Ang Polandiya Miabiabi sa mga Saksi ni Jehova

SA MIAGING Agosto 1989, usa ka talagsaong pasundayag sa internasyonal nga kalinaw ug panaghiusa ang nahitabo sa Polandiya. Ang okasyon mao ang “Diyosnong Debosyon” nga mga Kombensiyon sa mga Saksi ni Jehova nga gihimo sa mga siyudad sa Polandiya sa Poznan ug Katowice, sa Agosto 4-6, ug sa Warsaw, Agosto 11-13.

Unsay nagpahimo niining mga kombensiyona nga linain kaayo? Sa modernong panahon ang mga Saksi ni Jehova may mga kombensiyon nga mas dako, ug miabot ug daghang adlaw, ug gihawasan sa mas daghang nasod. Apan kapin sa 166,000 ka tawo ang mosulti kanimo nga talagsa ra nga nakapukaw ug dugang kadasig ang mga kombensiyon, nga nakapadayag ug Kristohanong panaghiusa, o gitiman-an sa daghan kinabubut-ong mga pahayag sa Kristohanong gugma.

‘Ang Bag-ong Kalibotan Lang ang Mas Maayo’

Ang mga delegado gihawasan sa labing menos sa 37 ka nasod, apil sa mga indibiduwal nga gikan sa daghan pang uban. Ang lima ka membro sa Nagamandong Lawas sa mga Saksi ni Jehova nakigbahin sa programa. Kapin sa 12,000 ka dinapit ang miabot gikan sa Kasadpang Uropa, sa Tinipong Bansa, ug sa Japan, nga nagpahimo niini nga mao ang labing dakong grupo sa internasyonal nga mga magpapanaw nga naatiman sukad sa Polandiya.

Libolibo ang miabot pa gikan sa Unyong Sobyet ug sa Czechoslovakia ug sa ubang mga nasod sa Sidlakang Uropa. Kini mao ang unang kombensiyon sukad alang sa kadaghanan niining mga delegado, bisag ang kadaghanan maoy mga Saksi na sulod sa 30 o kapin pang mga katuigan. Ang mga pagbati niining mga tawhana nga sa unang higayon nakahimo sa pakigtigom uban sa ilang Kristohanong mga igsoon maayo kaayong pagkapahayag sa usa ka delegado gikan sa Kazakhstan, Unyong Sobyet, kinsa miingon:

“Dagay na kaayong katuigan nga naghulat kami niining adlawa, ug karon kami ania na gayod dinhi niining internasyonal nga kombensiyon. Nalisdan kami sa pagsabot niining tanan ug sa pagkuha niining tanan. Kini daw samag usa ka damgo. Lisod tukibon sa mga pulong ang tanan nga among nakita ug nadungog. Sa dihang among nakita ang dako, pormag-panaksan nga istadyom nga puno sa mga tawo ug nakadungog sa musika, napuno sa mga luha ang among mga mata. Ug ang pag-ampo—samtang kaming tanan walay-lihok nga nagkahiusa—nakapakurog kanamo. Hilabihan kaayo kini ka solemne ug giuyonan sa tanan. Kining kombensiyon sa Warsaw matahom kaayo ug dakong okasyon nga ang bag-ong kalibotan mao lang ang mas maayo. Among hinumdoman gayod kanunay kining matahom nga mga adlaw.”

Sa nakaatubang sa unang higayon diha sa mga kombensiyon sa tinagpulo ka libong kaubang mga Saksi, daghan niining mga bisitaha makita nga natandog gayod. Sa Warsaw sila misugod sa pagpakpak nga milukop sa istadyom kapin sa lima ka minutos. Ang delegado sa Kasadpang Uropa miingon: “Niadtong yugtoa, wala kaayoy nagtagad sa mainit nga klima o sa gahi nga mga bangko o sa pagpauli sa humok nga mga lingkoranan. Sila gusto pag dugang instruksiyon ug mahigugmaong pag-ubanay.”

