Reinkarnasyon ba ang Yawi sa mga Misteryo sa Kinabuhi?

Nabuhi ka ba kanhi?

Mabuhi ka ba pag-usab diha sa usa ka dagway sa kinabuhi inigkamatay nimo?

Kining mga pangutanaha basin magpahinumdom kanimo sa doktrina sa reinkarnasyon.

ANG The New Encyclopædia Britannica nagbatbat sa “reinkarnasyon” sa mosunod nga paagi: “Usa ka pagtuo sa pagkatawo-pag-usab sa kalag sa usa o daghan pang sunodsunod nga mga kalungtaran, nga tingali tawhanon, hayopnon, o, sa pila ka kahimtang, talamnon.”

Ang reinkarnasyon dako nga bahin sa Sidlakanhong mga relihiyon, ilabina kadtong naggikan sa India, sama sa Budhismo, Hinduismo, Jainismo, ug Sikhismo. Pananglitan, taliwala sa mga Hindu sa India ang kinabuhi giisip nga mapinadayonong tuyok sa kamatayon ug pagkatawo-pag-usab.

Bisan pa, sa bag-o pang kapanahonan ang ideya sa reinkarnasyon nakadani sa daghan nga nagapuyo sa Kasadpang Hemispera, lakip ang ubay-ubayng batan-on. Sumala sa usa ka kolumnista nga nagsulat sa Sunday Star sa Canada, ang hinungdan sa maong dakong kaikag “mao ang sangpotanan sa epekto sa mga ideya sa Sidlakanhong mga relihiyon diha sa atong Kasadpanhong katilingban, nga nagsugod sa katuigang 1960.”

Ang laing hinungdan sa kaikag sa reinkarnasyon mao nga ang pila ka inilang tawo nagpahayag sa publiko ug sa seryoso nagpatuo nga sila nagkinabuhi sa usa o daghan pang mga kinabuhi kanhi. Lain pa, ang radyo, TV, mga magasin, ug ubang palaumagian sa balita nagpakitag kaikag sa reinkarnasyon, maingon man ang lainlaing propesyonal nga mga tawo sama sa mga doktor ug mga magtutudlo.

Kining tanan nakapukaw ug dakong kaikag. Busa, sumala sa pila ka surbi, duolag un-kuwarto sa mga tawo sa Canada ug sa Tinipong Bansa nangangkon ug diyutayng pagtuo sa reinkarnasyon.

Mga Pangangkon sa Kanhing-Kinabuhi nga mga Kasinatian

Ang artistang si Shirley MacLaine miangkon sa usa ka interbiyo uban ni Phyllis Battelle diha sa Ladies’ Home Journal nga nakahimo siyag ubay-ubayng “pagpanaw” balik sa agos sa panahon. “Akong mahinumdoman ang daghan sa akong nangaging mga kinabuhi​—may panahon nga ako lalaki, ubang panahon babaye,” miingon siya.

Sa librong Coming Back, si Dr. Raymond Moody nagbatbat sa mga eksperimento nga iyang gihimo taliwala sa iyang mga estudyante ug sa uban. Siya miingon nga pinaagi sa paghipno iya silang gidala balik sa panahong wala pa sila matawo, ug sila nangangkon nga sila may mga nahinumdoman gikan sa kanhing mga kinabuhi. Usa ka tawo miingon nga siya nabuhi ingong Eskimo diha sa Eskimong komunidad. Ang lain nagpatuo nga siya nabuhi sa ‘panahon sa bato,’ libolibong katuigan kanhi.

Si Dr. Moody mismo miangkon nga siya nagkinabuhi sa siyam ka kanhing kinabuhi. Kini sila nagkadaiya gikan sa kinabuhi sa tumoy sa kahoy ingong usa ka matang sa “una-kasaysayan nga bersiyon sa tawo” ngadto sa kinabuhi sa mga adlaw sa Romanhong Empiryo, sa panahong, siya miingon, siya giatake ug gilapa sa usa ka leyon sa usa ka dulaanan.

Ang paggamit sa paghipno aron dad-on ang mausisaong mga tawo balik sa gituohang panahon nga wala pa sila matawo gibatbat usab ingong makaayo sa uban. Ang mga doktor nakagamit niini sa pagtambal sa emosyonal nga mga sakit. Giangkon nga ang katingad-anang mga kahadlok nahanaw pinaagi sa pagsubay sa suliran balik sa usa ka hitabo sa usa ka kanhing kinabuhi. Unsa ka katuohan kining ideyaha?

Nag-ungaw-Kamatayong mga Kasinatian Giasoy

Ang nag-ungaw-kamatayong mga kasinatian nga giasoy sa pila ka tawo nakapabantog sa ideya sa reinkarnasyon. Sa librong Life After Life, si Dr. Moody mitaho sa iyang mga kaplag bahin sa nag-ungaw-kamatayong mga kasinatian gikan sa mga 50 ka tawo.

Bisan pag nagkadaiya ang ilang mga kasinatian, si Moody naghunahuna nga sila nahimong usa ka hularan. Kining mga tawhana may pagbati nga miagi latas sa taas, ngiob nga tunil. Sila mibati nga sila nabulag gikan sa ilang mga lawas, nga naglutawlutaw lamang. Nabatyagan nila nga sila misulbong pataas sa tunil padulong sa sanag kaayong kahayag, ug sa tumoy sa tunil, ilang nakita ang mga membro sa pamilya nga dugay nang nangamatay. Sa kataposan, sila nakamata diha sa kaugalingon nilang mga lawas. Hinuon, dili ang tanan nakasinati sa matag usa sa maong mga ang-ang.

Giangkon nga ang maong mga kasinatian may positibong epekto diha niadtong nakasinati niana. Kon mao, angay untang makatabang kini nga mawad-an sila sa ilang kahadlok sa kamatayon ug angay maghatag kanila ug pagsalig nga adunay kahulogan ang kinabuhi. Apan dili kana mao ang kahimtang kanunay. Daghan ang nagpadayon sa pagkahadlok sa kamatayon ug walay pagsalig sa pagkaadunay tinuod nga kahulogan sa kinabuhi.

Kadtong nagtuo sa reinkarnasyon nag-ingon nga sa maong mga kasinatian ilang nakaplagan ang pagpaluyo sa ideya nga ang tawhanong kalag matawo pag-usab diha sa lainlaing mga dagway sa kinabuhi. Apan katuohan ba gayod kining doktrinaha? Ang reinkarnasyon ba nagtagana gayod sa yawi sa mga misteryo sa kinabuhi? Makaplagan ba gayod nato ang tubag sa mga pangutanang, Nabuhi ka ba kanhi? Mabuhi ka ba pag-usab? Ang mga tawo ba nakabaton ug kalag nga mogawas sa lawas inigkamatay? Kining mga pangutanaha hisgotan sa mosunod nga mga artikulo.

[Blurb sa panid 4]

Ang reinkarnasyon maoy pasikaranan sa Sidlakanhong mga relihiyon

[Hulagway sa panid 4]

Ang Hindung ligid sa kinabuhi