Pusil—Dili Lamang Para sa mga Lalaki

DIHA sa kalibotan sa paanunsiyo, ang matso ug maskuladong lalaki nga nagdalag riple nga gisapnay sa iyang bukton gigamit aron sa pagpamaligyag daghang produkto. Anaa na ang tanan​—sigarilyo, awto, mga senina, mga rebolber ug daghan pa, nga mahunahunaan sa handurawan sa tigpaanunsiyo.

Sa Tinipong Bansa ilabina, ang mga lalaki gipasundayag nga daw kaluha sa ilang mga pusil. Diha sa mga plasa sa lungsod, ang mga estatuwa gipatindog alang sa maisog nga mga bayani nga dunay pusil diha sa ilang mga kamot o sa ilang kilid. Bisag walay mga kapsiyon, ang mga hulagway nga naglarawan sa mga panahon sa dili-sibilisadong Kasadpan mailhan dayon tungod sa unom ka bala nga rebolber nga gibakos sa bat-ang sa lalaki. Daghan na ang nahimong mga pelikula diin ang pulong “pusil” naapil sa mga ulohan. Ang mga salida sa telebisyon ug mga salida nga gidugokan buhi sa tingog sa rapido nga pinusilay​—ang mga bidang lalaki ug ang mga kontrabida nagpinusilay sa tanang situwasyon ug lokasyon. Ang mga tawong talawan nahimong macho tungod sa pagdala ug rebolber o riple, nga may tinuod tan-awong esena sa patay nga nagbuy-od sa ilang tiilan.

Apan nagkadaghang mga babaye karon nalangkit sa mga pusil. Sa ulahing kawhaang mga tuig, ang mga telebisyon nabuhi uban sa mga babayeng detektib ug mga espiya nga nakigpinusilay sa mga kontrabida ug hawod nga moigo ug mas gamhanan nga mobuto.

Sila nagpanon ngadto sa punta-blangkohan sa rebolber ug riple, gisigehan ug pusil ang mga poster sa mga lalaki nga samag-tawong gidak-on ug giigo ang tunga sa ilang mga mata.

Busa dili ka angay makurat kon mahibalo nga ang mga rebolber nga gidesinyo alang sa mga babaye ginabaligya na ug himalitan kaayo. “Mga Miss, ikaw dili mogamit ug deodorante alang sa mga lalaki,” misulat ang usa ka babayeng reporter, “busa nganong mogamit man ug rebolber alang sa lalaki? Gusto ka ug rebolber nga gaan, nga dili makasabod sa imong kuko, gamayng rebolber nga grabe kon makaigo. Tingali gusto ka ug .38 kalibre nga LadySmith . . . sinaw nga pagkaasul, o plata, ug makapili ka sa gitas-on sa tubo sa pusil.” Usa ka eksperto mipahayag sa iyang opinyon kon unsay gusto sa mga babaye diha sa mga pusil: “Ang mga babaye gusto sa pusil nga nindot tan-awon. Gusto niya nga kini matahom tan-awong butang nga iyang isulod sa iyang bag. Gusto niya nga moangay kini sa iyang compact o pulbera ug sa iyang salamin . . . Daghang kababayen-an gustog mga butang nga moangay ug moterno ang kolor. Dili sila gusto nga ngil-ad o daotan kining tan-awon . . . Gipalit niya kini alang sa proteksiyon apan, sa laing bahin, dili niya gusto nga maut kining tan-awon.”

Ang ubang mga rebolber nga gidesinyo alang gayod sa eleganteng babaye mao ang .38 kalibre nga may lima ka bala ug may kapilian nga duha ka tubo nga gitas-on nga pusil​—singko sentimetros ug otso sentrimetros nga masulod sa bag. Ang uban adunay sinaw, kurbadog kaptanang kahoy, ug ang uban mabugnaw ug kolor. “Maanindot kaayo sila,” miingon ang usa ka babaye, “ug, sa akong hunahuna, gaan nga gamiton.” Unya, usab, dunay bag-ong mga bag nga may bulsa-bulsa nga gituyo paghimo alang sa mga rebolber sa mga babaye. “Ang babayeng adunay rebolber nga walay espesyal nga sudlanan nangita ug problema,” miingon ang usa ka babaye. “Masudlan ang imong rebolber ug mga mumho sa biskuwit ug mga kendi diha sa tubo sa rebolber, o sigarilyo, kon ikaw manigarilyo, o bisan unsa nga mabilin sa ilalom sa bag sa babaye.” Nakita nang daan sa uban ang panahon sa dihang ang babaye nga magdala ug pusil maoy sama na lang unya ka ordinaryo sa pagdala ug payong.

