Mga Katingad-anan sa Reinkarnasyon Gipatin-aw

USA sa mga pagsupak sa teoriya sa reinkarnasyon mao nga ang kinabag-ang tawo sa yuta dili gayod makahinumdom nga sila nagkinabuhi kanhi. Dugang pa, sila wala gani maghunahuna nga sila mahimong nagkinabuhi sa unang mga kinabuhi.

Tinuod nga usahay kita adunay katingad-anang pagbati nga nakaila sa usa ka tawo nga atong mahibalag sa unang panahon. Ang usa ka balay, lungsod, o maanindot nga dapit tingali sinati nato, bisan pag nasayod kita nga mao kadto ang unang panahong kita nakaadto didto. Hinuon, kining mga butanga ikapatin-aw bisan pag dili moliso sa teoriya sa reinkarnasyon.

Pananglitan, ang pila ka dapit sa magkalagyo kaayong mga luna basin pulupareho, mao nga kon moduaw kita sa usa ka bag-ong dapit, basin mobati kita nga kita nakaadto na didto kanhi, bisan pag wala kita makaadto. Daghang balay, mga opisina, mga tindahan, mga lungsod, ug maanindot nga mga dapit sa pila ka bahin sa kalibotan may pagkapareho sa ilang mga katumbas diha sa ubang mga dapit. Nga sila susama sa atong nakita kanhi dili pamatuod nga kita didto sa maong mga dapit sa nangaging kinabuhi. Sila pulupareho lamang sa mga dapit nga atong nasinati.

Kini matuod usab kon bahin sa mga tawo. Ang pipila kaamgid gayod sa uban sa panagway, nga aduna pay gitawag nga double o kamay-ong. Ang usa ka tawo tingali adunay mga panglihok nga magpahinumdom kanato sa laing tawo nga nagkinabuhi pa o bisan sa usang namatay na. Apan kita nakaila nianang mga tawhana niining kinabuhia karon, dili sa kanhing paglungtad. Ang kaamgiran sa panagway o personalidad wala magpasabot nga kining mga tawhana atong nailhan sa usa ka nangaging kinabuhi. Lagmit nga kitang tanan may naalaan nga tawo. Apan kanang duha ka tawo nagkinabuhi sa imo mismong panahon ug dili sa kanhing kinabuhi. Walay kalabotan ang reinkarnasyon niini.

Ang Impluwensiya sa Paghipno

Bisan ang mga kasinatian ubos sa impluwensiya sa paghipno ikapatin-aw bisan pag dili moliso sa teoriya sa reinkarnasyon. Ang atong nagapahipi nga panghunahuna maoy usa ka pondohanan ug impormasyon nga labi pang malukpanon kay sa ato tingaling gihunahuna. Ang impormasyon makaabot niining maong pondohanan pinaagi sa mga libro, mga magasin, TV, radyo, ug pinaagi sa ubang mga kasinatian ug pinaniiran.

Kadaghanan sa maong impormasyon gitipigan sa usa ka natagong suok sa atong nagapahipi nga panghunahuna tungod kay kita walay laktud o dihadihang gamit niana. Ang atong nagapahipi nga panghunahuna nahisama sa mga libro sa librarya nga dili kaayo pinangita sa pagkakaron ug busa gihiposan sa usa ka hilit nga estante.

Bisan pa niana, ubos sa paghipno, ang kaamgohan sa tawong gihipno giusab mao nga tingali mopaibabaw ang nahikalimtang mga panumdoman. Ang pila ka tawo naghubad sa maong nahikalimtang mga panumdoman ingon nga iya sa kanhing kinabuhi, apan sila mao lamay mga kasinatian sa presenteng kinabuhi nga temporaryo natong nahikalimtan.

Hinuon, adunay pila ka kaso nga tingali mas lisod nga ipatin-aw sa kinaiyanhong paagi. Ang usa ka pananglitan maoy sa dihang ang usa ka tawo mosugod sa pagsulti ug laing “pinulongan” ubos sa impluwensiya sa paghipno. Usahay ang pinulongan hisabtan, apan kasagaran dili. Kadtong mga tawo nga nagtuo sa reinkarnasyon tingali moingon nga kini maoy usa ka pinulongan nga gisulti sa tawo sa kanhing kinabuhi.

Bisan pa, ilado nga ang pagsulti sa gitawag nga mga dila mahitabo usab sa dihang ang mga tawo anaa sa kahimtang sa mistiko o relihiyosong pagkagipunawan. Ang maong mga tawo nga nagbaton nianang mga kasinatiana kombinsido nga kini walay labot sa usa ka kanhing kinabuhi apan sila ginaimpluwensiyahan sa usa ka dili-makitang gahom sa presenteng kinabuhi.

Nagkadaiya ang mga hunahuna kon unsa kining gahoma. Sa usa ka magkaubang deklarasyon sa Fountain Trust ug sa Church of England Evangelical Council, kini gipahayag mahitungod sa pagsultig mga dila: “Nahibalo usab kita nga ang susamang katingad-anan mahimong mahitabo ubos sa okulto/demonyohanong impluwensiya.” Busa ang pagtuo nga ang maong mga katingad-anan maoy pamatuod nga kita nagkinabuhi sa kanhing kinabuhi maoy paghimog dili-pa-panahong sayop nga paghukom.

Nag-ungaw-Kamatayong mga Kasinatian

Nan, unsa na man ang nag-ungaw-kamatayong mga kasinatian nga giingon sa mga tawo nga ilang nabatonan? Kini sila gibadbad sa pipila ingong pamatuod nga ang tawo adunay kalag nga magpadayong buhi inigkamatay sa lawas. Apan ang maong mga kasinatian ikapatin-aw pa nga mas maayo sa daghang kinaiyanhong mga paagi.

