AIDS ug Bakak nga Pagbati sa Kasegurohan
USA ka babaye nga nasusihang adunay virus sa AIDS misulat, sumala sa gikutlo sa The New York Times sa Hunyo 16, 1990: “Ako maoy usa ka 36-anyos ug malipayong minyo, puti nga babaye, nga wala gayoy sakit nga sipilis, gonorya o chlamydia, wala gayod mogamit ug crack, wala gayod makagamit ug droga nga ipaagi sa ugat, wala pa gayod nakapadugang ug dugo.”
Siya midugang: “Sanglit wala man gayod ako nakigsekso kang bisan kinsa gawas sa akong bana sukad nga ako nagminyo, kini nagkahulogang ako positibo sa labing menos lima ka tuig nga walay mga simtoma.” Talagsaon ba kining babayhana? Dili gayod, kay siya miingon: “Daghan akong nahibaloang mga babaye gikan sa akong mga grupo nga adunay sama kanako ug sosyo-ekonomikanhong kagikan nga adunay samang sugilanon.”
Nan, sa unsang paagi, nga kining mga tawhana natakdan sa AIDS? Ang babaye mipahayag: “Klaro, ako natakdan sa virus sa acquired immune deficiency syndrome tungod sa pakigsiping sa nagkalainlaing mga lalaki [sa wala pa naminyo]. . . . Sa tin-aw, ang maong lalaki karong panahona maklasipikar nga usa ka peligrosong seksuwal nga kaparis, apan wala ako mahibalo niadtong panahona.”
Ang AIDS kasagarang giklasipikar ingong usa ka sakit nga iya lamang sa mga lalaking homoseksuwal ug mga tiggamit ug mga droga nga ipaagi sa ugat. Apan pinasukad sa iyang kaugalingong eksperyensiya ug sa iya mismong nahibaloan, ang babaye miingon nga kining maong hunahuna “naghatag sa puti tunga-tungang-hut-ong sa katilingban ug usa ka bakak nga pagbati sa kasegurohan.”
Siya mihinapos: “Ang AIDS motungha sa dakong bahin sa populasyon kon kita kanunay nga magahunahuna lamang sa mga risgong grupo, sa paghunahuna nga ang uban matakdan niana, dili ako. Kitang tanan mahimong matakdan. Kon ako nakit-ang adunay [AIDS], ang tanang babaye (o lalaki) matakdan usab.”
Ang iyang giingon mao, sa laing pagkasulti, nga ang bisan kinsang babaye o lalaki nga makigsekso sa dili pa magminyo—kinsa makighilawas—matakdan. Unsa ka maalamon, diay, ang pagsunod sa sugo sa Bibliya: “Likayi ang pakighilawas. Ang tanang ubang sala nga pagabuhaton sa tawo anaa ra sa gawas sa iyang lawas, apan ang tawong makihilawason nagapakasala batok sa iyang kaugalingong lawas.”—1 Corinto 6:18.