Nagakadaghan Sila

Ang dili pa dugay nga surbi nagpakita nga sa 1983 ug sa 1986, ang mga babaye nga dunay pusil sa Tinipong Bansa “misaka ug duolan sa 53 porsiento ngadto sa kapin sa 12 ka milyon.” Ang surbi nagpakita usab nga sulod niadtong tulo ka tuig, “duolan sa 2 ka milyong dugang mga babaye nagplanong mopalit ug rebolber.” Diha sa ubang mga magasin sa babaye, malalangong gikuha ang pagtagad sa panginahanglan sa babaye ug proteksiyon pinaagi sa paglarawan ug usa ka babaye nga mipauli sa balay nga nakakita nga nabuak ang bentana diha sa atubangan nga pultahan. Nag-inusara ba siya nga nagpuyo? Duna ba siyay pusil sa pagpanalipod kaniya kon siya makaengkuwentro ug laing tawo diha sa balay? Ang numero sa telepono sa ubos sa paanunsiyo maoy telepono diay sa usa ka tiggama ug pusil, nga karon nagtanyag ug bag-ong modelo sa eleganteng rebolber alang sa mga babaye.

“Kining maong mga paanunsiyo sama rag nagbubo ug asin diha sa samad,” miingon ang usa ka babaye. Ang rason mao nga sanglit daghang babaye nag-inusarang nagpuyo o mga ginikanang nag-inusara, sila mobati nga dali ra sila maatake sa mapintas nga krimen, nga sa kasagaran adunay maayong katarongan. Diha sa kadaghanang dagkong mga siyudad, ang panglugos nagdaghan. Ang mga babaye ginasakmitan ug mga bag​—ang kadaghanan gitionan ug kutsilyo. Ginaatake ang mga babaye diha sa mga dalan, sa mga parkinganan sa sakyanan, ug diha sa mga tinukod nga opisina nga hayag kaayong dako. Ang mga aparment ug mga balay, mga puy-anan sa mga babaye nga nag-inusarang nagpuyo, ginalungkab samtang natulog ang tagbalay. “Mas maayong makahibalo kitang moatiman sa atong kaugalingon,” miingon ang usa ka babaye, “tungod kay hilabihan na kita ka makalakaw-lakaw diha sa dugang nagakapintas nga katilingban, kinahanglang atimanon nato ang atong kaugalingon.”

“Samtang naglakaw ako paingon sa balay gikan sa trabahoan,” miingon ang usa ka babaye nga giinterbiyo sa telebisyon sa U.S. “May mibira kanako sa likod. Siya adunay kutsilyo ug gitumba ako ug gisakmit ang akong bag. Dihadiha, miingon ako nga kinahanglang molihok ako.” Human nangayog lisensiya aron makadala ug pusil ug sa pagbansaybansay sa pagtiro diha sa punta-blangkohan, unsay iyang tinamdan? “Nawala ang hunahuna ko nga mahuyang. Naghunahuna ako, ako adunay pusil, akong pabuthon kini ug kini makalilisang, wala na ako mobati ug kahadlok. Uban niining usa ka puthaw sa akong mga kamot, makapanalipod na ako sa akong kaugalingon.”

Dayag nga mao kini ang kaisipan sa kapin sa 12 ka milyong mga babaye sa Tinipong Bansa, ug kinsay nasayod kon pila pa ang adunay walay-lisensiyang mga armas? Hayan makalipong ang gidaghanon sa tibuok kalibotan. Kini bang kaisipana, hinunoa, maoy bunga sa dakong pagdukiduki sa mga kamatuoran nga gipakita? Sa dili ka pa mogawas ug mopalit ug armas alang sa pagdepensa sa kaugalingon, palandonga kon unsay gipakita sa mga polis ug sa mga kaihapan.