Ang Konsilyo sa mga Iglesya sa Kalibotan—Kooperasyon o Kalibog?
Sinulat sa koresponsal sa Pagmata! sa Australia
ANG asembliya misugod sa Pebrero 7, 1991, sa nindot nga nataran sa Australian National University sa Canberra, Australia, ang kaulohan sa siyudad. Mitambong ang gibanabanang 4,000 ka membro ug mga 316 ka pangulo sa simbahan gikan sa kapig usa ka gatos ka nasod. Ang naunang unom ka asembliya sa WCC (World Council of Churches o Konsilyo sa mga Iglesya sa Kalibotan) gihimo sa lainlaing nasod latas sa mga 35 ka tuig, sugod sa 1948 sa Amsterdam, Netherlands.
Unsa ang WCC? Dili kini usa ka kinalabwan nga iglesya. Kini kahugpongan sa mga iglesya, usa ka katigoman aron magbayloayg mga hunahuna. Ang opisyal nga pakigpulong sa pag-abiabi alang niadtong ikapitong asembliya gipahayag sa primer ministro sa Australia, si Robert J. Hawke—bisan pag siya usa ka nag-angkong agnostiko. Ang temang gipili alang sa maong duha-ka-semanang asembliya maoy sa dagway sa usa ka pag-ampo: “Umari Balaang Espiritu—Bag-oha ang Tibuok Kalalangan!”
Bisan pa niana, ang wala-dahomang mga panghitabo sa kalibotan nagbalhin sa kinaiya ug mga gidahom sa mga delegado gikan sa pagbag-o pinaagi sa balaang espiritu ngadto sa politika ug moralidad sa gubat sa Persianhong Gulpo. Ang maong sayong pagbalhin gikan sa espirituwal nga panaghisgot nagpahinabo nga si Sir Paul Reeves, usa ka Anglikanong arsobispo ug kanhi gobernador-heneral sa New Zealand, mipahayag sa iyang katingala: “Kita makiling, diha sa mga asembliya nga sama niini, sa pag-away bahin sa gahom, nga walay kalabotan sa Balaang Espiritu.” Ang arsobispo sa Canberra misulay sa pagpakamatarong sa bili sa kawalay-panag-uyon. “Ang panaghiusa mao ang gasa sa Balaang Espiritu. Ang maayong kawalay-panagkauyon mao ang gasa sa samang Balaang Espiritu.”
Si David Gill, heneral nga sekretaryo sa Konsilyo sa mga Iglesya sa Australia, mipahayag usab ug kabalaka nga ang pagkamatinud-anon sa WCC nameligro mismo, nga mipahayag nga ang organisasyon sa mausbawon nahimong mapasakopon sa kawsahanong mga pundok nga nagapangitag higayon sa pagpahayag sa ilang linaing mga kabalaka.
Pag-ordinar sa mga Babaye—Labaw nga Kawalay-panaghiusa
Ang papel sa kababayen-an diha sa kontemporaryong simbahan naapil usab sa mga butang pagahisgotan, apan wala malipay ang mga babaye. Kadaghanan kanila nag-isip nga kana gigamhan sa lalaki. Si Lois Wilson sa Canada mapikalong nagsuma niana: “Ang politika sa WCC maoy hiwi kaayo ug sa akong hunahuna dili kini ang diha sa hunahuna ni Jesus.” Unsay nagpahinabo sa maong pagbati sa kapakyasan? Ang mantalaang Canberra Times miingon niini: “May daghan nga paghilak sulod sa kasilyas sa babaye kay ang mga babaye gihadlok sa pagpugong nila sa pagdawat sa nominasyon alang sa sentral komite sa konsilyo. Usa ka babaye giingnan nga siya iekskomunikar gikan sa iyang iglesya sa paninguha nga dili siya modawat sa nominasyon.”
Unsay Nahitabo sa Espirituwal nga Tema?
Ang pipila nabalaka nga wala ipasiugda nga igo sa asembliya ang Biblikanhon o teolohikanhong kinaiyahan sa buluhaton niini. Dili kini katingad-anan, kay ang kadaghanan sa dagkong mga butang gihisgotan sa tigom politikanhon ug kinaiya. Sa pagkamatuod, diha sa pinatik nga mga taho mahitungod sa asembliya, ang magbabasa nakakaplag ug usa ra ka mubong paghisgot sa Bibliya.
Ang relihiyosong magasing National Outlook miingon nga si David Gill “nagsumbalik-silaw sa hunahuna sa uban nga mitambong sa mga panagkatigom sa WCC sa nangagi nga dili pa dugay, ug si kinsa, sumala sa giingon sa usa ka tawo karong bag-o, miadto nga may dagkong mga paglaom apan mibiya nga wala matagbaw.”
Sa kasukwahi, sa diha nga ang gigutom ug giuhaw sa espirituwal nakaduol kang Kristo Jesus, sila wala mobiya nga wala matagbaw. Sila nanglakaw nga mibatig kahayahay: “Umari kamo kanako, kamong tanan nga nabudlayan ug nabug-atan, ug papahulayon ko kamo. Isangon ang akong yugo diha kaninyo ug makakat-on gikan kanako, kay ako malumo sa kinaiya ug mapaubsanon sa kasingkasing, ug kamo makakaplag ug kapahulayan sa inyong mga kalag. Kay ang akong yugo maayo ug ang akong lulan magaan.”—Mateo 11:28-30.