Nagtigom ang mga Saksi ni Jehova sa Polandiya

● Upat ka kombensiyon sa upat ka siyudad

● Gikan sa 16 ka nasod ang bisitang mga delegado

● Bug-os gidaghanon sa tumatambong maoy 94,134

● Bug-os gidaghanon sa gibawtismohan—3,140

MIABOT sila sa tinagpulo ka libo. Sakay sa mga awto, giabangang mga bus, espesyal nga mga tren, ug dagkong mga ayroplano, sila minghugop ngadto sa Warsaw, Poznań, Katowice, ug Wrocław sa Agosto 1985. Sila miadto aron sa pagtambong sa “Mga Maghuhupot sa Integridad” nga mga Kombensiyon sa mga Saksi ni Jehova.

Ang mga Saksi sa Polandiya sa mga siyudad nga himoan sa kombensiyon andam sa pag-abiabi kanila sa ilang pag-abot. Ilabinang nakita kini diha sa International Airport sa Warsaw, diin ang mga delegado miabot gikan sa kasadpang Uropa, Asia, Amerika del Norte, ug ubang mga dapit. Ilang giabiabi ang ilang mga bisita sa dagkong mga pahiyom ug mga paglamano, ang uban sa paggakos ug daghang mga halok. Didto ang mga maghuhubad aron masayon ang pagsabtanay, apan ang madasigong kainit sa mga pangomosta nakalabang sa tanang babag sa pinulongan. Sa ubang mga kahimtang, gihatagag pungpong sa mga bulak ang mga babaye, ug ang mga bata misugat sa malipayong pag-ingong “Hello!” sa Polako.

Apan, kining malipayong mga pangomosta, maoy purongpurong lamang sa mga semana sa kuging pagtrabaho. Sa gihatag ang malulutong permiso sa mga awtoridad sa Polandiya sa paghimo sa mga kombensiyon, gisugdan ang dakong trabaho aron sa pag-andam kanila.

Mga Trabaho sa Wala pa ang Kombensiyon

Gisugdan ang pagpangitag abtanan alang sa libolibong mga bisita. Sa Warsaw lamang, 11,000 ka hangyog mga abtanan ang miabot. Gisugdan ang pagpangitag mga istadyom nga himoan sa mga kombensiyon. Sila nakit-an, sa Warsaw ug sa Wrocław alang sa mga petsa sa Agosto 16-18, ug sa Poznań ug Katowice (Chorzów) alang sa Agosto 23-25. Apan, ang pagpangitag mga istadyom maoy bahin lamang sa trabaho. Daghang mantalaan nagtaho sa paghago sa mga Saksi sa paghimo sa mga istadyom nga takos nga magamit. Ang usa ka taho miingon:

“Sulod sa lima ka semana mihimo ang mga Saksi ni Jehova ug kuging pagpangandam ug pag-ayo sa Slaski Stadium [dapit sa Chorzów, Katowice]. Toniladang mga basura gihakot sa trak gikan sa istadyom ug sa palibot niini ug daghan pang basura ang gisunog diha mismo sa lugar sa istadyom. Gihabas ang tag-as nga mga sagbot, ug gilimpisahan ang balili sa tugkaran palibot sa istadyom. Ang kampinganan nga nahimong basurahan gilimpiyohan. Ang mga lingkoranan sa grandstand nga may 35 ka gisangkarong kilometro [22 mi] giayo ug gihugasan. Ang 78,000 ka lingkoranan gipintalan. . . . Guba ang pito ka kasilyas. Buak ang mga bildo sa bentana. Nangalangkat ang mga pultahan. Nangatangtang ang mga gripo, nasongsongan ang mga awasan sa hugaw. . . . Mahimong ikaingon nga tinuod nga gasa ang mga Saksi ni Jehova gikan sa langit alang sa tagdumala sa Slaski Stadium, ilabina kay may giplanong bangga sa potbol tali sa Polandiya ug Belgium sa Septiyembre.”

Sa pagkatinuod, 10,500 ka Saksi ang miboluntaryo sa pag-atiman sa ibabaw nga trabaho. Ilang gipintalan usab ang tanang barandilya ug mga pensa, gihinloan ug gipintalan ang nangagubang kasilyas, ug nagtaod ug 132 ka kasilyas nga mapaagasan. Walay mga linyang naghulat, bisan sa mga babaye! Mahitungod sa trabaho diha sa Katowice nga kombensiyon, laing taho sa balita miingon: “Ang total nga gastos sa natapos nga trabaho gibanabanang mitotal ug 12 ka milyong zlotys [$80,000, U.S.].” Ang samang mga pagpangayo gihimo sa tulo ka istadyom.