Kada adlaw may mga taho nga gihatag sa langyaw nga mga delegado, kinsa nag-asoy ug mga eksperyensiya sa ilang kaugalingong mga nasod. Ang kataposan sa 24 sa maong mga taho gitagana sa Warsaw alang sa usa ka delegado gikan sa Unyong Sobyet. “Dili namo ikahubit sa mga pulong sa pagpahayag sa among kalipay nga kami makauban sa inyong taliwala,” siya misugod. “Kami mapasalamaton kaayo nga daghan kaayo kanamo nakaanhi dinhi ug nga kami maabiabihon kaayong gidawat ninyo. Nalipay usab kami nga personal nga nakahimamat sa kadaghanan kaninyo mga igsoon. Ang uban kanamo gikan pa sa halayo kaayong mga dapit, sama sa Vladivostok sa kabaybayonan sa Dagat Pasipiko, nga sakyon ug tren sa unom ka adlaw. Ang uban kanamo nagkaproblema sa pagkuhag mga tiket tungod kay daghan kaayo ang gustong molakaw sa samang higayon, ug diyutayng mga lingkoranan lamang ang mabatonan. Apan pinaagi sa tabang ni Jehova, nakaabot kami.”

Sa tukma, diha sa iyang pangataposang mga komento sa Dominggo, gipasalamatan sa usa sa membro sa Nagamandong Lawas ang mga kagamhanan sa Kasadpang Uropa sa pagtugot ug daghan kaayong mga Saksi gikan sa ilang mga nasod sa pagtambong sa mga kombensiyon.

Usa ka Nagkahiusang Panag-igsoonay

Sa naghubit sa iyang mga eksperyensiya diha sa mga kombensiyon sa Polandiya, ang usa ka Saksi miingon: “Kadto nahisama sa Babel nga baliskad.” Samtang ang kalibganan ug pagkawalay-panaghiusa ang misangpot sa Torre sa Babel sa dihang ang mga tawo misugod sa pagsulti sa nagkalainlaing pinulongan, dinhi maoy katingalahang pasundayag sa panaghiusa sa hunahuna, paggawi, ug mga lihok, bisan pa sa suliran sa pinulongan.—Genesis 11:1-9.

Kining panaghiusa tali sa kaubang mga magtutuo sa nagkalainlaing mga nasyonalidad namatikdan sa mga tagagawas. Ang publikasyong Sztandar Młodych miingon: “Ang pasahero lamang sa ayroplano nga miabot sa tugpahanan sa Warsaw nga wala masaag o wala maglibog diha sa pundok sa mga tawo mao ang mga Saksi ni Jehova. Giandam sa mga isigkamagtutuo ang mga anunsiyo sa daghang pinulongan, ang mga talad sa impormasyon, ug mga karatula ug mga transportasyon paingon sa siyudad.”

Ang pag-awit diha sa mga kombensiyon ilabinang nakakuha sa pagtagad, samtang ang tinagpulo ka libo nanag-awit nga nagkahiusa diha sa kapin sa 20 ka nagkalainlaing mga pinulongan, ang tanan nagpahayag sa samang mga hunahuna sa espiritu sa gugma ug panaghiusa. Lain pa, diha sa Warsaw ang mga bahin sa programa gihubad sa 16 ka pinulongan (sa Poznan sa 13 ug sa Katowice sa 15). Wala pa kini mahimo sukad sa Polandiya.

Ang 16 ka maghuhubad nagbarog diha sa natad sa atubangan mismo sa ilang partikular nga grupo sa pinulongan. Ang mamumulong mipahayag diha sa plataporma, ug ang matag usa ka maghuhubad nga naghubad sa pinulongan sa tumatambong diha nianang seksiyona sa istadyom. Ang mga trompa nga gipunteriya direkta sa partikular nga bahin sa pinulongan nagpaposible nga madunggan ang kaugalingong pinulongan sa usa nga dili kaayo madisturbo sa mga hubad nga gipahayag sa ubang mga pinulongan sa ubang mga seksiyon.

Bisan pa sa seryoso ekonomikanhon nga mga suliran sa Polandiya, libolibo sa mga bisita gihatagan ug pribadong mga puy-anan sa ilang mga igsoon sa Polandiya. Disisayis-mil ang gipasaka sa mga igsoon sa Poznan, 21,000 sa Warsaw, ug 30,000 sa Katowice. Ang usa ka pamilya nagpasaka ug 18 ug nagpakaon ug 21. Ug usa ka kongregasyon sa 146 ka Saksi nagpasaka ug 1,276 ka tawo!

