Takos ba Kini sa Riyesgo?

ANG Newsweek sa Agosto 10, 1987, may hapin nga “Ang Nawong sa AIDS—Usa ka Tuig nga Epidemya.” Sa 12 ka panid dihay mga letrato sa kapin sa 300 ka biktima sa AIDS sa Tinipong Bansa. Sila tipik rang bahin sa kapin sa 30,000 sa Tinipong Bansa nga namatay sa AIDS hangtod niining petsaha. Ugaling, labing menos 17 niadtong giletratohan nakakuha sa ilang AIDS tungod sa abuno sa dugo o mga produkto sa dugo sama ra sa libolibo pang uban.

Ang sampol nga mga hinungdan sa AIDS sa maong mga kaso mao: “Naladlad sa dugong apektado sa virus panahon sa siruhiya,” “Natakdan tungod sa abuno sa 1983,” “Natakdan tungod sa abuno, natakdan niya ang iyang bana ug usa ka anak lalaki,” “Ang abuno sa dugo naghatag kaniyag AIDS,” “Nakakuhag AIDS tungod sa abuno sa dugo panahon sa siruhiya niadtong 1981,” “Hemophiliac; iyang batang anak lalaki namatay sa AIDS ug iyang asawa dunay ARC [AIDS related complex],” “Iyang nakuha ang AIDS gikan sa usa ka abuno sa dugo, ug giantos niya ang tulo ka tuig sa kasakit, paralisis ug nagkagrabeng pagkabuta.”

Ang usa ka kaso, usa ka 13-meses nga bata “namatay, maingon man ang iyang inahan, gumikan sa nakontaminar nga abuno sa dugo.” Ang usa ka dos-anyos nga batang babaye “giabunohan ug dugo wala madugay tapos sa pagkatawo” ug namatay tungod sa AIDS.

Tungod niining dayag nga mga riyesgo, nganong ang pila ka awtoridad nagapugos gihapon sa mga abuno sa dugo diha sa hamtong nga mga Saksi ni Jehova ug sa ilang mga masuso? Sa kadaghanang kaso, adunay kapuling mga tambal, ug ang mga Saksi ni Jehova malipay gayod nga mokooperar sa bisan unsang terapiya nga dili manghilabot sa pagdili sa Diyos batok sa sayop nga paggamit sa dugo.—Levitico 17:11, 12; Buhat 15:28, 29.

[Letrato sa panid 31]

Mga masuso, nga natakdan tungod sa mga abuno sa dugo, nangamatay sa AIDS