Gikan sa Among mga Magbabasa

Holocaust Ang akong asawa ug ako buot mopahayag sa among pasalamat ug lalom nga apresasyon alang sa prangka ug matin-aw nga pinulongan nga gigamit diha sa mga artikulo bahin sa Holocaust. (Abril 8, 1989) Ang mga hulagway ug ang mapa nakatandog kaayo namo. Sila nagpakita sa kapintas ug kamananapon sa tawhanong sistema. Ilabinang nawili kami sa artikulo sa pagkabanhaw, nga positibo kaayo ug makapahupay! Bisan pa nga wala gayod kami sa personal makaagi niining mga butanga, hinungdanon kaayo ang paghisgot bahin kanila ug sa paghinumdom kanila.

I. L., Pederal nga Republika sa Alemanya

Buot ko lang pahalipayan ang inyong mga magsusulat. Sila sa tino nakahimo sa ilang homwork. Kadtong isyuha magpabilin sa akong librariya hangtod nga ako mamatay! Bisan pa nga dili gayod ako mahimong usa ka ‘Saksi ni Jehova,’ buot ko lang pahibaloon kamo nga dunay mga tawo nga nagapasalamat kaninyo sa maong impormasyon.

A. S., Tinipong Bansa

Edukasyon Gipanamastamasan sa inyong artikulo ang upat-ka-tuig nga silid sa unibersidad. (“Mga Batan-on Nangutana . . . Unsang Karera ang Akong Pilion?” Mayo 8, 1989) Kamo nag-ingon: “Ang usa ka silid sa unibersidad mahimo o mahimong dili magpauswag sa imong kalaoman sa panarbaho.” Ang inyong gipasabot mao nga dunay dakong kalagmitan nga ang usa ka silid dili makatabang sa usa sa pagkakitag trabaho. Kini sa yano dili tinuod! Apan kamo nagauyon sa duha ka tuig nga mga programa sa kolehiyo.

A. N., Tinipong Bansa

Ang among tuyo dili ang pagpanamastamas sa edukasyon sa unibersidad kondili sa pagdasig sa mga batan-on sa pagkuhag karera diha sa pag-alagad sa Diyos. Kami modawat nga, sa kasarangan, ang graduwado sa unibersidad mas dako ug suweldo ug dili kaayo mag-antos ug pagkawalay trabaho kay sa mga graduwado sa hayskol. Bisan pa, ang usa ka silid sa unibersidad dili makagarantiya ug pinanisyal nga kalamposan—usa ka kamatuoran nga gipamatud-an sa kasaligang mga awtoridad. Ang duha ka tuig nga programa gihisgotan ingong yanong kapilian nga hunahunaon sa pipila ka batan-on kon ang ilang mga ginikanan moinsister sa ilang pagtungha ug unibersidad. Kon unsang sekular nga edukasyon ang padayonon sa usa sa bug-os maoy personal nga butang. Apan samtang pagatagdon ang ekonomikanhong mga kamatuoran, kinahanglang timbangtimbangon sa Kristohanong mga batan-on ang posibling dili-maayong epekto sa pagkaladlad sa palibot sa unibersidad diha sa ilang espirituwalidad. (1 Corinto 15:33) Kinahanglan hinumdoman usab nila ang usa ka butang nga wala ipakita sa estadistika sa panarbaho—ang saad sa Diyos sa pagtagana alang niadtong nagauna sa iyang intereses. (Mateo 6:33)—ED.

Ozone Gihatagan ako sa akong magtutudlo ug tinudlong-buluhaton sa paghatag ug taho mahitungod sa bag-ong problema sa kinaiyahan. Akong gipili ang ulohang “Lungag nga Ozone,” nga diin ang Enero 22, 1989, nga gula dakog natabang. Salamat sa impormatibong materyal nga gipadayag diha sa artikulo, nakakuha akog dako kaayong grado.

C. B., Pederal nga Republika sa Alemanya

Biktima sa AIDS Buot kong ipahayag ang akong gugma ug pagpaluyo alang sa usa ka batan-on kinsa misulat “Usa ka Butang nga Mas Grabe Kay sa AIDS.” (Abril 22, 1989) Ang iyang pagkamapainubsanon ug apresasyon nakita.

B. E., Tinipong Bansa

Gibasa nako ang artikulo nga dunay luha ang akong mga mata ug nasubo. Ako usab dunay anak nga lalaki nga mibiya kang Jehova. Sulod sa 13 ka tuig kami nagtan-aw niya nga nangitag kalipay. Samtang nagpabilin kaming malig-on alang sa mga sukdanan ni Jehova, among gipasaligan kanunay si Wayne sa among gugma. Apan siya naimpluwensiyahan sa alkohol ug cocaine. Ang iyang kamatayon bug-os wala dahoma, bisan pa nga nagkinabuhi ako kanunay sa kahadlok sa mahitabo unya. Siya 28 anyos. Maoy akong pag-ampo nga ang ubang mga batan-on makakuhag kaayohan gikan sa eksperyensiya sa batan-on, aron sila dili mobiya kang Jehova ug magabayad ug dako.

S. E., Tinipong Bansa