Gikan sa Among mga Magbabasa

Pagpauswag sa Imong Pagbasa

Salamat sa inyong artikulong “Ikaw Mahimong Mas Maayong Magbabasa!” (Enero 22, 1985 sa Cebuano) Ako niadto may suliran sa pagbasag daghan ug diyutay rag mahinumdoman. Sa pagsunod sa mga sugyot sa inyong artikulo, akong gibating ako miuswag ug 70 porsiento sa paghinumdom sa impormasyong akong nabasa, ilabina dihang gipadapat ang mga sugyot diha sa kahon ubos sa ulohang “Pasiunang Pag-aninaw sa Di-Sulosugilanon,” sa panid 12.

J. H., Brazil

Tabang sa Eskuylahan

Ako magtutudlog matematika ug mga siyensiya sa hayskul. Ang akong mga estudyante nahibalong ako usa sa mga Saksi ni Jehova. Sa miaging Disyembre ang matag estudyante kinahanglang mohan-ay sa usa ka tema mahitungod sa kalinaw. Usa ka adlaw, duha ka estudyante miadto sa among balay sa pagpangutana kon ako may materyal ba nga marepaso bahin sa ulohang kalinaw. Ako nalipay sa pagsangyaw kanila ug gitanyag kanila ang inyong mga isyu mahitungod sa kalinaw. (Abril 8 ug 22, 1986 sa Cebuano) Pila ka adlaw sa ulahi, halos ang tanang estudyante miadto sa among balay aron makakuha sa maong mga isyu aron makaandam sa ilang giasayn nga tema. Usa sa mga estudyante nakadawat ug ganti.

G. C., Italya

Pag-inom ug Pagmaneho

Dawata ang akong sinserong apresasyon sa inyong serye sa mga artikulo bahin sa pag-inom ug pagmaneho. (Agosto 8, 1986 sa Cebuano) Ingong direktor bahin sa kaluwasan ako hangyoon sa daghang panahon sa usa ka tuig sa paghatag ug mga pakigpulong ngadto sa mga organisasyon sa simbahan bahin sa sayop nga paggamit sa alkohol ug mga epekto niini. Ang mga reperensiyang gikan sa Bibliya nga gigamit sa tibuok artikulo akong iapil sa akong programa. Sa makausa pa, salamat sa pagpatik sa maong ulohan sa edukasyonal kaayo ug relihiyosong kahayag.

R. W., Nebraska, T.B.A.

Bag-o pa lang nakong natapos ang pagbasa sa inyong mga artikulo mahitungod sa pag-inom ug pagmaneho. Ako nagatudlo sa pagtuon sa pagmaneho sa usa ka senyor hayskul ug nadiskobrehang ang mga artikulo maayo kaayong pagkasulat ug nagahatag ug tukmang asoy sa suliran. Akong gihisgotan ang ulohang pag-inom ug pagmaneho ngadto sa akong mga estudyante sa unang semestre. Ang inyong mga artikulo magsilbing ekselenteng pagsubli niining hinungdanong ulohan. Buot kong mabatonan ang pagtugot nga mohimog seroks nga kopya niining mga artikuloha aron iapod-apod ngadto sa akong mga 515 ka estudyante sa akong mga klase sa pagtuon sa pagmaneho.

R. D., Pennsylvania, T.B.A.

Permiso gitugot pinaagig direktang sulat.—ED.

Ako mobati kang Shirley Ferrara ug sa iyang banang si Steve. Ang akong bana ug ako nawad-an sa among anak lalaki sa usa ka aksidente sa kotse sa Septiyembre 1982. Siya mao ang bugtong namong anak lalaki ug 18 anyos lamang. Siya pasahero sa usa ka kotse nga ang nagmaneho hubog kaayong batan-ong lalaki. Tungod sa usa ka teknikalidad, ang Korte Suprema sa Colorado nagwagtang sa mga sumbong sa pagpatay tungod sa aksidente sa sakyanan batok sa batan-ong lalaki nga maoy nagmaneho, bisan pag ang iyang BAC labaw kaayo sa 0.10 porsiento nga giisip sa balaod nga hubog. Ang kataposan kong nadungog mao nga siya kusog gihapong nagainom ug nagamanehong hubog. Hinaot siya matabangan sa dili pa siya makapatayg lain.

J. G., Colorado, T.B.A

Ang akong bana ug ako nawad-an sa among 16-anyos nga anak babaye tungod sa hubog nga drayber sa 1983. Siya mao ang bugtong namong anak. Bisan pag ang mga awtoridad naningkamot sa tanan nilang mahimo sa pagkunhod sa pagmaneho samtang hubog, anaa ra sa matag usa sa pagbuhat sa iyang bahin. Apan ang akong bana ug ako nasayod nga pinaagi lamang sa bag-ong sistema ni Jehova nga mahanaw ang suliran sa pagmaneho samtang hubog ug ang atong mga minahal mahibalik sa pagkabanhaw.

R. E., Indiana, T.B.A.