Maayong Pagkobre sa Balita

Ang mga taho sa telebisyon, radyo, ug peryodiko sa dakong bahin matuod ug walay-pagpihig. Mamatikdan diha sa ilang mga ulohan sa balita nga ang “Mga Saksi ni Jehova Nagapraktis sa Ilang Relihiyon Diha sa 212 ka Nasod,” gidayeg sila sa publikasyong Sztandar Młodych pinaagi sa paggamit ug mga artikulo ug mga subtitulo sama sa, “Walay-kabalhinan,” “Mahapsay,” “Makasaranganon,” ug “Kugihan.” Mahitungod sa istadyom sa Warsaw, kini nag-ingon: “Walay bisag usa ka upos sa sigarilyo o piraso sa papel ang gilabay sa usa ka badlongon nga bata. Ang mga Saksi ni Jehova dili manigarilyo, ug ang ilang mga anak dili-badlongon.”

Ang peryodikong Życie Warszawy naghisgot nga ang mga pagpangandam sa kombensiyon ginahimo sa tibuok tuig ug miingon: “Lakip sa ubang mga butang, ang mga istadyom nga gihimoan sa mga kombensiyon giayo.”

Ang peryodikong Express Wieczorny mitaho: “Ang nakapukaw sa tanang mga maniniid mao ang naglungtad nga kahapsay sa istadyom. Ang paglabay sa basura diha sa gitudlong mga lugar, ang temporaryo apan mahinlong mga kasilyas, daghang talad alang sa impormasyon—ang tanan niini katingalahan.” Aron mahimo kini, kapin sa 3,500 ka Saksi migugol ug panahon sa pag-areglar ug sa pagdekorar sa istadyom sa Warsaw.

Giinterbiyo usab niining peryodikoha ang pipila ka delegado, nangutana kanila: “Unsay kahulogan sa kombensiyon sa Warsaw alang kaninyo?” Ang usa ka taga Polandiya nga Saksi miingon: “Natandog ako sa kamatuoran nga dili ako makahimo sa pakigkita sa akong mga igsoon gikan sa Czechoslovakia ug sa U.S.S.R., nga mga nasod diin ang mga Saksi ni Jehova wala ilha sa kagamhanan isip relihiyosong asosasyon.”

Ug usa ka Saksi nga gikan sa Unyong Sobyet gikutlo nga miingon: “Para nako kini mao ang labing dakong eksperyensiya sa akong kinabuhi. . . . Sa unang higayon sa akong kinabuhi nakahimo ako sa pakigkita ug hilabihan ka daghan sa akong mga igsoon gikan sa tibuok kalibotan. Dugang pa, kining tigoma maayo kaayong pagkaorganisar; ang mga pakigpulong gihubad sa 16 ka pinulongan, ang among mga igsoon sa Polandiya mao ang among tig-abiabi—ang tanan tinuod gayod nga katingalahan.”

Ang Życie Warszawy miingon: “Ang kalibotan sa kombensiyon sa mga Saksi ni Jehova sa Warsaw karon natapos na. . . . Ang pagtigom sa maong mga kombensiyon nahimong posible, kon atong mahinumdoman, human nga ang Relihiyosong Asosasyon sa mga Saksi sa Polandiya—nga karon kapin na sa 80 ka libong mga magtutuoa—narehistro sa mga bulang milabay. Sukad niadtong Mayo 12 kining ilegal niadto nga relihiyosong grupo nakatagamtam sa legal nga kahimtang.”

Nagtawag sa mga kombensiyon sa mga Saksi ni Jehova nga “usa ka pasundayag sa panaghiusa,” kining maong peryodiko miingon nga “kon bahin sa kahapsay, kalinaw, ug kahinlo, ang mga entrante sa kombensiyon maoy mga panig-ingnan nga pagasundon.”

Ang Bawtismo

Ang tanan, makasulti man ug dili sa sinultihan sa Polandiya, natandog sa kulbahinam nga talan-awon sa bawtismo. Sa Warsaw dihay gibutang nga mga lingkoranan sa natad sa dulaanan sa atubangan gayod sa plataporma nga palingkoran sa mga kandidato sa bawtismo. Apan sa panahon sa programa sa buntag, makalilipay ang pagtan-aw sa mga atendant nga nagdalidali sa pagbutang ug dugang mga lingkoranan diha sa natad samtang ang mga kandidato sa bawtismo nagpadayon sa pagdaghan. Unya, sa dihang hapit nang sugdan ang pakigpulong sa bawtismo, ang dakong tumatambong walay-timik. Sila hapit nang makaeksperyensiya ug usa ka butang nga dili gayod nila mahikalimtan. Samtang giabiabi sa mamumulong ang mga kandidato sa bawtismo, ang tibuok istadyom mipakpak. Ug unya, morag giplano nang daan nga signal, apan sa pagkamatuod napukaw sa natugob nga mga kasingkasing nga gitandog sa espiritu sa Diyos, ang kandidato sa bawtismo mitubag pinaagi sa madasigong pagwarawara sa ilang mga kamot sa pagpangomosta sa nagdasok nga tumatambong nga naglibot kanila.

