Gikan sa Among mga Magbabasa
Ang Homoseksuwal nga Paagi sa Kinabuhi
Naikag ako sa inyong artikulo “Ang Homoseksuwal nga Paagi sa Kinabuhi—Unsa ka Malipayon Kini?” (Agosto 22, 1986) Apan, inyong gipasumbingay nga ang AIDS maoy silot ni Jehova sa mga homoseksuwal. Nagtuo ba kamo nga ang sickle-cell anemia, nga ilabinang motakboy sa mga itom, maoy silot ni Jehova sa mga itom? Lain pa, dili apektado sa AIDS ang mga tomboy. Nagpasabot ba kini nga wala makaangay si Jehova sa mga bayot apan nalipay sa mga tomboy? Maayo kaayo alang sa mga wala makaangay sa mga homoseskuwal ang paglangkit sa homoseksuwal sa AIDS, apan sa dakong bahin kini iresponsable.
M. D., Tinipong Bansa
Kami wala mag-ingon ni nagpasabot nga ang Aids mao ang silot sa Diyos sa mga homoseksuwal. Ang sakit maoy bahin sa sala ug pagkadili-hingpit nga atong napanunod kang Adan. (Roma 5:12) Apan dili ikalimod nga dunay pipila ka aksiyon nga mohatag ug dili-malikayang mga sangpotanan. Ang tigtabako nagladlad sa iyang kaugalingon sa dakong kapeligrohan sa kanser sa baga. Ang tig-abuso sa alkohol nagladlad sa iyang kaugalingon ug sakit sa atay. Ang busawan nagladlad sa iyang kaugalingon sa kapeligrohan nga nalangkit sa pagkatambok. Ang paglangkit sa homoseksuwalidad ug AIDS dili gikan kanamo kondili sa kamatuoran nga gilig-on sa siyensiya. Bisan ug dili ekspresyon sa silot sa Diyos, ang espisipikong mga sangpotanan nalangkit sa paglapas sa balaod sa Diyos. Diha sa Galacia 6:7 kini nag-ingon: “Ayaw pagpahisalaag: Ang Diyos dili mabiaybiay. Kay bisan unsay ipugas sa tawo, mao usab kanay iyang anihon.”—ED.
Pagsukol sa Panglugos
Salamat kaninyo sa inyong artikulong “Karon Mamatay Ka!” (Septiyembre 22, 1986) Apan, may ikadugang ako mahitungod sa tambag nga gihatag. Ang ubang mga manglulugos masuk-anon kaayo ug sadistiko sa ilang paagi ug may dalang mga hinagiban ug may tuyo sa paggamit kanila kon hagiton sa kasuko. Ang among Metropolitan Organization to Counter Sexual Assault nagsugyot sa pagsukol, apan kon dili-makalihok ang babaye tungod sa kahadlok o kon nagsugyot ang iyang kinaiyahan sa dili pagsukol, among giila kana nga husto. Mas gusto pa namong mabuhi ang usa bisan pa sa hitabo kay sa mapatay o grabeng masamdan.
P. R., Tinipong Bansa
Ang Bibliya nagalaban sa hunahuna nga ang babayeng atakehon ug manglulugos kinahanglang mosinggit ug mosukol. Tinuod, ang babaye kinahanglang molihok sumala sa iyang pagtimbangtimbang sa kapeligrohan sa iyang kinabuhi, ug kami nagtuo nga gihisgotan kana diha sa tambag nga gihatag sa kahon sa panid 16 (Nobyembre 22, 1986). Kinahanglang isilsil sa hunahuna nga dili garantiya nga ang biktima nga magpalugos dili bun-ogon o patyon human niana. Tan-awa ang artikulong “Ilang Gisuklan ang mga Manglulugos” sa among isyu sa Agosto 22, 1984.—ED.
Ang Bomba ug ang Kaugmaon sa Tawo
Nalingaw kaayo ako sa pagbasa sa inyong mga artikulo “Ang Bomba ug ang Kaugmaon sa Tawo.” (Nobyembre 22, 1986) Apan, wala ako magtuo nga nahisgotan na sa artikulo ang tanan, sama sa pag-awhag sa mga magbabasa (mga Kristohanon) sa pagtutol sa nukleyar nga mga hinagiban pinaagi sa pagbotar ug sa pagsulat ngadto sa ilang mga magbabalaod. Aloha.
J. G. B., Hawaii
Ang pagbotar ug pagsulat ngadto sa mga magbabalod nagsugyot nga adunay tawhanong solusyon sa problema. Ang among mga artikulo tin-aw kaayo nga ang Gingharian sa Diyos lamang ang makahatag ug walay kataposang kalinaw ug kasegurohan sa mga mahigugmaon ug kalinaw sa tanang dapit. Ang mga Saksi ni Jehova nagaampo alang niana nga Gingharian, sila nagkinabuhi sumala sa mga prinsipyo niini sa kalinaw, ug ilang gigugol ang ilang panahon sa pagsulti mahitungod niini ngadto sa uban.—ED.