Ang Luspad nga Kabayo Nagapadayon sa Pagdasdas
ANG propetang si Juan gidasig sa Diyos sa pagtagna sa usa ka panahon sa dihang ang mga epidemya sa sakit molukop sa yuta sama sa usa ka nagadasdas luspad nga kabayo nga gisakyan sa kamatayon. (Pinadayag 6:8) Ang makalisang nga pagkanat sa AIDS maoy dugang makapasubong pamatuod nga kita nagapuyo sa maong panahon. Ngani, ang opisyales sa panglawas sa New York City nagbatbat sa kusog nga pagtubo sa AIDS ingong “ang epidemya nga taliabot.”
Sa Thailand, 70 sa 73 ka probinsiya karon nagatago sa AIDS nga virus. Sa 1987 1 porsiento lamang sa mga tiggamit ug droga sa Bangkok ang dunay AIDS; sa tunga sa 1989 kapin sa 40 porsiento ang duna niini. Ang Brazil nagadahom ug 75,000 girekonosir nga kaso sa AIDS sa tulo ka tuig, uban sa 1.5 milyon nga uban nga natakdan niini. Sa 1,200 ka bangko sa dugo sa Brazil, 20 porsiento lamang ang nagsusi sa ilang suplay sa dugo sa 1988, ug 14 porsiento sa masakiton sa AIDS ang nakakuha sa sakit gikan sa natakdan nga dugo. Sa Rio de Janeiro ug São Paulo, mga 75 porsiento sa mga hemophiliacs ang natakdan. Sa Côte d’Ivoire, abot sa 10 porsiento sa mabdos nga mga babaye ug 10 porsiento sa mga nagdonar ug dugo ang may AIDS.
Ang usa ka Amerikanong medikal nga opisyal sa usa ka 87-nasod nga tigom bahin sa AIDS miingon: “Ang epidemya sa HIV [ang virus sa AIDS] nga impeksiyon dili na makontrolar sa Tinipong Bansa ug sa kalibotan.” Ang U.S. Centers for Disease Controls nagabanabana nga sa pagka 1998 usa ka milyong Amerikano ang magbaton sa bug-os-naugmad nga sakit, uban sa daghan pa nga nagbaton sa virus. Ang mga banabana sa gidaghanon nga nakabaton na sa virus karong bag-o giusab nga pataas kaayo. Sa New York City, ang AIDS karon mao ang ikatulong pangunang hinungdan sa kamatayon, nga nalupigan lamang sa sakit sa kasingkasing ug sa kanser.
Ang mga bangko sa dugo gikiha tungod sa paghatag sa dugong natakdan sa AIDS para sa mga abono. Ang ubay-ubay gimandoan sa pagbayad ug danyos. Sila tingali moatubang pag daghang asunto. Mimulo ang pangunang abogado sa American Association of Blood Banks: “Unsa ba ang umaabot? Wala ako masayod. Ang pinakadaotang talan-awon mao nga mahanaw na ang mga sentro sa dugo.”
Sa dili madugay, mahanaw na gayod ang tanang bangko sa dugo kay haduol na kita sa panahon nga makakita sa usa ka kalibotan nga walay AIDS, usa ka kalibotan nga walay mga ospital, sakit, o kamatayon. Si Juan, kinsa mibatbat sa pagsakay sa luspad nga kabayo, misulat usab sa saad sa Diyos sa “usa ka bag-ong yuta,” sa usa ka tawhanong kapunongan nga nahigawas sa hampak sa sakit. (Pinadayag 21:1-4) Dinalian ang pagtulotimbang sa maong saad karon, kay kasamtangan ang luspad nga kabayo nagapadayon sa pagdasdas.