Gikan sa Among mga Magbabasa

Panukiduki diha sa Kahayopan Ako nagmakuli sa pagbasa sa isyu bahin sa panukiduki sa kahayopan (Hulyo 8, 1990) tungod kay ako nasayod nga kadto maoy usa ka ulohan sa emosyon. Apan inyong gipresentar kini diha sa usa ka takdo ug timbang nga paagi.

N. V., Tinipong Bansa

Sanglit ang panukiduki maoy akong linya sa trabaho, ako mas interesado gayod sa pagbasa kon unsay ginaingon sa Pagmata!. Tin-aw nga ang Bibliya dili supak sa panukiduki sa kahayopan, apan kini wala magpakamatarong sa kabangisan nga gihimo ngadto sa mga hayop. Kon ang akong trabaho nagkinahanglan sa paggamit ug mga hayop sa umaabot, ako unya magmainampingon nga dili usikan sila o magmabangison ngadto kanila.

O. O., Tinipong Bansa

Ang inyong artikulo makapahigawad. Inyong gigugol ang lima ka parapo ngadto sa kapintasan sa mga aktibista (nga dili kaylap). Ang “makahahadlok nga mga estorya,” hinunoa, gisuma diha sa usa ka nagsunod nga ulohan. Sa unsang paagi mamentinar sa usa ka tawo ang timbang nga hunahuna tungod nianang grabeng kabangisan? Oo, ang panukiduki sa kahayopan nakaamot sa medikal nga kauswagan. Apan dili ba kita makapahunong niana karon?

S. F., Pederal nga Republika sa Alemanya

Ang inyong artikulo nagpakitang kamo dapig sa panukiduki sa kahayopan kon kini dili maglangkit sa grabeng pag-antos. Unsa may kapuslanan niini sa dihang malampos ang usa ka butang pinaagi sa pag-antos ug kamatayon sa inosenting mga hayop?

M. B., Tinipong Bansa

Ang panukiduki sa kahayopan maoy usa ka isyu nga makapatukbil sa emosyon, ug ang among artikulo naghatag ug dili kasagarang undanong pagsanong gikan sa among mga magbabasa. Ang Bibliya walay gihimong masangkarong paghukom sa paggamit ug mga hayop sa kaayohan sa katawhan. Apan, hisabtan, nga daghan ang supak sa bisan unsang matang sa pag-antos sa hayop, ug gitahod namo gayod ang ilang mga pagbati niining bahina.​—ED.

Pagkagiyan sa Crack Ako angay nga mosulat sa pagpahibalo kaninyo nga ang inyong mga artikulo bahin sa pagkagiyan sa crack (Hulyo 22, 1990) matulon-anon kaayo. Ingong usa ka giyanon kanhi sa crack, ako nakalingkawas lamang gikan sa pagkagiyan sa crack sa dihang ako misugod sa pagtuon sa Bibliya ug nakig-uban duyog sa mga Saksi ni Jehova. Gigamit ko ang kuwarta nga ibayad sa plete sa balay, ibayad sa sakyanan, ug kinawat nga kuwarta sa pagpalit ug crack. Ako niwang kaayo nga samag usa ka eskeleton na lamang. Apan uban sa pagpaluyo ug paggiya sa mga Saksi ni Jehova, akong nakaplagan ang tambal.

C. H., Tinipong Bansa

Mga Pelikula Ang artikulong “Mga Batan-on Nangutana . . . Hinungdanon bag Unsang Pelikulaha ang Akong Tan-awon?” (Hulyo 22, 1990) mitabang kanako nga makaamgo sa lamat nga ikahatag sa mga pelikula diha sa mga tawo. Dili na gayod ako motan-aw pa ug R-rated nga mga pelikula.

W. R., Tinipong Bansa

Dili ako kanunay nga tigtan-aw ug mga pelikula, busa ako misugod sa pagbasa ug mga libro bahin sa mga hayop, mga arte, ug kasaysayan. Adunay daghan talagsaong mga libro nga maayo ug edukasyonal ug nga walay gigamit nga panampalas.

L. H., Tinipong Bansa

Nagustohan ko gayod ang inyong artikulong “Mga Batan-on Nangutana . . . Sa Unsang Paagi Ako Makapilig Desenteng Pelikula?” (Agosto 8, 1990) Usa ka butang ang nakapalibog gihapon kanako. Puwede ba alang sa usa ka Kristohanon nga motan-aw ug pelikula nga rated PG-13?

R. J., Tinipong Bansa

Sa Tinipong Bansa, ang usa ka pelikula nga rated PG-13 puwede alang sa tanang pangidaron, “apan ang mga ginikanan sa kusganon gipahinumdoman sa paghatag ug linain nga paggiya sa kabataan nga motan-aw nga ubos sa 13.” (“World Book Encyclopedia”) Ang usa ka Kristohanon sa naandan angay nga magbantay kon ang usa ka lilas nagadala sa maong rating. Apan, ang mga rating sa pelikula nagbanaag sa kalibotanong mga sukdanan, dili mga sukdanan sa Bibliya, ug ang maong mga sukdanan sa kanunay dili matinuoron. Busa sa kayutaan diin adunay naglungtad nga sistema sa movie-rating, ang mga indibiduwal kinahanglang modesider ngadto sa unsang gidak-on nga sila giyahan niini. Ang mga batan-on kinahanglang mosunod sa direksiyon sa ilang mga ginikanan. Apan, bisan pa sa daw paborableng rating, ang usa ka lilas mahimong mosangpot nga dili maayo, ang usa makabiya sa sinehan o makapalong sa iyang telebisyon.​—ED.