Nakadayeg ang mga Tumatan-aw

Daghang komento ang gipahayag sa nakapaniid sa mga Saksi: Ang usa ka opisyal sa gobyerno miingon: “Mahusay kaayo ninyo pagkaorganisar ang tanan. Diin kamo nakakuha sa pagbansay sa inyong paghimo niana?” Ang usa ka administrador sa istadyom miingon: “Sulod sa 25 ka tuig na akong nagtrabaho dinhi, ug wala pa ako sukad makakitag sama niini nga kahusay.” Laing manedyer sa istadyom miingon: “Nganong kugihan man kaayo kamo? Buot namong makabaton ug ingon niining mga trabahante!” Ang laing manedyer sa istadyom miingon: “Sa tinuod wala gayod ako magtuo nga maayo kining istadyoma, apan inyong nahimo kini.” Usa ka nakadayeg nga tumatan-aw miingon: “Adunay tagsaong butang nga nagatubod kaninyo!”

Sa natapos ang kombensiyon sa istadyom sa Warsaw, ang usa ka tiggiya sa mga turista miingon ngadto sa pundok sa mga batan-on: “Dugay na kaayong gipasagdan ug hugaw kining istadyoma. Di pa dugay giabangan kini sa mga Saksi ni Jehova alang sa ilang relihiyosong kombensiyon. Karon, tan-awa ang ilang nahimo dinhi! Pagkadako nga kausaban! Kinabubut-on silang mitrabaho. Ikaingon ko, wala sila suweldohi sa pagtrabaho!”

Parehas nga Programa sa Tibuok-yuta

Ang programa sa kombensiyon parehas ra sa gipresentar sa ubang kayutaan, gawas nga kini pinamubo sanglit duha ra man ka adlaw ug tunga ang mga kombensiyon sa Polandiya imbes sa tulo ug tunga ka adlaw. Ang upat ka membro sa Nagamandong Lawas sa mga Saksi ni Jehova—si A. D. Schroeder, M. G. Henschel, T. Jaracz, ug D. Sydlik—mipakigpulong sa matag usa sa upat ka asembliya. Ang ilang mga pakigpulong gihubad sa Polako. Ang mga delegado nga naghawas sa nagkalainlaing kayutaan mipahayag sa mga pangomosta ug mubong mga mensahi, nga gihubad gikan sa Ingles, Pranses, Aleman, ug Sweko ngadto sa Polako, sa kalipay sa mga tumatambong.

Ang usa ka delegado nga gikan sa Denmark mikomento bahin sa pagkabatid sa mga mamumulong nga mga Polako ug espesyal nga gihisgotan ang drama sa Job: “Bisag wala kami makasabot sa pinulongan, nakadayeg kaayo kami sa drama sa Job. Maayo kaayo ang ilang pagkadala. Sanglit pamilyar na namo ang aksiyon, nakatuhog kami sa sugilanon ug wala malisdi sa daghang mga detalye sa pagsultihay uban sa tulo ka ‘higala’; bug-os nga nasentro ang among hunahuna sa kahimtang ug sa mga pagbati. Among nakita ug nadunggan nga tinuod nga may sakit si Job, nga nag-antos siya ug nag-agulo sa kasakit, ug among nadunggan ang pagkawalay batasan sa tulo ka giingong mga higala. Daghan sa istadyom ang nanghilak.”

Sa matag usa sa mga kombensiyon, ang mga pangomosta gikan sa mga pundok sa mga Saksi ni Jehova sa nagkalainlaing mga dapit gibasa ug nakadawat ug masipang pakpak.

Mga Dapit nga Makapainteres

Gipahimuslan sa daghang delegado sa nakalainlaing nasod ang higayon sa pagduaw sa mga dapit nga makapainteres sa Polandiya. Giduaw sa pipila ang yutang natawhan ni Frédéric Chopin ug Marie Curie sa Warsaw. Giduaw sa uban ang siyudad sa turista nga Zakopane, uban sa mga chalet nga estilong mga balay niini ug sa mabulokong shopping centers, ug misakay sa mga chair lift sa tumoy sa matahom nga mga bukid. Sa ilang pagpanaw paingon dinhi ug sa ubang mga dapit nga talan-awon, nakita sa mga delegado ang matahom nga lugar sa banika sa Polandiya sa panahon sa ting-ani, sa kaumahan diin nagtrabaho ang mga pamilya—batan-on ug tigulang, mga lalaki ug babaye—nagkausang nagtrabaho ang tanan.

