Hain Nagapadulong ang Kahugpongan sa mga Obrero?

Sinulat sa koresponsal sa “Pagmata!” sa Canada

“ANG bahandi mousbaw, ug ang mga tawo madunot,” matud sa usa ka magbabalak. Bisan pa niana, daghan ang makabig sa panghaylo sa di-matapos nga pagtigom sa materyal nga katigayonan. Kana ang hinungdang ang kapitalismo migimaw sa Edad Media.

Ang mga obrero o mamumuo nakaamgo nga, alang sa daghan, ang pagkadaot sa matang sa kinabuhi kasagarang nagaduyog sa kapitalismo. Aron panalipdan ang ilang kaugalingon, nagporma silag mga unyon. Sa bisan diin milambo ang kapitalismo, ang kahugpongan sa mga obrero naugmad.

Bisan pa niana, ang mga kritiko ug bisan ang pila ka tigpaluyo nagpahayag ug kabalaka nga ang organisasyon sa mga obrero tingali nagakadaot. Ang kolumnistang si Anthony Westell mipasangil: “Ang kahugpongan sa mga obrero nagakinabuhi sa kagahapon, nga dili gustong magbag-o.” Ang The Economist, ubos sa ulohang “Nagkagamayng Pundok sa mga Igsoon,” miingon nga ang Britanikong mga membro sa unyong pamatigayon mikunhod sa “labing menos duha ka milyon” sa lima ka tuig. Ang propesor sa University of Illinois si Adolf Sturmthal misulat kabahin sa “krisis sa internasyonal nga kahugpongan sa mga obrero.”

Ang mga estadistika daw nagapaluyo sa ilang mga kaplag. Ang Japan Quarterly mitahog pagkunhod sa sakop-sa-unyon nga mga obrero gikan sa 32 porsiento sa 1960 ngadto 29 porsiento sa 1984 ug sa Tinipong Bansa gikan sa 33 porsiento ngadto 19 porsiento. Bisan pag giangkon sa Britanya ug Kasadpang Alemanya ang mga pag-usbaw, ang The German Tribune miingon nga “ang hulagway dili sama ka rosason sa ipasabot tingali sa mga numero.” Nagpahayag kini sa pagkawagtang sa pagkakomitido sa mga membro ug mga pag-usbaw sa walay-unyon nga mga sektor sa ekonomiya. Ang mga membro sa unyong pamatigayon sa Australia, matud sa Far Eastern Economic Review, bisan pag taas nga 55 porsiento, “gipig-it sa pagbati sa kabalisa, sa krisis pa.”

Mga Problema Sulod sa Kahugpongan sa mga Obrero

Aron molampos, ang mga obrero kinahanglang magkahiusa. Bisan pa niana, ang daghang kahugpongan sa mga obrero wala magkahiusa. Ang The Times sa London miingon nga tungod sa kausaban sa mga tinamdan sa trabaho, ang pagpresentar sa “usa ka punto de vista sa empliyado kaduhaduhaan; kini dayag nga wala.” Ang mga welga sa Australia kasagarang ipahinabo sa mga lalis bahin sa teritoryo tali sa mga unyon. Kay ang mga unyon nakig-away sa mga unyon sa Canada, ang mga sakop sa unyon gitahong napungot sa gamit-sa-kusog nga mga taktika sa usa ka unyon nga nagsukad sa Tinipong Bansa. Kapig 400 ka obrerong gipaluwat sa trabaho sa Canada nag-akusar sa duha ka unyon sa “pagtikyaob sa . . . kasabotan” nga makaluwas unta sa ilang mga trabaho.

Ang ikaduha sulodnong problema nga nagahasi sa mga unyon mao ang kakulang sa pakigsaad. Ang mga obrero, nga sa nangagi blue-collar pakusog nga trabaho lamang, sa mausbawon maoy klerikal, teknikal, o propesyonal. Kining sektor nga white-collar “sa naandan nahimong lisod nga masulod sa mga unyon,” matud sa Labour Law and Industrial Relations in Canada.

Alang sa daghan, ang pagkamembro sa usa ka unyon maoy kinahanglanon. Tagda ang pananglitan sa usa ka graduwadong inhenyero nga miduyog sa mga trabahante sa usa ka departamento sa gobyerno. Giingnan niya ang Pagmata!: “Wala gani ako sultihi nga ako apil sa unyon. Ang akong ngalan nakita lamang sa listahan sa mga membro. Sa dihang gisirkular ang pagbotar alang sa welga, ako wala makaangay sa usa o laing paagi, mao nga ako wala mobotar.”

