“Mga Saksi ni Jehova nga Taga-USSR—Masanagong mga Adlaw sa Unahan”

KANA mao ang pangunang-ulohan sa Iningles nga mantalaang The Warsaw Voice sa Agosto 19, 1990, nga gipatik sa Polandia. Ang magsusulat, si Anna Dubrawska, mikomento bahin sa “Putling Pinulongan” nga Kombensiyon sa mga Saksi ni Jehova sa Warsaw sa Agosto 1990. Giinterbiyo niya ang mga Saksi nga taga-Unyon Sobyet, nga pipila kanila nakagugol ug 15 anyos diha sa mga prisohan ug mga kampo sa trabaho tungod sa ilang relihiyosong mga tinuohan. Apan karon gipasiugda nila ang positibong mga kausaban nga nagkahitabo diha sa ilang nasod.

Si Grigor Goryachek, usa ka obrero sa konstruksiyon nga taga-Crimea nga gipadako nga Saksi, nadistiyero sa 15 anyos sa Siberia. Matud niya: “Kami karon nagalaom nga moabot ang mas maayong mga panahon.” Ang laing Saksi, si Anton Pohanich, miingon: “Ania na ang mas maayong panahon. Karon ako makadala sa among mensahe nga libre sa balay-balay, samtang sa nangagi kini dili posible.”

Si Dubrawska nagkutlo kang Igor Cherny, usa ka 17-anyos nga Saksi nga taga-Caucasus: “Sulod sa 70 ka tuig ang mga tawo, ilabina ang mga batan-on, bug-os napahilayo sa Diyos nga karon buot na nilang mobalik Kaniya nga sama ka mabug-oson, o labing menos makadungog bahin Kaniya ingong sinugdanan.”

Ang Polakong basahon nga Dziennik Wieczorny (Panggabiing Mantalaan) mitaho, ubos sa titulong Radość braci (Kalipay sa mga Igsoon) nga ang usa ka empliyado sa Zawisza nga estadyum sa siyudad sa Bydgoszcz miingon: “Ako nalipay sa hinlong sinultihan nga gigamit ug sa maayong pamatasan nga gipakita sa mga batan-on.”

Sa pagsulat diha sa Polakong mantalaang Trybuna ubos sa ulohang Glosiciele Królestwa (Mga Magmamantala sa Gingharian), si Zofia Uszynska miingon mahitungod sa kombensiyon: “Sa 30 minutos nga yugto ako gitanyagag merienda ug kape sa makapulo. Sa lima ka beses may buot mohatag sa iyang lingkoran alang kanako. Sa upat ka nagsunod nga adlaw kapin sa 30,000 ka tawo sa Dziesieciolecia Stadium sa Warsaw ang miapil sa usa ka [relihiyosong] pangilin. Mga babayeng dagkong mabdos, mga pamilyang may gagmayng mga bata, mga dagkong tawo ug mga batan-on. Ang kinabataang nabawtismohan maoy 11 anyos, ang kinatigulangan halos 80.”

Ang artikulo nagpadayon: “Ubay-ubayng libo nga Ruso [sa aktuwal kapin sa 16,000] mianha sa tigom niining tuiga. Sa usang tuig dihay 6,000 kanila. Gipaagi sa Rusong opisyales sa utlanan ang tanang bus nga wala nay paghulat sa pagsusi sa mga linya nga daghang kilometrahe sa gitas-on. Nangabot ang mga delegado gikan sa tibuok Unyon Sobyet: gikan sa Vladivostok, Khabarovsk, Vorkuta. Ang pipila migugol ug upat o lima ka adlaw sakay sa tren.”

Ang samang mantalaan nagkutlo kang Ivan M. Grevniak nga nag-ingon: “Nakita ko ang inhustisya sa gibuhat sa mga papa ug sa mga pari, ug gipangita ko ang pagkamatinud-anon.” Ang asoy mipadayon: “Namatikdan niya ang panag-uyon tali sa mga pulong ug mga buhat sa kagawian sa mga Saksi ni Jehova.” Unya si Ivan midugang: “Ako nagapasalamat sa Diyos nga ako iyang gitugotan nga mahibalo sa kamatuoran.”

Ang Trybuna mitaho nga si Ivan usa ka ansiano sa usa ka kongregasyon sa Lvov, diin “adunay 13 ka kongregasyon ug kapin sa 2,000 relihiyosong magtutuo. . . . ‘Sa tanang relihiyosong pundok sa bisan diin nagahari ang espiritu sa nasyonalismo. Apan kini wala sa tunga sa akong mga kauban sa relihiyon,’ matud ni Grevniak.”

Ang maong panaghiusa gipakita sa kombensiyon sa Warsaw sa mga Saksi ni Jehova diin ang programa gipresentar nga dungan diha sa Polako ug Ruso diha sa lainlaing mga bahin sa estadyum. Bug-os nga walay nasyonalistikanhong panagbingkil.

Si Zofia Uszynska nakadayeg usab sa organisasyon nga gikinahanglan sa pagpapuyo, pagpakaon, ug pag-atiman pa sa panglawas sa kapin sa 35,000 nga mitambong sa kombensiyon. Siya mihinapos: “Wala gayod ako makaapil sa maong maayo, mahigalaong publikong panagkatigom.”

Ang Polakong mantalaang Sztandar Młodych (Sukdanan sa Kabatan-onan) mikomento bahin sa buluhaton nga nahimo sa paghimo sa estadyum nga angay sa pagdawat sa daghan kaayong bisita: “Ingong usa ka pag-alagad sa katilingban . . . ang mga sumusunod ni Jehova nag-otro sa mga bangko, nagremodel sa mga tunil ug mga kasilyas, naghinlo sa kabalilihan. Miamot sila alang sa gastos sa kombensiyon gikan sa ilang kaugalingong mga bulsa. Ang mga Saksi ni Jehova nag-andam ug mga 22,000 pribadong mga sak-anan alang sa mga bisita, nag-atiman sa pagkaon sa Sobyet nga mga lungsoranon, ug may kaugalingong medikal nga pag-atiman.”

Sa pagkamatuod ang mga Saksi ni Jehova nakasinati nag “masanagong mga adlaw” sa Silangang Uropa ug nagaampo nga ang ilang bag-ong kaplag legal nga kahimtang diha sa mga nasod sama sa Romania, Hungaria, ug Polandia sa dili madugay makaabot ngadto sa Czechoslovakia, Albania, Bulgaria, ug sa Unyon Sobyet.​—2 Tesalonica 3:1; 1 Timoteo 2:1, 2.

[Mga hulagway sa panid 23]

Mga Saksing Sobyet sa Warsaw “Putling Pinulongan” nga Kombensiyon, apil ang mga kandidato sa bawtismo (ibabaw ug gisukip), Rusong mamumulong, programa, ug Sobyet nga mga delegado sa atubangan sa ilang mga bus