Ilabinang makaikag mao ang kampong konsentrasyon kaniadto sa Nazi diha sa Oświȩcim (Auschwitz). Ang usa ka grupo sa mga Saksi gikuyogan ni Josef sa kampo, nga usa ka binilanggo niadto sa Auschwitz. Makalilisang ug makasubo nga pagpasiyo kadto. Dihay mga bitayan, ang pader diin dinhi daghang gipamosil nga mga binilanggo, ang mga hudnong sunogan, mga hulagway—magpangutana ka kanunay kon tinuod ba kining tanan. Dili kay nagduhaduha ka niini, kondili ang pagkangilngig maoy nakapahimo niining dili-katuohan! Diha ang lainlaing de-kolor nga mga trayanggulo sa pagpaila sa nagkalainlaing matang sa mga binilanggo—usa lamang ka matang alang sa relihiyosong hinungdan, ang mga estudyante sa Bibliya (mga Saksi ni Jehova) nga nagsul-ob ug lilang trayanggulo.

Apan uban kang Josef nga maoy miggiya sa pagtan-aw, kadto nahimong makapalig-ong kasinatian. Iyang gihinugilon ang iyang kaagi. Miapil siya sa politika, apan ang iyang amahan ug inahan nahimong mga Saksi. Sa namatay ang iyang amahan ug diha sa pakigpulong sa patay sa Saksi, nakadayeg si Josef nga daghang miabot ug sa gugma nga iyang nakita taliwala sa mga Saksi. Mihunong siya sa iyang kalihokan sa politika apan wala mahimong Saksi. Sa ulahi si Josef, ang iyang inahan, ug ang iyang igsoong babaye gibanlod sa Auschwitz.

Ang iyang inahan gipadala sa hudno. Ang iyang igsoong babaye migawas nga dili maayog panglawas. Siya gipadala sa kampo sa Alemanya. Didto iyang nahibalag ang usa ka Saksi nga nakigsulti kaniya, ug siya nahimong usa sa mga Saksi ni Jehova. Sa pagkatinuod, lakip siya niadtong iladong marta sa kamatayon. (Detalyadong giasoy kini sa artikulong “Integrity Outlives Concentration Camp,” sa Septiyembre 1, 1945, Watchtower.)

Sa pagpasiyo sa Auschwitz, gitudlo ni Josef kanila ang iyang lawak, ang mga lawak nga gibalhogan sa iyang inahan, ug sa mga hudno nga didto gisunog ang iyang inahan. Apan ang iyang tinamdan maoy sulondan alang sa tanan. Walay kasilag. Kadto maoy dapit diin ang integridad sa Diyos nagmadaogon, diin daghang Saksi nangamatayng matinumanon kang Jehova. Ang pagpasiyo uban kaniya nahisamang nakauban sa usa ka masibotong Saksi sa malisod nga teritoryo. Ang usa ka Saksi diha sa grupo mipalit ug mga postcard sa babaye. Si Josef nangutana: “Imo ba siyang gisangyawan?” “Wala.” Dihadiha miadto siya ug gisangyawan ang babaye. Sa tinuod, ang pagtan-aw sa kampong konsentrasyon sa Auschwitz diin dinhi nahimo ang makalilisang nga mga buhat makapasubo kaayo, apan ang paglibot sa pagtan-aw uban kang Josef nahimong makadasig nga eksperyensiya.

Gipahayag ang Apresasyon

Gipabilhan sa mga Saksi ni Jehova ang paghimo niining mga kombensiyon sa Polandiya. Ang mga opisyales nga mga Polako ug mga manedyer sa mga istadyom matinabangon ug maabiabihon sa mga kombensiyonista. Nakadugang kini sa kalamposan ug kalipay niining okasyona. Dugang pa, sa matag siyudad nga gihimoan sa kombensiyon, ang pangunang mga mantalaan mihatag mga taho, ug dihay pamalita sa radyo ug sa telebisyon.

