Usa ka Gumonhap Alang sa Sinserong mga Katoliko

Niadtong 1984 ang Batikano nagpadalag instruksiyon nga nagsaway sa teolohiya bahin sa kagawasan, ug si Leonardo Boff, usa sa “labing kontrobersiyal” Katolikong mga teologo, gisentensiyahan sa usa ka tuig nga “pagpakahilom ingong penitensiya”—usa ka silot nga gipahamtang sa simbahan nga nagdili kaniya sa pagpatik o paghatag ug mga interbiyo o pagpahayag sa bisan unsang paagi sa iyang giduhaduhaang teolohiya.

Apan sa 1986, usa ka tuig una matapos ang ‘tuig sa pagpakahilom,’ si Boff gihatagag amnestiya. Ang Instrucción Sobre Libertad Cristiana y Liberación (Instruksiyon Bahin sa Kristohanong Kagawasan ug Liberasyon) gipagawas, nga nagpahayag nga “bug-os angay nga molihok kadtong nagaantos sa pagdaugdaog gumikan sa mga tag-iyag bahandi o politikanhong gahom pinaagi sa dalawaton sa moral nga paagi . . . ” Ang “armadong pakigbisog” giaprobahan ingong “kataposang dangpanan.” Ang iglesya nagtul-id ba sa kaugalingon?

Dili sumala sa awtor sa bag-ong instruksiyon, si Joseph Cardinal Ratzinger, ang pangulo sa Sagradong Kongregasyon sa Doktrina sa Pagtuo sa Batikano. “Ang unang instruksiyon wala kawad-i sa bili niini,” siya miingon. “Ang ikaduhang dokumento maoy pagpadayon.” Apan ang uban, sama sa prensa, nagbatbat sa ikaduhang instruksiyon ingong “usa ka bag-ong baroganan bahin sa ‘teolohiya bahin sa kagawasan.’” Nganong may panagsumpaki?

Ang mainampingong paghan-ay sa mga pulong sa bag-ong instruksiyon mahubad sa nagkalainlaing paagi. Pananglitan, kini nagaingon nga “dili angay nga ang mga pastor sa iglesya laktud manghilabot sa politikanhong katukoran ug organisasyon sa katilingbanong kinabuhi.” Sumala sa maidlotong gipahayag sa magasing Newsweek: “Kanang matanga sa pinulongan nagahatag ug dakong luna nga niana ang kleber nga mga klero . . . makamaneobra.”

Usa ka taho nag-ingon nga ‘halos ang tanan sa iglesya makakaplag ug butang iyang kauyonan.’ Ang tigpasiugda sa kagawasan sama ni Gutiérrez karon makaingong “ang teolohiya bahin sa kagawasan usa ka ilhanan sa mga panahon sa Latin Amerika ug giila kining ingon sa iglesya,” samtang ang konserbatibong Katoliko mahimong maglipay nga ang iyang iglesya “kusog gihapong nagasupak sa Marxistang doktrina sa collectionism tungod sa paghikaw sa kagawasan sa tawo.” Bisan pa niana, ang nagkalainlaing mga pagtuo sa teolohiya bahin sa kagawasan nahasupak sa tradisyon sa iglesya ug nagapadayon sa pagpaaway sa mga Romano Katoliko sa usag usa.

Hinunoa, si apostol Pablo nagatambag sa matuod nga mga Kristohanon: “Husaya ang mga kabingkilan sa inyong taliwala, ug inay maglalis sa inyong kaugalingon, . . . maghiusa . . . sa inyong pagtuo ug sa buhat.” “Magkahiusa sa inyong mga pagtuo . . . nga may usa ka katuyoan ug usa ka hunahuna.” (1 Corinto 1:10; Filipos 2:2)a Unsay imong gituohan? Ang mga Romano Katoliko ba ‘nahiusa sa ilang mga pagtuo’?

[Mga footnote]

[Mga Letrato sa panid 7]

Ang iglesya ba ‘nahiusa sa mga pagtuo’?

[Tinubdan]

Hulagway sa UN