Ang korapsiyon o kriminal nga kalihokan makaamot sa pagkadili-makaangay. Sa New York City, ang usa ka dakong husay sa iladong kriminal nga mga gang nakadiskobreg kaylap nga kalangkitan sa unyon. Ang pila ka Australianong unyon gitahong “napunog mga kriminal.” Ang dili-legal nga mga aksiyon panahon sa bag-ong Canadianong mga welga misangpot sa kapig 700 ka pagdakop, apil ang usa ka politikal nga pangulo sa probinsiya.

Mga Problemang Dili Magamhan sa Unyon sa Obrero

Ang ubang mga hinungdan nga dili magamhan sa unyon nakapahigawad sa mga lider sa mga obrero. Ang tawhanong katilingban anaa sa kagubot. Nagkatun-as ang panaghigala sa mga membro sa unyon. Usa ka tawo​—49 anyos nga usa ka tiggamag boiler ug sa usa ka panahon piniyalan sa talyer​—misugilon sa Pagmata! bahin sa pagkagamay rag bili sa iyang pagretiro alang sa kaubang mga membro sa unyon: “Sa kataposan kong adlaw, ilang gilibot ang usa ka kalo ug gihatagan akog $35. Duha ka tawo ang nakiglamano, ug mao ra to. Kay ako gipuwera man sa trabaho panahon sa depresyon, ako kulag unom ka bulan sa pagka 50 anyos, mao nga ako wala makakuha sa kasagarang bulawang relo!”

Sa usa ka gidak-on, ang pagpaniglain maoy sangpotanan sa pagkapakyas sa pagpabiling maunongon sa makasaysayanhong mga mithi. Ang pila ka intereses sa negosyo sa unyon mitubo nga nahimong dagkong mga imperyo diin ang unyon mao ang agalon. Miingon si Gerald Stewart sa The Canberra Times: “Ang mga unyon nawad-an sa ilang moral nga katungod sa pagsaway sa kapitalismo sa gikopya niini ang dili maanindot nga mga hiyas niini.”

Ang teknolohikal nga kausaban ug mga paghinay sa negosyo tingali mosangpot sa mas diyutayng mga posisyon sa trabahong assembly-line. Ang magasing Time mitahog pagkunhod sa blue-collar nga trabaho sa Milwaukee gikan sa 223,600 sa 1979 ngadto sa 171,300 sa 1986. Unya, usab, ang mas bag-ong mga matang sa trabaho makadani sa mga batan-ong may ispisipikong mga kahanas. Ang unyong pamatigayon dili kanunay nahiangay niining matanga sa linaing obrero.

Dili lang kuwarta ang gipangita sa mga obrero. Apan ang mga serbisyong day-care, mas mugbong semana sa trabaho, mapaayon-ayong mga turno, pag-ambitay sa trabaho, ug mga plano sa panglawas tingali makabenepisyo lamang sa pila ka kategoriya sa mga obrero. Mas lisod sa bisan unsang usa ka organisasyon nga ikapadapat ang daghan kaayong intereses. Ug ang mga agalon kasagaran nagalikay sa mga unyon pinaagi sa pagtanyag sa mamugnaong mga benepisyo nga laktud sa mga empliyado.

Sa pila ka nasod, ang politikal o relihiyosong pagkalangkit sa mga unyon nakapatunghag mga pagsaway gikan sa mga membro. Basin dili nila gusto nga gamiton ang mga bayad sa pagkamembro sa pagsuportar sa mga kalihokang dili sila mouyon. Ang Canadianhong mga korte naglaban sa katungod sa usa ka membro sa pagdumili sa pagbayad sa mga bayranan sa usa ka unyon sa maong kapasikaran.

Bisan tuod ang kinalabwang hinagiban sa unyon mao ang welga, kini dili na kaayo malamposon kay sa nangagi. Sa Canada ang usa ka ministro sa hustisya sa probinsiya miawhag sa pagwagtang sa katungod sa mga polis sa pagwelga, ug ang Quebec mipasakag estriktong mga balaod sa pag-atubang sa dili-legal nga mga welga sa sektor maylabot sa panglawas. Sa Tinipong Bansa, ang pederal nga gobyerno misalga aron bungkagon ang unyon sa air-traffic controllers sa miwelga kini. Ang ubang nasod, sama sa Australia, may pinugos nga paghusay.

Ang mga agalon o kompaniya nakaugmad ug mga estratehiya sa pagbungkag sa unyon. Ang ubay-ubayng dagkong korporasyon nakaagom sa usa ka matang sa pagkabangkrap aron makaikyas sa bug-at nga mga kontrata sa unyon. Ang uban mikiha tungod sa paghasi, samtang ang uban naghugpong aron maghiusa batok sa kalihokan sa unyon.