Apan ang tagsaong impresyon nga gidala sa mopauliayng mga delegado uban kanila, mao ang pagkamaabiabihon sa mga Saksi nga Polako. Ang ilang espiritu sa kalipay ug kadasig misuhop sa mga kombensiyon. Ilang gipakigbahin ang ilang pagkaon sa nagaduawng mga delegado. Ilang gidapit sila sa ilang mga balay. Nangluto sila ug mga pagkaon alang kanila, lakip sa pila ka kinaham nga mga pagkaon sa Polandiya. Ang ilang mainit nga mga pahiyom ug mga gakos ug mga halok magpabilin sa panumdoman sa mga delegado sa ilang nasod.

Tingali ang mahigugmaong mga pagbati sa mga Saksi sa Polandiya labing makita ug ikapahayag sa mosunod kinasingkasing nga ekspresyon nga gipamulong human gilayon sa panapos nga pakigpulong sa mga kombensiyon sa Katowice ug Warsaw. Gihubad kini sa Ingles ug sa Aleman ug gidawat sa mainitong pakpak.

Minahal nga mga igsoong lalaki ug babaye gikan sa labing menos 16 ka nasod sa kalibotan!

Inyong giantos ang daghang kalisdanan ug mga pagsakripisyo aron makabahin sa among kalipay. Tinuod nga mga higala lamang ang makahimo niini.

Daghan kaninyo wala makasabot sa sinultihan dinhi, apan bisan pa niini, kami masaligon nga kamo nasuphan sa espiritu niining kombensiyona.

Nahiusa kita sa pagsimba sa atong dakong Diyos, si Jehova, ug sa atong paghigugma kaniya ug sa usag usa.

Kitang tanan nagasangyaw sa samang balita—ang maayong balita sa Gingharian. Palihog sultihi ang among mga higala nga kami tinuod nga nahigugma sa bug-os nga panag-uban sa kaigsoonan ug nga kami determinado sa paghupot sa among integridad kang Jehova hangtod sa kataposan.

Sumala sa nahisgotan na sa mamumulong sa iyang panapos nga pakigpulong, kami malipayon sa inyong pagdala sa among gugma ngadto sa mga igsoon sa inyong kaugalingong mga nasod.

Kami malipayon ug mapasalamaton nga nahiusa uban kaninyo ingong mga maghuhupot sa integridad sa tibuok-yutang panag-igsoonay.

Gipasalamatan namo kamong tanan.

Sa Domingo, Septiyembre 29, misibya ang radyo sa Polandiya ug 30-minutos nga programa bahin sa mga kombensiyon, lakip sa madasigong pag-awit sa alawiton sa Gingharian nga nag-ulohang “Tan-awa ang Panon ni Jehova.” Tinuod, kining serye sa mga kombensiyon sa Polandiya naghatag laing malanog nga tubag sa pangutana nga gibangon sa Genesis 18:14: “Adunay bay butang nga tagsaon ra kaayo kang Jehova?”

[Kahon sa panid 14]

KAMI DILI GAYOD MALIMOT

Kami dili gayod malimot sa inyong pagduaw sa Polandiya,

Mga igsoong lalaki ug babaye sa daghang yuta.

Ang lamesa ni Jehova nagaawas ug dagaya, Ingong usa ka malipayong katawhan kita nahiusa.

Kami dili gayod malimot niini.

Tinuod, suliran ang pinulongan,

Apan ang gugma nakakitag paagi sa pag-ingon,

“Gimahal namo kamo.”

Kami dili gayod malimot niini.

Sa moabot na ang adlaw sa bag-ong sistema,

Walay duhaduha, magpanan-aw kita sa nangagi uban sa mga luha,

Sa paghinumdom, sa kinasingkasing kita nagkakita.

Minahal nga mga igsoon, kami dili gayod malimot niini.

—Gisulat sa usa ka Polakong Saksi

[Letrato sa panid 9]

Nanglimpiyo sa tugkaran sa istadyom sa Posnań

[Mga Letrato sa panid 10, 11]

Matahom nga talan-awon sa gihimoan sa 1985 nga kombensiyon sa Warsaw

[Mga Letrato sa panid 12]

Bawtismo sa kombensiyon sa Warsaw

Ang pipila sa Hapones nga mga delegado sa mga kombensiyon

Si Albert Schroeder mipakigpulong sa 18,200 diha sa KS Warta Stadium, sa Poznań, Polandiya