Pinadayag ang mikilab sa tabil. Sa gibasa nako kadtong mga tekstoha, nagpalandong ako, ‘Makita kana sa Bibliya? Mahitabo kana?’ Ang usa maoy bahin sa numero sa mananap, nga 666; ang lain maoy bahin sa dakong pagkidlap sa kilat gikan sa usa ka tumoy sa yuta ngadto sa pikas. Nahadlok kaayo ko niana. Sa pagmaneho pauli sa balay, nagpanan-aw ako sa akong likod nahadlok nga luksohan ako sa demonyo.
Misulod ako sa balay, sa among lawak, ug akong gipasiga ang suga. Mga ala 1:30 na kadto sa buntag. Si Linda miingon:
“Nganong imong gipasiga ang suga?”
“Wala akoy kapuslanan, wala akoy kapuslanan.” Giyawyaw ko kini pabalikbalik.
Mibangon si Linda. “Unsay nahitabo, Dave, unsay nahitabo?”
“Nahadlok ako!” Akong gisultihan siya bahin sa salida sa sine.
Mikuha siyag Bibliya, ug nanglingkod kaming duha sa katre. Iyang gibasa ang Mateo 7:13, 14 bahin sa halapad nga dalan padulong sa kalaglagan ug sa hiktin nga dalan padulong sa kinabuhi. Balikbalik niya akong gipasaligan: “Dave, dili ka angay mahadlok kang Satanas. Dili nimo siya kalisangan. Kahadloki si Jehova. Siya ang naghawid sa atong kinabuhi.” Mipadayon siya sa pagbasa, ug sa kalit lamang nahimutang ako sa mangiob nga lawak ug dihay mipasiga sa suga.
Nianang gabhiona wala ako makatulog. Sa pagkasunod buntag milingkod ako sa katre ug nagbasa sa Bibliya. Una, ang Pinadayag, dayon ang Una ug Ikaduhang Timoteo, ug Una ug Ikaduhang Tesalonica, ug Roma. Kadtong tanang gagmayng mga libro. Nagkatin-aw sila alang kanako. Samtang nagbasa ako, nagpalandong ako, ‘Nganong wala ko kini basaha kaniadto? Nganong wala ako magtagad sa pagtan-aw niining mga butanga kaniadto?’ Ingon sa daw gibuksan ni Jehova ang akong kasingkasing.
Nianang gabhiona miduaw ang bayaw ni Linda. Usa siya ka bawtismadong Saksi. Sa upat ka oras gipangutana ko siya, ug iyang gitubag ang tanan gikan sa Bibliya. Walay isyu nga nahimong isyu alang kanako. Walay pag-abunog dugo, walay Trinidad, walay imortalidad sa kalag—ang tanan gipamatud-an sa Bibliya. Natin-awan ako niana. Ingon sa daw ang kahayag misidlak nianang bulana sa Septiyembre 1976. Akong gitawag si Elmore Smith ug ang iyang asawa ug miingon:
“Tagnaa kon unsa?”
“Unsa?”
“Magtuon ako sa Bibliya uban sa mga Saksi!”
Dili sila makatuo niini. Wala gayod magdahom si Elmore niana. Adunay usa lamang ka Saksi ni Jehova sa NBA, karon duha na, ug ang duha sa samang tem!
Gibawtismohan ako sa pagkasunod tuig, sa Agosto 1977. Gimahal ko ang pultahan sa pultahang buluhaton sa pagsangyaw. Sa 1978 nag-auxiliary payoner ako—nga nagkahulogang kab-oton nako ang aberids nga 60 ka oras o kapin pa sa pagsangyaw sa maayong balita sa Gingharian sa Diyos. Mao usab kadtong higayona sa 1977-78 nga yugto nga akong nabatonan ang akong labing maayong tuig sa NBA. Natugaw ako sa panahong makuha sa basketbol gikan sa akong buluhaton sa pagsangyaw! Gimahal ko gihapon ang dulang basketbol, apan gibati ko ug labawng pagmahal sa buluhatong pagsangyaw!