Ang katilingbanong deklarasyon sa pagtuo sa mga kandidato sa pagtubag sa duha ka pangutana nga kasagarang ipangutana diha sa mga kandidato klarong milanog ug determinado—ug sa pagkamatuod daghan kanila midangat niining lakang sa pagpahinungod pinaagi sa daghang kalisdanan ug pagsulay. Pagkahuman sa pag-ampo, ang kandidato nagbulag sa duha ka grupo ug milakaw gikan sa istadyom samtang giawit sa mga tumatambong ang “Sa Diyos Nagapahinungod Kita.” Ang mga brader migawas gikan sa natad agi sa tunel nga mohatod nila sa ilang mga lawak ilisanan, samtang ang mga sister miagi sa laing tunel nga mohatod sa ilang mga lawak ilisanan. Ang mga atendant ug mga tigtuslob, ang tanan nagsul-ob ug puti, nagpahimutang sa ilang puwesto, ug dihadiha ang mga kandidato, nga nagsul-ob sa pormal nga mga sapot sa kaligo, misugod sa paglakaw ug balik sa natad, diin 12 ka bawtismohanan gihimo, 6 sa usa ka kilid sa natad alang sa mga sister, ug 6 sa pikas kilid sa natad alang sa mga brader.

Sige ang mainitong pagpakpak sa 45 minutos diin 1,905 ang gibawtismohan sa Warsaw. (Sa semanang milabay, 1,525 gibawtismohan sa Poznan ug 2,663 sa Katowice, sa bug-os nga total nga 6,093, o 3.7 porsiento sa labing kinatas-ang tumatambong.) Labing menos duha ka baldadong mga brader mahigugmaong gialsa gikan sa ilang mga wheelchair sa wala pa bawtismohi, apil sa usa kinsa gidala ngadto sa natad diha sa istretser aron sa pagpamati sa pakigpulong sa bawtismo.

“Ang Bug-os nga Kinatayoktokan”

‘Daw emosyonal kaayong pamation kini,’ tingali moingon ka. Buweno, tinuod gayod! Apan dili kadto ang maong matang sa emosyon nga imong makita sa relihiyosong mga tigom sa Kakristiyanohan. Ang emosyon sa mga kombensiyonista sa Polandiya gipasukad sa tukmang kahibalo sa Pulong sa Diyos, aron kadtong tumatambong nga labi pang masangkapan sa pag-alagad sa Diyos tapos niadto. Kadto maoy emosyon nga napukaw sa kahibalo nga human sa mga dekada sa pagsupak, ang mga Saksi sa Polandiya sa kataposan nakahimo sa libreng pagtigom uban sa mga isigkamagtutuo gikan sa silingang mga nasod. Kadto maoy emosyon nga natawo gikan sa kalipay sa pagkahibalo nga ang delegado nga naglingkod sa tapad kanimo tingali wala pa gayod sukad makatambong ug kombensiyon ug labing segurado dili sama niining gidak-ona. Kadto maoy emosyon nga nagagikan sa madaogon, makitang pamatuod nga ang mga Saksi ni Jehova maoy nahiusa, internasyonal nga panag-igsoonay nga nagaalagad sa buhi nga Diyos sa kamatuoran.

Gipahayag kini sa usa ka delegado nga gikan sa kasadpang Uropa pinaagi sa pag-ingon: “Bisan pag nakatambong sa tanang kombensiyon sukad sa 1952, kon mahitungod sa atmospera, kadasig, kalipay, gugma, ug apresasyon, ug pagkamapasalamaton, kini mao ang bug-os nga kinatayoktokan.”

Sa walay duhaduha ang emosyon miabot sa kinatayoktokan sa Warsaw sa Dominggo sa panahon sa kataposang pag-ampo. Bisan pag libolibo wala makasabot sa mga pulong niini, ang tanan nakasabot sa espiritu, sa gugma, sa dedikasyon, ug kalipay, sa kinasingkasing nga pag-ila sa Soberano Ginoong Jehova, ug sa determinasyon sa pagpadayon sa buluhaton ni Jehova nga gipahayag niini. Ang makataha nga kahilom sa dihang ang duolan sa 60,000 ka ulo nagduko diha sa pag-ampo ngadto sa ilang Diyos nabugto lamang sa madungog nga malipayong mga pagbakho sa apresasyon. Sa dihang natapos ang pag-ampo, walay usa ang naglisod sa pag-ingon “Amen” gikan sa kinailadman sa iyang kasingkasing. Dihay misunod nga kinabubut-ong pagpakpak nga milanog sa dakong tigomanan sulod sa 11 ka minutos.

