Literasiya Taliwala sa Katawhan sa Diyos

SA KARAANG mga panahon daghan kaayo ang makamaong mobasa ug mosulat taliwala sa katawhan sa Diyos. Mga 3,500 ka tuig kanhi, si Moises misulat sa unang lima ka basahon sa Bibliya. Ang iyang sumusunod, si Josue, gisugo sa pagbasa sa Kasulatan “sa adlaw ug sa gabii” aron magmalamposon sa tinudlong-buluhaton nga gihatag sa Diyos kaniya. Ug ang Diyos nagsugo nga ang Israelinhong mga hari, sa paglingkod sa trono, magsulat alang sa ilang kaugalingon ug usa ka kopya sa Kasugoan ug basahon kana kada adlaw.​—Josue 1:8; Deuteronomio 17:18, 19.

Ang pagbasa ug pagsulat dili lamang iya sa mga pangulo sa nasod. Bisan tuod daw mahulagwayon, ang sugo ngadto sa mga Israelinhon nga “isulat” ang mga kasugoan sa Diyos diha sa mga haligi sa pultahan sa ilang mga balay nagkahulogan nga ang katawhan makabasa ug makasulat. Si Amos maoy usa ka tigbuhig mga karnero, ug si Miqueas usa ka propeta gikan sa balangay sa baryo; bisan pa, ang duha nakasulat ug mga basahon sa Bibliya.​—Deuteronomio 6:8, 9; Amos 1:1; Miqueas 1:1.

Si Jesus nakagamit sa tanang dinasig nga linukot nga mga basahon sa Hebreohanong Kasulatan diha sa mga sinagoga, diin, sa usa ka higayon, iyang gibasa sa publiko ug gipadapat ang teksto sa iyang kaugalingon. Ang iyang mga apostol usab makabasa ug makasulat, nga mikutlo ug mihisgot sa Hebreohanong Kasulatan sa gatosan ka higayon diha sa ilang mga sinulat.​—Lucas 4:16-21; Buhat 17:11.

Ang Katawhan sa Diyos Karong Adlawa

Gisugo ni Jesus ang iyang mga sumusunod sa “paghimog mga tinun-an sa katawhan sa tanang kanasoran, . . . nga magatudlo kanila sa pagsunod sa tanang butang [nga iyang] gisugo.” Iyang gitagna usab nga ang “maayong balita sa gingharian igawali sa tibuok gipuy-ang yuta.”​—Mateo 24:14; 28:19, 20.

Sama sa mga Kristohanon sa unang siglo, gituman sa mga Saksi ni Jehova karong adlawa kini nga sugo pinaagi sa masibotong pagpanudlo ug pagwali sa binaba. Ilang gipakaylap usab ang maayong balita sa Gingharian pinaagi sa pinatik nga panid. Sukad niadtong 1920, ang mga Saksi ni Jehova nakagama ug nakaapod-apod ug kapin sa siyam ka bilyong mga Bibliya, libro, magasin, ug mga pulyeto sa kapin sa 200 ka pinulongan.

Minilyon sa tibuok kalibotan ang misanong nga mauyonon, nga nangahimong mga tinun-an ni Kristo. Taliwala kanila maoy mga lalaki ug mga babaye nga dili makabasa ug makasulat. Kining mga iliteret dili ubos nga mga Kristohanon​—daghan ang nag-alagad sa Diyos nga matinumanon sa daghang dekada, giantos ang relihiyosong paglutos, ug nakapakita sa ilang gugma kang Jehova pinaagi sa pagtuman sa iyang mga sugo.​—1 Juan 5:3.

Daghan kanila ang nangandoy nga makabasa ug makasulat, nakasabot nga ang pagkamaong mobasa ug mosulat mao ang yawi nga magbukas sa dalan ngadto sa mas bug-os nga pagpakigbahin sa ilang pagsimba sa Diyos. Diha sa mga tigom, gusto nilang sundan ang pagbasa sa Bibliya ug sa Kristohanong mga publikasyon, ug nagtinguha sila nga makabasa sa mga pulong sa mga awit aron sila makaduyog pag-awit uban sa ilang espirituwal nga mga igsoong lalaki ug babaye. Diha sa balay, nagtinguha sila sa paglig-on sa ilang kaugalingon ug sa ilang mga pamilya pinaagi sa pagtuon sa Bibliya. Diha sa ministeryo, nangandoy gayod sila sa pagtudlo sa uban sa kamatuoran sa Pulong sa Diyos nga dili magsalig sa uban sa pagbasa niana alang kanila.

Pagtuon sa Pagbasa

Misanong niini nga panginahanglan, ang mga Saksi ni Jehova mihimog kahikayan aron mapalambo ang pagbasa ug pagsulat pinaagi sa ilang mga kongregasyon ug sa tinagsa-tagsa. Sa tibuok-kalibotan, sila nakatudlo sa dili maihap nga mga lalaki ug mga babaye. Sa Nigeria lamang, ang mga Saksi ni Jehova nakatudlog kapin sa 23,000 sa pagbasa ug pagsulat. Usa niini mao si Effor. Siya miasoy:

“Ako nagsugod pagbasa ug pagsulat niadtong 1950 sa dihang nag-edad pa akog 16 anyos. Ang saring sa pagbasa ug pagsulat gidumala sa mga Saksi ni Jehova. Among gigamit ang basahon nga gipatik sa Watch Tower Society, ug kami gihatagan ug mga asaynment nga basahon sa balay.