Nahimong suod usab ako sa akong pamilya. Suod na kaayo kami ni Linda karon. Kami adunay dos-anyos nga anak nga babaye, si Crystal. Sa ulahi nga tuig, sa 1979, ang among anak nga si Sean natawo. Napugngan ako sa pagdulag basketbol gumikan sa bali nga dugokan sa akong likod. Masakit kaayo kini, apan usa ka panalangin. Makauban ko kanunay ang akong pamilya kada adlaw, makatambong sa tanang mga tigom, makatuon sa personal, ug makaauxiliary payoner usab. Nianang panahona sa ting-init nga mihimo akog desisyon sulod sa akong kasingkasing—mohunong ako sa akong propesyonal nga basketbol. Akong tiwason ang akong kontrata, apan moretiro ako human sa 1979-80 nga yugto.
Kana ang desisyon nga akong gikinahanglan! Misugod sa pagbalik kanako ang akong kusog, naulian na usab ang akong mga batiis, ug akong nadaog ug balik ang akong posisyon sa pagsugod diha sa tem! Busa, human nga wala makadula sa usa ka tuig, mibalik ako sa grupo sa lima nga labing hawod nga magdudula, ug kanunay akong nagdula. Naapil sa mga sangka ang among tem sa mga mananaog. Kami ang nakadaog sa dibisyon.
Sa milabay ang napulo ka adlaw human sa kataposang dula, miadto ako sa opisina sa tag-iya.
“Dave,” siya miingon, “Libre ka na unya sa kontrata,” ug misugod siya sa paghisgot kanako bahin sa kuwarta. Nahibalo siya nga kon dili mailalom sa kontrata mas daghang kuwarta ang akong makita.
“Jim,” misakga ako, “Mohunong na ako sa pagdula.”
“Unsay buot mong ipasabot, nga dili na ka modula? Dili ka makahimo niana!”
“Himoon ko kana. Ang akong mga tumong, akong mga balor, nausab na, ug magkasumpaki ang basketbol kanila.”
“Apan gimahal nimo ang basketbol!”
“Tinuod kana, gimahal ko ang basketbol.”
“Buweno, hulat makadiyot,” mikatawa siya. “Usa ka na sa mga Saksi ni Jehova, di ba? Nagkinahanglan ang inyong organisasyon ug kuwarta, di ba? Mohatag kamig donasyon sa bahin sa imong kontrata ngadto kanila.”
“Dili,” matud ko, “labaw pa sa pagdonar ug kuwarta ang pagkahimong Saksi. Nagkinahanglan kinig pagtuon, pagtambong sa mga tigom, pagsangyaw sa pultahan sa pultahan. Ang basketbol Jim, nagpalayo kanako gikan niana. Ang unom ka bulang kanunayng pagbiyahe magpalayo kanako gikan niana. Makakuha usab kini sa akong kaakohan sa pamilya, ug hinungdanong bahin usab kana sa pagsimba kang Jehova.”—Deuteronomio 6:6, 7; Efeso 5:25, 28, 33; 6:4.
May komperensiya kami uban sa mga tigmantala sa pagkasunod adlaw. Ang mga pamantalaan sa Milwaukee didto, dihay hawas usab ang mga estasyon sa TV. Maayog komento ang mga artikulo sa Milwaukee. (Tan-awa ang kahon, sa pikas panid.) Apan sa Los Angeles ilang gilarawan ako nga may pagkabuang ug diyutay. ‘Kining relihiyona, kining sektaha, nakahatag kang Dave ug katingad-anang kaisipan, apan mobalik ra siya.’ Maingon-ingon nianang matanga sa pagkasulat.
Makaikag, sa gisibya ang akong paghunong, misugod sa pag-abot ang makadaning mga tanyag. Gipadalhan ako ug mas maayong kontrata sa pagkasunod tuig sa Bucks. Mitawag ang Los Angeles Lakers, nga gusto nilang modula ako kanila. Ilang bayran ang gasto sa akong pagbalhin ngadto sa California ug pangitaan akog balay. Mikontak usab nako ang Seattle. Madanihon kaayo ang tanan. Gimahal ko gihapon ang basketbol, apan karon mas gimahal ko ang akong pamilya ug ang pag-alagad kang Jehova. Akong gibati nga nagpaluyo si Jehova kanako, sa pagtabang kanako sa pagbuntog niadtong mga tanyag nga naglangkit ug milyonmilyong dolyares.—Proverbio 3:13-18; Sofonias 1:18; 1 Juan 2:15-17.
