Haduol na ang Malungtarong Pagkaayo

ANG medikal nga siyensiya, tungod sa talagsaong mga kauswagang medikal niini, tingali makadaog sa bugno—apan sa gihapon mapildi sa gubat. Halos dihadiha sa panahong mobati kitang naugmad nato ang pila ka kahanas ug kasinatian, ang mga sakit mopahinay kanato ug sa dili madugay moabot ang kamatayon. Apan ang Diyos nagasaad nga kini dili kanunay maingon. Pinaagi sa iyang manalagnang si Isaias, ang Diyos miingon nga iyang ‘pagalamyon ang kamatayon sa walay kataposan, ug pagapahiran ang mga luha gikan sa tanang nawong.’—Isaias 25:8.

Kana ba daw dili katuohan? Sa imong hunahuna ang kinabuhi ba nga 80 anyos maoy taas nga panahon? May mga kahoy nga mabuhig linibong katuigan—nganong ikaw dili mabuhi sa ingon? Ang Diyos naghatag sa bituon sa dagat sa katakos sa pagpatubog bug-os bag-ong pinakabukton kon maputol ang usa. Dili ba siya makapasig-uli sa imong lawas ngadto sa hingpit nga kahimsog ug kabug-osan?

Duolag 2,000 ka tuig nga miagi gibuhat ni Jesu-Kristo ang talagsaong mga milagro sa yuta. Siya nag-ayo dili lamang sa sanla kondili “sa tanang matang sa sakit ug tanang matang sa kaluyahon taliwala sa katawhan.” Ang dinasig nga talaan nag-ingong iyang giayo “ang mga tawo nga bakol, piang, buta, amang . .  Ang panon natingala sa ilang nakita ang mga amang nga misulti ug ang mga bakol nga nakalakaw ug ang mga buta nga nakakita.” Wala kinahanglana ni Jesus ang mga hayop nga modonar o mga pag-transplant sa organo—iyang giayo ang mga organo mismo o mga parte sa lawas nga nadaot. Ug dihadiha ang iyang pag-ayo, usahay gikan pa sa halayo.a

Dili lamang nga si Jesus may gahom sa pag-ayo kondili siya buot mobuhat niana. Sa usa ka okasyon, ang usa ka sanlahon miingon kaniya: “Kon buot mo lamang, ikaw makahinlo kanako.” Si Jesus, kay giabot ug kaluoy, maluluy-ong mitubag: “Buot ko. Magmahinlo ka.” Iya pang gibanhaw ang mga patay—sa labing menos usa ka higayon tapos magsugod sa pagkadunot ang lawas.—Marcos 1:40-42; Juan 11:38-44.

Unsay ginapakita niining katingalahang mga panig-ingnan? Nga si Jesus, karon naentrono ingong langitnong Hari, dili lamang may gahom kondili buot usab nga mopatungha sa tinuod ug malungtarong pagkaayo. Iyang pagabuhaton sumala sa ginasaad sa Bibliya.

Kanang basahona, ang Bibliya, nagabatbat sa katingalahang kausaban nga moabot sa dili madugay sa tawhanong mga hitabo—ang pagbalda sa Diyos mismo sa kahikayan sa kalibotan ug sa pagtukod pag-usab sa usa ka paraisong yuta nga walay polusyon, sakit, krimen, pagdumot, ug mga gubat. Kini nagahisgot bahin sa tinuod ug malungtarong pagkaayo, sa espirituwal ug sa lawasnon. Ug ang tagna sa Bibliya nagapaila nga adunay mga tawo nga nagkinabuhi panahon sa Gubat sa Kalibotan I nga mabuhi pa inigkahitabo niining tibuok-kalibotang kausaban.—Mateo 24:3, 14, 34.

Tinuod nga Kahimsog

Ang kataposang mga kapitulo sa Bibliya nagahisgot sa usa ka matarong nga pagmando nga “manaog gikan sa langit gikan sa Diyos”—nganhi sa katawhan dinhi mismo sa yuta. Unya ang Diyos “magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.” (Pinadayag 21:2-4) Sa literal nga diwa ingon man espirituwal, “ang mga mata sa mga buta mangabuka, ug ang mga igdulongog mismo sa mga bungol makadungog. Nianang panahona ang bakol mokatkat sama sa usa ka laking osa, ug ang dila sa amang mosinggit sa kalipay.” “Ug walay molupyo ang moingon: ‘Ako masakiton.’”—Isaias 35:5, 6; 33:24.

Busa, dili lamang medikal nga tabang ug pagpang-ayo sa hamubong panahon, kondili tinuod nga kahimsog alang sa tanan mao ang saad alang niadtong magapuyo ilalom sa Gingharian sa Diyos niining yutaa. Tinong kana mapuslanong tumong nga tinguhaon sa pagkab-ot!

[Mga footnote]