“Gibati nako nga ang akong pagka-dili makabasa ug makasulat maoy sama sa usa ka sakit. Gusto nakong isaysay ang Bibliya ngadto sa akong mga igsoon ug mga higala, apan kay dili makabasa ug makasulat, dili nako kana mahimog maayo. Ang nagtukmod nako sa pagkat-on mao ang akong tinguha nga makasangyaw ug makatudlo sa uban aron mahimong mga tinun-an ni Kristo. Akong sulatan ang tanang butang nga akong makit-an nga masulatan, bisan ang dahon sa saging. Ang akong tinguha sa pagbasa ug pagsulat dako kaayo nga magdamgo ako nga nagabansay sa pagbasa ug pagsulat. Gihangyo ko ang uban sa pagtabang kanako; wala ko kana ikaulaw. Nahinumdom ako nga naghimog mga sulat sa mga higala ug ihatag ang mga sulat ngadto sa mga nagtungha aron pakorekan.

“Mikabat ug usa ka tuig nga ako nakakat-on sa pagbasa ug pagsulat sa klase sa kongregasyon. Human niana ako gitudlo sa pagtudlo sa klase. Kadto naghatag kanakog higayon sa pagtabang sa daghan pang uban.

“Kana nga tunghaan nakatabang gayod kanako ug dako nga sa daghang katuigan, ako nakapribilehiyo sa paghubad sa mga drama sa Sosyedad gikan sa Ingles ngadto sa Isoko, ang akong lumad nga pinulongan. Gawas pa niana, nakaalagad ako ingong usa ka magtatan-aw sa kongregasyon sukad sa katuigang 1960. Sa katuigang 1980, nag-alagad ako ingong kahulip nga nagapanawng magtatan-aw sa mga Saksi ni Jehova. Nakapribilehiyo usab ako sa pagdumala sa Tunghaan sa Payunir nga Pag-alagad [usa ka tunghaan sa bug-os-panahong mga ministro] ug kaduha nga nagtudlo sa Kingdom Ministry School [usa ka tunghaan alang sa Kristohanong mga ansiano]. Nasayod ako nga kon ako iliteret gihapon, kining tanang pribilehiyo dili nako unta mabatonan.

“Pagkadako sa akong apresasyon niining maong kahikayan sa pagtudlo sa mga mapainubsanon sa pagbasa ug pagsulat! Usahay inighigda nako magabii, nagapasalamat gihapon ako kang Jehova nga ako makabasa ug makasulat na niining modernong kalibotan.”

Ang atong Maglalalang, si Jehova nga Diyos, sa kamanggihatagon naghatag sa katawhan ug katakos aron makabasa ug makasulat. Apan kining maong mga kahanas dili mabatonan nga walay paningkamot. Ang kinadak-ang ganti sa pagkat-on sa pagbasa ug pagsulat mao ang pagpunit sa Pulong sa Diyos ug sa pagtuman sa balaang sugo: “Sa hinayng tingog basaha kana sa adlaw ug sa gabii.”​—Josue 1:8.

[Kahon sa panid 9]

Kon Unsaon sa Pagtabang sa Imong mga Anak nga Maugmad ang Gugma Alang sa Pagbasa

● Pagpakitag usa ka panig-ingnan pinaagi sa pagbasa mismo sa regular. Ang mga ginikanan nga mobasa posible nga makabaton ug mga anak nga mobasa.

● Pakigsulti sa imong bata sukad sa iyang pagkamasuso. Ang pagpasinati sa makahuloganong pinulongan magtabang sa mga bata sa pagsabot sa mga pulong ug mga ideya nga magpasayon sa pagkat-on sa pagbasa.

● Basahi sa regular ang inyong kabataan. Kon sabakon ug basahan, ang mga masuso makasabot sa mensahe nga ang mga pulong ug mga libro maayo, bisan pag sila bata pa kaayo sa pagsabot sa estorya nga gibasa. Padayon nga basahi ang inyong mga anak human nga sila makaantigo na sa pagbasa sa ilang kaugalingon. Ang mga magtutudlo sa tunghaan magtabang sa mga bata sa pagtuon kon unsaon sa pagbasa, apan ang mga ginikanan dako ug mahimo sa pagtabang kanila nga malingaw sa pagbasa. Ang mga bata malingaw sa pagpaminaw sa ilang paboritong mga estorya nga pabalikbalik.

● Magbaton ug mga libro nga magamit sa mga bata sa balay.

● Dasiga ang imong mga anak sa pagsulat. Ang bata nga mosulat kasagaran magbabasa usab.

● Pagpili ug tinong panahon adlaw-adlaw alang sa pagbasa sa pamilya. Magpulihay sa pagbasa, ug unya hisgotan ang materyal nga magkauban. Kining mga panahona kinahanglang makalingaw ug makapalig-on.

[Hulagway sa panid 8]

Ang mahinadlokon-sa-Diyos nga mga lalaki sa karaang kapanahonan mahibalong mobasa ug mosulat