Gikan sa Among mga Magbabasa

Mga Ugangan ug mga Umagad Ang Pebrero 22, 1990, nga isyu bahin sa mga ugangan ug mga umagad giapresyar kaayo. Duha ka semana nga miagi miduaw ako sa akong mga ugangan sulod sa tibuok semana. Panahon sa akong pagduaw, gibutang ko sa akong hunahuna ang artikulo ug gipadapat kana sa matag situwasyon nga giatubang nako. Nalingaw ako, ug sa akong pagbiya, naggaksanay ug naghagkanay kaming tanan. Gipanan-aw ko ang dugang mga pagduaw uban nila, apan ibutang ko kining magasina sa duol kaayo nako engkasog gikinahanglan ko nga mapalig-on niini.

A. G., Tinipong Bansa

Mek-ap Ang inyong lindog “Mga Batan-on Nangutana . . .” makapalig-on. Apan sa inyong artikulo bahin sa mek-ap (Hunyo 22, 1990), gigamit ninyo ang teksto sa Bibliya sa Ezekiel 23:40, nga dayag nagatumong sa paggamit sa usa ka bigaon sa pintal sa mata. Dili ba ninyo gipakamatarong sa sayop nga paagi ang paggamit ug kosmetiks?

T. H. H., Netherlands

Kining tekstoha nagapamatuod lang sa pangangkon sa mga arkeologo nga ang mek-ap gigamit sa mga babayeng Israelinhon. Tinuod, kining bersikuloha naghisgot sa usa ka bigaon nga ‘naghinlo sa iyang kaugalingon, nagpintal sa iyang mga mata, ug nagdayandayan sa iyang kaugalingon sa mga dayandayan.’ Lagmit, hinunoa, kini nagapabanaag lang sa kamatuoran nga ang pila ka babayeng Israelinhon migamit ug kosmetiks.​—ED.

Panukiduki Diha sa Kahayopan Giabiabi namo ang kamatuoran nga ang mga Saksi ni Jehova nagkomento bahin sa ulohang panukiduki diha sa kahayopan (Pagmata! Hulyo 8, 1990). Gibati namo nga kinahanglang tul-iron ang pamulong: “Ang kiling sa tibuok kalibotan mao ang pagpaluyo sa mas agresibong mga kapunongan sa mga katungod sa kahayopan.” Ang mga radikal maoy minoriya ug nailhan lang tungod sa pagkobre sa prensa.

I. L., Federal Association for Animal Rights, Federal Republic of Germany

Kami miingon nga “ang pipila”​—dili tanan​—nga mga aktibista bahin sa mga katungod sa kahayopan “andam mogamit sa kabangisan.” Ang pamulong nga gilalisan gipahayag sa inilang Canadianong aktibista bahin sa kahayopan. Amo lang kadtong gitaho.​—ED.

Pagkagiyan sa Crack Ako nagiyan sa crack sulod sa lima ka tuig. Gisulayan ko sa daghang panahon ang pag-undang sa paggamit niining mangil-ad nga droga. Ako may $150- ngadto $200-ang-adlaw nga bisyo! Apan salamat kang Jehova nga Diyos, ako dili na giyanon sa crack! Pinaagi sa paghimog makugihong pagtuon sa Iyang Pulong, pag-ampo kanunay, ug pagpakig-uban sa matuod nga mga Kristohanon, akong nahimo ang crack nga butang sa kagahapon. Ang yawi sa pag-undang sa crack: Kinahanglang mohunong ka sa pagpakig-uban sa mga tawo nga nagagamit niining drogaha!​—Tan-awa ang Pagmata!, Hulyo 22, 1990.

[Mihangyo nga dili ibutang ang mga inisyal], Tinipong Bansa

Mas Sayon nga Pagpanganak Maylabot sa inyong balita bahin sa pagpanganak sa “Pagpaniid sa Kalibotan” (Disyembre 8, 1989), itugot nga akong isulti nga sa kabalangayan ug amihanang bahin nga kabungtoran sa Pakistan, ang batasan sa pagpanganak nga nagayaka gigamit sukad sa panahon sa karaan. Sa walay duhaduha sila walay maartihong mga silya sa pagpanganak, apan sila nagagamit sa silyang ginama sa tisa ug bato.

F. U. B., Pakistan

CAT Scans Salamat sa artikulong “Usa ka Kompiyutir nga Makakita Sulod Nimo.” (Hulyo 22, 1990) Ako naeskedyul alang sa usa ka CAT scan pila ka tuig nga miagi, apan gisaysay kadto kanako sa paagi nga nakapalisang nako, ug wala ako mosugot niadto. Ang artikulo nakatabang nako sa pagtulotimbang sa mga pabor ug mga kontra, ug karon ako nakigsabot na uban sa akong doktor.

A. S., Tinipong Bansa

Mga Jaguar Nagustohan ko pag-ayo ang inyong artikulong “Ang Maikyasong Iring sa Lasang.” (Agosto 22, 1990) Wala gayod ako makaamgo unsa ka katingalahan ang mga jaguar. Sila matahom nga mga hayop nga nagahatag gayod ug himaya sa Diyos.

L. F., Tinipong Bansa