Mga Pagpasibo Aron Makalahutay

Sa daghang bahin, ang mga panginahanglan nga sa sinugdan nagpatungha sa kahugpongan sa mga obrero wala na maglungtad. Ang katilingbanong mga balaod​—nga giagda sa organisadong mga obrero​—karon nagapanalipod sa mga bata, nagahatag ug pinakagamayng mga sukdanan sa trabaho, ug nagapanalipod sa hinugpong nga hangyoay. Apan nasabtan sa mga lider sa mga obrero ang gahom sa dakong negosyo ug nag-usbaw nga kawalay-trabaho diha sa pila ka nasod ingong pamatuod sa padayong panginahanglan niini.

Ang bag-ong mga kaliwatan sa mga lider sa mga obrero nagahaling na usab sa suportar. Sa pag-ila nga ang mga unyon dili na popular sa kadaghanan sa publiko, usa ka presidente sa unyon miingon nga “ang lider sa obrero karong adlawa nagasusi pag-ayo sa preparasyon ug panukiduki,” inay sa pagdukdok sa lamesa. Aron sila molampos gikinahanglan ang mga kausaban sa organisasyon ug mga paagi sa mga unyon sa mga obrero.

Sa pila ka industriya, ang kahugpongan sa mga obrero nagpahiuyon ug nakalahutay. Ang mga tiggamag kotse nakabatog daghang pagtugot gikan sa mga unyon sa industriya aron mouswag ang pagkamabungahon. Ang bag-ong mga pabrika nga nagakunhod sa mga obrero sa pagpalabi sa kahikayan sa mga robot nakadani usab sa suportar sa unyon. “Adunay kabalaka,” miangkon ang usa ka opisyal sa unyon maylabot sa usa sa maong operasyon, “apan anaa usab ang pagbati sa kahimoan nga ang atong mga tawo nakabatog bahin.”

Bisan tuod ang pila ka unyon supak sa paningkamot nga menosan ang mga obrero, ang uban nakigkompromiso sa tagdumala ug nagaeksperimento pinaagi sa pag-ambitay sa trabaho, o rotasyon sa trabaho. Ang Seafarers International Union of Canada maoy usa ka pananglitan. Ang usa ka sulay nga proyekto nagataganag mga yunit alang sa upat ka tawo, nga ang matag usa kanila, sa eskedyul nga may rotasyon, nagatrabahog 90 ka adlaw sa usa ka panahon ug dayon moundang sa 30 ka adlaw. “Ang dakong bentaha,” nagtaho ang Globe and Mail sa Toronto, “mao nga mas daghang marinero ang makabatog trabaho.”

Bisan tuod may iladong mga kapakyasan sa pagpormag mga unyon sa mas daghang industriya, ang mga unyon nagmalamposon gihapon taliwala sa gagmayng mga agalon o mga kompaniya. Sa usa ka Canadianhong probinsiya, 42 lang sa 704 bag-ong yunit nga nasertipikahan sulod sa usa ka tuig ang nakapatrabaho sa kapig gatos nga tawo. “Apan nahanaw na sa kinadak-ang bahin ang mga adlaw sa dihang ang mga unyon makadugang ug daghan kaayong membro,” miingon ang usa ka maniniid.

Tin-aw, daghan sa mga hinungdan sa kadaot sa kahugpongan sa mga obrero, sama sa pagkadaot sa katilingban sa linangkob, dili magamhan sa tawo. Ang mga lalaki ug mga babaye nga nakabig sa kahugpongan sa mga obrero tungod sa tinguha sa mas maayong kalibotan angay dayegon tungod sa sinsero nilang paningkamot sa pagtabang sa ilang isigkatawo. Ang mga tawong matarong ug hunahuna nagaila sa maong mga paningkamot sa pagbatog mas maayong mga kondisyon sa trabaho. Bisan pa niana, ang kahimtang karon sa mga unyon sa mga obrero nagahatag ug usa pa ka ebidensiya sa maayog-tuyo pero tawhanon lamang nga mga institusyon nga naanod na gayod sa atong lisod nga mga panahon.​—2 Timoteo 3:1-5.

[Kahon sa panid 19]

Kapitalismo

Sumala sa usa ka diksiyonaryo, ang kapitalismo maoy usa ka sistema diin “ang galamiton sa produksiyon ug distribusyon gipanag-iyang pribado ug gipalihok alang sa ganansiya.”

