Mga Tigpatunhayg Pakigdait o Tigpasiugdag Gubat?
“ANG usa ka Kristohanon dili moapil sa mga buhat sa gubat.” Ang maong pahayag nagsumaryo sa panglantaw sa unang mga Kristohanon bahin sa gubat, nag-ingon si Thoko ug Malusi Mpulwana sa Echoes, usa ka magasing gipatik sa World Council of Churches (WCC). Niadto lamang “human nga ang Kristohanong Iglesya nakig-alyado sa politikanhong kagamhanan,” sila midugang, nga ang iglesya misugod sa pag-uyon “sa pagdawat sa panginahanglan sa gubat.” Ang resulta? Ang pagpaluyo sa Kakristiyanohan sa mga gubat sa tanang kapanahonan nahimong dayag kaayo nga human sa ikaduhang gubat sa kalibotan, ang United Church of Christ sa Hapon mibati pa gani sa panginahanglan sa pagpagula ug opisyal nga “Kompisal sa Pagkamay-Tulubagon sa Gubat sa Kalibotan II.”
Karong adlawa, mga 50 ka tuig human sa gubat, ang mabingkilong reputasyon sa Kakristiyanohan nausab ug diyutay. “Kon kita mangutana kon kita ba ingong mga Kristohanon miingon gayod ug usa ka lig-on ug makapakombinsir nga Dili sa argumento nga naghimong daw kinahanglanon o makataronganon ang gubat ug Oo sa gugma ni Kristo,” miadmitir si Dr. Roger Williamson, nga nagtrabaho alang sa Church of England, “tin-aw nga kita . . . daghan pa gihapong ikompisal.” Bisan pag ang WCC mideklarar niadtong 1948 nga “ang gubat ingong paagi sa paghusay sa mga kasungian dili magkauyon sa pagtulon-an ug panig-ingnan sa atong Ginoong Jesu-Kristo,” ang mga iglesya sa Kakristiyanohan, nag-ingon si Williamson, kasagarang nakaamot sa “pagkapig-ot ug hunahuna, pagkadili-matinugoton, pagpig-ot sa tawhanong kagawasan ug pagpasamot sa panagbangi.” Dili ikatingala nga siya mihinapos nga “ang relihiyon . . . sagad mipasamot imbes nga magtapos sa panagbangi.”
Ang gubat nga nagbahin sa kanhing Yugoslavia maoy usa ka haom nga panig-ingnan. Bisan pa sa mga inhustisya ug kabangisan nga nagakahitabo sa daghang katuigan, ang mga iglesya nalisdan gayod sa paghimog usa ka hiniusang baroganan bahin sa panagbangi nianang nasora. Ngano? Si Dr. Williamson nag-ingon nga bisan pa sa ilang gipakaingong Kristohanong bugkos, ang klero sa Serbia ug Croatia nagkabahinbahin sama ra sa mga politiko sa ilang mga nasod. Didto ug sa bisan asa ang klero sa Kakristiyanohan, Katoliko man, Ortodokso, o Protestante, naglihok dili ingong tigpatunhayg pakigdait kondili ingong “mga tsaplin nga mapihigong nagdapig sa ila mismong kiliran.” Bisan pag kapin na sa 300 ka iglesya karon ang sakop sa WCC, si Dr. Williamson miadmitir nga “malisod ang pagpangitag mga panig-ingnan sa mga iglesya nga aktuwal nga nagpatunhayg . . . pakigdait.”
Oo, malisod. Apan dili sama sa membrong mga iglesya sa WCC, nga naghisgotay lamang bahin sa panag-uliay, adunay naglungtad nga usa ka relihiyon nga nagmalamposon na sa pagpasig-uli sa kanhing mga membro sa nagkalainlaing mga relihiyon ug nagtabang kanila nga mahimong tinuod nga mga Kristohanon. Karong adlawa, kay gitukmod sa ilang gugma alang sa Diyos ug sa ilang kaikag sa ‘pagtinguha sa pagpakigdait sa tanang tawo,’ diha sa 233 ka nasod ang kapin sa 5.8 ka milyong Saksi ni Jehova midumili sa pagpakig-ambit sa mga gubat sa mga nasod—gisangka man sa mga dapit sama sa Amihanang Irlandia, Asia, Latin Amerika, Rwanda, Tungang Sidlakan, o sa kanhing Yugoslavia. (Hebreohanon 12:14; Mateo 22:36-38) Hinunoa, sila nagtuman sa tagna sa Bibliya pinaagi sa ‘pagsalsal sa ilang mga espada ngadto sa mga punta sa daro’ ug ‘dili na pagkat-on sa gubat.’—Miqueas 4:3.
[Mga hulagway sa panid 31]
Ang pipila sa mga Saksi ni Jehova sa Aprika gibun-og pag-ayo tungod sa ilang neyutralidad o nahimong mga kagiw