Nganong ang Daotang mga Butang Mahitabo sa Maayong mga Tawo?

Sa tiilan sa bolkan sa San Salvador sa El Salvador nahiluna ang lungsod sa San Ramón. Sa buntag sa Septiyembre 19, 1982, kadto gihampak sa tulo ka dagko kaayong mga baha sa lapok. Gimugna sa bunokbunok nga ulan, ang unang baha halos duha ka andana ang gihabogon ug nagdalag mga dagkong bato ug mga punoan sa kahoy. Nga nakalungag sa bung-aw nga 50 metros sa giladmon ug 75 metros sa gilapdon, kadto miagos sa kiliran sa bolkan, nga nagkakusog ug nagkadako sa lakaw niini. Sa pag-abot sa ubos, gilamba ang mga balayng adobe diha sa iyang dalan.

Ang balay ni Ana nahugno tungod sa dili-mabangbang nga baha sa lapok sa usa ka makalilisang nga gutlo. Ang iyang mga anak babaye nanghawid kang Ana ug mingtuwaw, “Iampo kami!” Dayon sila natabonan sa lapok . . .

Sa sulagma, hinunoa, ang tisa sa atop nahibutang sa atubang sa nawong ni Ana, nga naghatag kaniyag lugar nga makaginhawa. “Nagsige akog panawag ug nagpanawag sa tabang,” matud pa niya. Mga upat ka oras sa ulahi, nadunggan sa mga silingan ang iyang mga panawag ug gisugdan ang pagpagawas kaniya. Siya nakaplagang nalubong sa lapok abot sa iyang ilok, uban sa mga lawas sa iyang mga anak babaye nga nadutdot kaniya diha sa makapatuok nga lapok.

ANG mga tawo sa San Ramón mapaubsanon ug mahigalaon. Nahilakip sa mga patay mao ang ubay-ubayng dedikadong Kristohanon, apil ang bag-ong minyo, si Miguel ug si Cecilia, ug ang usa ka pamilya sa lima kansang mga lawas nakaplagang nanaggakos.

Hinuon, ang katalagman dili moila sa maayo ug daotang mga tawo. ‘Unsang matang sa Diyos,’ sila mangutana, ‘ang magtugot nga mahitabo ang ingong walay-hinungdang pag-usik sa kinabuhi? O kon bahin niana, sa unsang paagi ang gamhanan-sa-tanang Diyos makatan-aw sa mga tigulang nga walay kapuy-an, sa kugihang mga pamilya nga mawad-an sa ilang tinigom sa tibuok kinabuhi, sa mga batan-ong lalaki ug babaye nga anaa sa banagbanag sa ilang kinabuhi nga mangapukan sa makapatayng mga sakit—ug walay ginabuhat?’

Si Harold S. Kushner, usa ka Hudiyong rabbi, nangutana nianang mga pangutanaha sa iyang nasayrang ang iyang anak lalaki mamatay sa usa ka tagsaong sakit. Ang nakapalibog nga inhustisya niana nakapahibulong kang Kushner. “Ako maayong tawo,” nahinumdom siya. “Ako naningkamot sa pagbuhat kon unsay matarong sa panan-aw sa Diyos. . . . Ako nagtuo nga ako nagsunod sa mga dalan sa Diyos ug nagbuhat sa Iyang buluhaton. Nganong mahitabo kini sa akong pamilya?” Tungod sa iyang pagpangita sa mga tubag migawas ang iyang popular nga librong When Bad Things Happen to Good People.

Si Kushner usa ra sa daghang teologo nga naningkamot sa pagtubag sa pangutana kon nganong gitugotan sa Diyos ang kadaotan. Sa pagkamatuod, ang tawo nagbutang sa Diyos sa usa ka husay. Unsang hukom ang nakab-ot ni Kushner ug sa ubang teologo? Matarong ba ang ilang hukom?