Kapin sa 166,000 ka tawo ang nakakita sa teokratikanhong kasaysayan nga gihimo sa Polandiya. Sa dili pa mapulpog ang daotang sistema ni Satanas ngadto sa kataposang kalaglagan, dugang pang kasaysayan ang pagahimoon—maukyabon, mahinuklogon, mahilapong kasaysayan nga pagataposon sa kabayawan sa pagkasoberano ni Jehova. Ug kon buot mo, ikaw maluwas ingong bahin niana nga kasaysayan. Buot ka ba?

[Mga footnote]

[Kahon sa panid 21]

DAKONG MAKASAYSAYANHONG HITABO

1928 Ang 300 ka mga Saksi sa Polandiya naghimo sa ilang unang gamay nga mga asembliya.

1939 Sa gisugdan ang Gubat sa Kalibotan II, 1,100 ka Saksi ang nagwali; daghan ang nabilanggo, ug ang uban namatay sa konsentrasyong mga kampo sa Aleman.

1945 Sa kataposan sa Gubat sa Kalibotan II, ang gidaghanon sa mga Saksi midoble ngadto sa 2,500.

1946 Sa Hunyo, 1,500 ang mitambong sa asembliya duol sa Lublin; 298 ang gibawtismohan. Sa Septiyembre 5,600 ang mitambong sa asembliya sa Katowice.

1947 Usa ka kombensiyon sa Kraków gitambongan ug 7,000; 476 ang gibawtismohan. Duha ka graduwado sa Gilead miabot sa pagtabang sa pag-organisar sa buluhatong pagsangyaw.

1950 Ang labing taas nga 18,000 ka mga Saksi ang nakab-ot sa Marso. Ang Memoryal gitambongan ug 24,000. Sa Hulyo ang buluhaton gidili, nga nakapugos sa paghimo sa gagmayng mga tigom diha sa pribadong mga balay.

1968 Ang usa ka adlaw nga distritong mga kombensiyon unang gihimo diha sa mga lasang nga may 100 o 200 ang mitambong; sa ulahi, mga 1,000 ang mitambong.

1980 Duolan sa 2,000 ka mga Saksi nga gikan sa Polandiya ang mibiyahe ngadto sa Vienna, Austria, alang sa distritong kombensiyon.

1981 Usa ka kombensiyon nga mas dako kay sa 1980 ang gihimo sa Vienna alang sa mga igsoon sa Polandiya.

1982 Gihatagan sa kagamhanang Polako ang mga Saksi ug permiso sa pag-abang ug mga tigomanan ug mga istadyom alang sa usa ka adlaw nga mga asembliya.

1985 Ang tulo ka adlaw nga distritong mga kombensiyon nga gitambongan sa kapin sa 94,000 gihimo sa Polandiya. Dihay ginatos ka dinapit gikan sa 16 ka nasod, apil ang upat ka membro sa Nagamandong Lawas.

1989 Ang “Diyosnong Debosyon” Distritong mga Kombensiyon nagpuno sa tulo ka istadyom, nga gitambongan ug lima ka membro sa Nagamandong Lawas; ang total nga tumatambong maoy 166,518, nga may 6,093 ang gibawtismohan. Duha ka tracts ang giluwat sa Polako, Unsay Gituohan sa mga Saksi ni Jehova? ug Nganong Makasalig Ka sa Bibliya, ug ang 32-panid nga brosyur nga Angay ba Nimong Tuohan ang Trinidad?

[Mga Letrato sa panid 23]

Ang mga kandidato sa bawtismo sa Warsaw nga naglingkod sa atubangan sa plataporma, ug ang nagtan-aw nga panon sa mga tawo sa ilang bawtismo

[Mga Letrato sa panid 25]

Ang bahin sa seksiyon nga gireserba sa Katowice alang sa mga delegado gikan sa Unyong Sobyet, ug pipila ka bus nga naghatod sa Russong mga Saksi ngadto sa Poznan