Si Jakob Fugger, usa ka datong negosyante sa Edad Media nga taga Augsburg, Alemanya, nagdumala usab sa Heneral nga Ahensiya sa papa, nga nangolekta sa mga bayad alang sa mga indulhensiya. Ang historyanong si Erich Kahler nagtuo nga ang kapitalismo nagsugod kang Fugger, nga misulat:

“Ang pila ka modernong ekonomista ug sosyologo naningkamot sa pagpamatuod nga may mga ilhanan sa kapitalismo balik sa Babilonya. Apan ang ilang nadiskobrehan dili kapitalismo. Ang kapitalismo dili sama sa bahandi ug mabalhing propiedad, kini dili sama sa pagpanapi ug pagpahulam ug kuwarta, dili gani mabungahong pagpuhunan diha sa propiedad. Kining tanan dili kapitalismo mismo, kay kining tanan mahimong nagaalagad sa usa ka prinsipyo sa kinabuhi, nga lahi sa ekonomikanhong mga tumong, kini mahimong buhaton alang sa usa ka tawhanong tuyo, usa ka tawhanong katuyoan, alang sa butang nga mapahimuslan sa usa ka tawo. Apan dinhi, sa unang panahon, . . . ang negosyo mismo, pagpanapi mismo, produksiyon sa mga manggad ug pagtigom sa mga kaharuhay, nakabaton nianang gahoma ibabaw sa tawo nga gigugol niya ang tanan niyang kusog, iyang kasingkasing, tanan niyang presente ug ugma, tanan niyang pagkatawo, sa literal nga kahulogan sa pulong, diha sa naghiwasa, kanunayng nagatubo ug nagahurot sa produksiyon sa kaugalingon, usa ka produksiyon, nga ang pangataposang kahulogan niana bug-os nawala ug nahikalimtan niya.

“Ug kini ang sinugdanan sa kapitalismo, nga mao ang pagmando sa kapital ibabaw sa tawo, ang pagmando sa ekonomikanhong obra ibabaw sa tawhanong kasingkasing. Dinhi nagsugod ang awtonomiya sa ekonomiya, ang naghiwasa, waykinutobong pag-uswag sa pagpahimulos sa kinaiyahan ug produksiyon sa mga manggad nga wala nay mausa ang may panahon o katakos sa pagpahimulos. Ang sangpotanan sa maong kaugmaran karon tin-awng nadayag.”​—Man the Measure.

[Kahon sa panid 20]

Kasaysayan sa Kahugpongan sa mga Obrero

Ang “kahugpongan sa obrero” o labor movement mao “ang pulong gigamit sa pagtawag sa tanang organisadong kalihokan sa mga obrero nga ang ilang mga katuyoan mao ang pagpaarang-arang sa ilang mga kahimtang sa pagkakaron o sa ugma-damlag.”​—The American Peoples Encyclopedia.

Ang pipila nag-angkon nga ang pagdumili sa Hebreohanong mga ulipon sa Ehipto sa paggamag mga tisa nga walay dagami mao ang unang welga sa mga obrero, apan ang mga Israelinhon dili man mga obrero; sila mga ulipon. (Exodo 5:15-18) Sa samang paagi, ang pagpabalik ni apostol Pablo kang Onesimo ngadto kang Felimon dili mapadapat sa mga obrero sa pagkaaging si Onesimo usa man ka ulipon.​—Felimon 10-20.

Ang kaugmaran sa mga kapunongan sa mga batid, mga asosasyon sa mga batid nga mamumuhat nga nagpatrabaho sa mga obrero ug mga aprentis, sa ika-14 ug ika-15ng mga siglo naghatag sa dalan sa mga unyon. Ingon ka sayo sa 1383, sumala sa The History of Trade Unionism, ang sinuholang mga tawo “naghugpong batok sa ilang mga magmamando ug mga gobernador.”

Ang unang balaod sa pamuo sa Inglaterra mao ang Ordinansa sa mga Obrero (1349 o 1350). Ang Statute of Apprentices (1563) naglagda sa mga relasyon sa pamuo sa Inglaterra sa daghang kaliwatan. Sa ika-20ng siglo, ang kadaghanang nasod nagpaluag sa mga balaod nga nagapiot sa mga unyon.

Ang I.L.O. (International Labor Organization) natukod sa 1919 ubos sa Artikulo 23 sa Kasabotan sa Liga sa Kanasoran ug nagalungtad gihapon. Ang mga kasabotan sa I.L.O. gisagop sa mga balaod sosyal sa kadaghanang nasod.

Ang mga unyon gitugotan sa balaod sa kadaghanang nasod. Sila tingali open-shop nga mga unyon, nga niana ang mga empliyado mahimong moapil o dili aron makasulod sa trabaho, o closed-shop nga mga unyon, diin ang pagkamembro obligado ingong usa ka kondisyon aron makasulod sa trabaho.