Ug sukad niadto iya akong gipanalanginan. May panahon na ako sa personal nga pagtuon sa Bibliya ug sa pagtambong sa mga tigom. Usa na ako ka ansiano sa kongregasyon, mohatag ug pakigpulong sa publiko, ug kanunayng gigugol ang akong bug-os nga panahon sa ministeryo sa pagsulti sa uban bahin sa maayong balita sa Gingharian ni Jehova ilalom ni Kristo. Kining espirituwal nga kalihokan maoy tuboran sa kalipay. (Mateo 5:3) May panahon na usab ako nga mahiuban sa akong anak nga lalaki ug babaye samtang sila magdako, ug makatabang ako kanila sa matuod nga pagsimba. May panahon na ako karon sa akong asawa ug sa paghupot sa among kaminyoon nga malig-on.
Mangiob ang umaabot alang sa dakong masa sa katawhan ning nukleyar nga katuigan. Apan mahimayaon ang akong paglaom. Mahitungod sa Paraiso nga yuta ilalom sa Gingharian sa Diyos, ang Pinadayag 21:4 nag-ingon: “Ug iyang pagapahiran ang tanang luha gikan sa ilang mga mata, ug ang kamatayon wala na, ni may pagminatay, ni paghilak ni kasakit. Ang unang mga butang miagi na.”
Uban niini nga panalangin nga gikan kang Jehova, gilantaw ko nga dili sakripisyo ang pagsalikway sa akong karera sa basketbol. Ang akong gugma sa akong pamilya ug kang Jehova—kini maoy akong mga kalipay karon. Dugang pa sa akong paglaom sa walay kataposang kinabuhi sa Paraiso nga yuta.
Imong maangkon usab ang samang panalangin kon buot ka. Ang Pinadayag 22:17 nag-ingon: “Paimna sa walay bayad nga tubig nga nagahatag sa kinabuhi ang tanan nga may tinguha.”—Sumala sa giasoy ni David Meyers.
[Blurb sa panid 22]
Ang mga Saksi kalit lamang nga nanagpamutho sa tanang bahin sa akong kinabuhi!
[Blurb sa panid 22]
Nagpalandong ako, ‘Gisulti kana diha sa Bibliya? Mahitabo kana?’
[Blurb sa panid 23]
Nianang ting-init mihimo akog desisyon . . . mohunong na ako sa propesyonal nga basketbol
[Burb sa panid 24]
Misugod pagpangabot ang makadaning mga tanyag
[Kahon sa panid 24]
Ang editor sa mga dula sa Journal sa Milwaukee, si Bill Dwyre, misulat: “Kon palandongon ang pagbalibad ni Meyers sa $500,000 sa usa ka tuig sa pagdulag basketbol aron makasangyaw siya sa pultahan sa pultahan ingong Saksi ni Jehova makalibog sa hunahuna. . . . Apan sa dili pa mohimog konklusyon nga nabuang si Meyers, maayong usisaon siya bahin sa iyang gihimong desisyon. . . .
“Malipay siyang makighisgot sa iyang pamilya—sa iyang asawa, si Linda, ug sa iyang anak nga lalaki ug babaye. Ang kolokabildo bahin sa basketbol [sa iyang mga kadaogan sa mga dula] sa walay langan nga lisoon dayon sa laing ulohan sa pagdayeg sa iyang mga kauban sa tem ug sa paghisgot bahin sa resulta sa mga dula ug sa mga repere. Apan ang kolokabildo bahin sa iyang pamilya, bahin sa mga ulohan sama sa pagkakat-on sa iyang anak nga babaye sa paglakaw o sa paghunong sa iyang asawa sa pagpanabako, makadasig kaniya sa pagpakigsulti.
“‘Nagtuo ang mga tawo nga nabuang ako,’ miingon siya sa Miyerkoles sa gabii, sa milabay ang pipila ka oras human sa iyang komperensiya sa tigmantala. ‘Apan ang akong gustong buhaton mao ang pagpadayon sa mas hinungdanong butang sa akong kinabuhi, sama sa akong pamilya ug sa akong relihiyon.’
“Angay siyang dayegon sa pagbaton ug kaisog sa pagkinahuhi sa iyang relihiyon.”—Mayo 1, 1980.
[Letrato sa panid 25]
Ang akong gugma sa akong pamilya ug kang Jehova—kini maoy akong mga kalipay karon