Gikan sa Among mga Magbabasa
Ang “Pagmata!” Nagtungha sa Kolehiyo Usa ako ka propesor sa Ingles, ug ginagamit ko ang magasing Pagmata! sa akong mga kurso sa composition sa kolehiyo sulod sa pito ka tuig . . . Ang mga artikulo sa Pagmata! dili lamang makawiwili ug impormatibo apan may labing taas usab ug kalidad sa gramariya. Akong gigamit sila sa magkutlo ug tukmang paggamit sa mga panuldok, idiomatic expressions, mga pasumbingay, ug paglitok sa pulong.
J. D. G., Tinipong Bansa
Adunay bay Kinabuhi Gawas sa Yuta? Salamat kaninyo sa mabutyagong artikulo “Aduna bay Kinabuhi Gawas sa Yuta?” (Abril 8, 1990) Wala pa ako sukad makadawat ug usa ka makatagbawng tubag niining pangutanaha. Apan ang katuohang pangatarongan sa inyong artikulo, binase sa Bibliya, nakatabang kanako sa pagpabili sa katingalahang pribilehiyo nga atong nabatonan sa pagkinabuhi niining talagsaong planeta.
A. A. C., Brazil
Pagbaligyag Dugo Ang mga artikulo mahitungod sa “Ang Pagbaligyag Dugo Maoy Dakong Negosyo” (Oktubre 22, 1990) maoy linain nga interes alang kanako, sanglit gitanyagan akog dakog suweldo nga trabaho nga magkuhag dugo alang sa usa ka bangko sa dugo. Human nakabasa sa materyal, nakombinsir ako nga daotan kini. Bisag magamit unta nako ang kuwarta, akong gipalandong ang makadaot nga mga epekto sa dugo ug gibalibaran ang trabaho.
R. M., Tinipong Bansa
Nasayop sa Pag-ila Ang inyong Nobyembre 8, 1990, nga gula mahitungod sa mga UFO, inyong gihisgotan si “anhing Dr. James McCampbell.” Dayag nga ang inyong gipasabot mao si Dr. James McDonald, usa ka siyentipiko nga namatay niadtong 1971. Mahitungod kanako, bisan tuod kanunay akong maiwit, apan ang ubang mga magbabasa tingali malipay sa pagpamati nga ako dili pa “anhing” kon panapos ang hisgotan.
James M. McCampbell, Tinipong Bansa
Kon manghulam sa panultihon nga gikan ni Mark Tawin, mopatim-aw nga ang mga taho mahitungod sa kamatayon ni Gg. McCampbell gipasobrahan sa hilabihan. Pasayloa kami sa sayop.—ED.
Pagpilig mga Pelikula Ako maoy diyes anyos. Salamat sa inyong artikulo mahitungod sa “Mga Batan-on Nangutana . . . Sa Unsang Paagi Ako Makapilig Desenteng mga Pelikula?” (Agosto 8, 1990) Wala magdugay human nakabasa niana, natintal ako sa pagtan-aw ug dili maayong pelikula, apan nakahinumdom ako sa tambag nga inyong gihatag ug wala na motan-aw niana.
M. B., Tinipong Bansa
Sa pagkatinuod, may mga higayong migawas ako sa pagtan-aw sa pelikula. Sa ubang panahon, hinuon, nagpabilin ako nga angay unta akong mogawas. Nahadlok ako nga masuko ang akong gitawag nga mga higala nga ang akong angay nga kabalak-an unta mao man ang dili-pagpasuko sa Diyos. Akong nakita kining impormasyona nga mapuslanon kaayo. Salamat kaayo kaninyo sa dakong pagtagad may labot sa mga batan-on.
G. B., Tinipong Bansa
Pagkuha sa Tingga Nakurat kami nga nakabasa sa inyong artikulo “Usa ka Punog-Tingga nga Kalibotan?” (Agosto 8, 1990) nga ‘ang mahal lang kaayong reserve-osmosis filter’ epektibong maghanaw sa tingga nga nakasuhop ngadto sa tubig ilimnon gikan sa mga gripo sa balay. Kaylap kaayong giila nga adunay ubang mga paagi sa pagkuha sa tingga.
G. J., Tinipong Bansa
Pasayloa kami kon nakahatag kami ug sayop nga impresyon. Kami walay intensiyon sa pagsalikway sa kapiliang mga paagi sa pagkuha sa tingga, sama sa mga sistema sa distilasyon.—ED.
Daghan Kaayong Basura Usa sa akong higala nagpadala kanako ug gasang suskrisyon sa Pagmata!, ug akong nakita ang materyal nga mailin-ilinon ug makapaikag. Nakurat ako sa pagbasa sa mga artikulo mahitungod sa daghan kaayong basura (Septiyembre 22, 1990) tungod kay wala ko magdahom nga kining butanga seryoso kaayo! Bisag dili ako usa sa mga Saksi ni Jehova, nawili ako sa maayo kaayong mga topiko nga gipatik sa inyong mga magasin.
L. R. A., Brazil