Sa Marso 1991 nga isyu sa Pranses siyentipikanhong magasin nga Science & Vie, ang lainlaing mga ang-ang sa nag-ungaw-kamatayong mga kasinatian gitawag ug “usa ka tibuok-kalibotang panig-ingnan sa panghanduraw” nga dugay nang nasayran. Ang susamang mga kasinatian dili lamang limitado niadtong anaa sa nag-ungaw-kamatayong mga kahimtang. Kini mahimo usab nga mahitabo maylabot sa “kakapoy, hilanat, mga atake sa patol, pag-abusar sa droga.”

Usa ka nagpailaila sa neurosiruhiya, si Wilder Penfield, kinsa nag-opera sa mga patolon nga gianestisyahan nga lokal, nakahimog makaiikag nga kaplag. Nadiskobrehan niya nga pinaagi sa pagpalihok sa lainlaing mga bahin sa utok pinaagi sa usa ka electrode, mapahinabo niya nga ang pasyente mobating anaa sa gawas sa iyang lawas mismo, nagapanaw agi sa usa ka tunil, ug nakahibalag sa patay nang mga paryente.

Usa ka makaiikag nga detalye niining bahina mao nga ang mga batang may nag-ungaw-kamatayong mga kasinatian nakahibalag, dili sa ilang patay nang mga paryente, kondili sa mga kauban sa tunghaan o sa mga magtutudlo​—kadtong mga buhi pa. Kini nagpaila nga ang maong mga kasinatian adunay tinong kultural nga kalangkitan. Ang nasinati nalangkit sa presenteng kinabuhi, dili sa butang nga luyo sa kamatayon.

Si Dr. Richard Blacher misulat diha sa magasing The Journal of the American Medical Association: “Ang pagkahimalatyon, o ang pag-antos sa peligrosong lawasnong situwasyon, maoy usa ka proseso; ang kamatayon maoy usa ka kahimtang.” Ingong pananglitan, si Blacher naghisgot sa usa ka tawo nga sa unang panahon nagalupad gikan sa Tinipong Bansa paingon sa Uropa. “Ang paglupad sakay sa usa ka ayroplano dili sama sa [pagkaatua sa] Uropa,” misulat siya. Ang turista nga molarga paingon sa Uropa, apan kansang ayroplano moliso ug mobalik pila ka minutos human sa paglarga, dili makatug-an sa mga tawo ug labaw pa mahitungod sa Uropa sama ra nga ang usa nga nahigmata gikan sa walay-panimuot nga kahimtang dili makatug-an mahitungod sa kamatayon.

Kadtong nag-ungaw sa kamatayon, sa laing mga pulong, wala pa gayod mamatay. Sila may butang nasinati samtang buhi pa sila. Ug ang usa ka tawo buhi gihapon bisan mga segundo una pa siya mamatay. Sila nag-ungaw sa kamatayon apan dili pa patay.

Bisan pa sila kansang kasingkasing mihunong sa makadiyut ug unya napabuhi dili gayod makahinumdom sa bisan unsa gikan niadtong mga gutlo sa pagkawalay-panimuot sa dihang mahimo silang tawgong “patay.” Ang ilang mahinumdoman, kon duna man, maoy kon unsay nahitabo sa panahong nagsingabot kanang kadiyut nga paghunong, dili nianang panahona.

Ang namantala nga nag-ungaw-kamatayong mga kasinatian sa halos kanunay gihulagway ingong positibo, bisan pag nahibaloan nga nahitabo usab ang negatibong mga kasinatian. Ang Pranses nga sikoanalistang si Catherine Lemaire nagpatin-aw niana niining paagiha: “Kadtong wala makasinati sa [pag-ungaw sa kamatayon] nga mohaom sa sumbanan nga gipahamtang sa IANDS [International Association for Near-Death Studies] walay interes sa pag-asoy sa ilang estorya.”

Walay Nahinumdoman

Ang kamatuoran mao nga kita walay kasinatian sa kinabuhi gawas nianang atong gikinabuhi karon, ni sa kanhing kinabuhi ni sa kinabuhing luyo sa kamatayon. Busa, kita walay tinuod nga mga nahinumdoman nga bisan unsa gawas sa kinabuhi nga ato gayong gikinabuhi.

Kadtong nagtuo sa reinkarnasyon nag-ingon nga ang kahulogan mismo sa pagkamatawo pag-usab mao ang pagbaton ug bag-ong higayon sa pagpauswag sa atong kahimtang. Kon kita tinuod nga nagkinabuhi sa naunang mga kinabuhi, apan nahikalimot niana, ang maong pagkawala sa memorya mahimong dakong kakulian. Maoy pinaagi sa paghinumdom sa atong mga sayop nga makabaton kitag kaayohan gikan kanila.

Lain pa, kadtong nagtuo sa giingong reinkarnasyon nga terapiya mibati nga sila mas makasagubang sa mga suliran karon kon, pinaagi sa paghipno, makahinumdom ka sa unang mga kinabuhi. Ang teoriya nag-ingon nga kita gipakatawo pag-usab aron mapauswag ang usa ka butang, apan atong nahikalimtan kon unsa kanang butanga.

Ang pagkadili-makahinumdom diha sa presenteng kinabuhi giisip nga usa ka kakulian. Kinahanglang kini maoy tinuod niining kasoha. Ang pagtutol sa pag-ingon nga way bale ang maong pagkalimtanon, sanglit ang maayong mga tawo lamang ang matawo pag-usab ingong mga tawo, dili maayong argumento niining panahona karon sa dihang ang tumang pagkadaotan maoy naglabi sa kahimtang sa kalibotan kay sukad masukad. Kon ang maayong mga tawo lamang ang matawo-pag-usab ingong mga tawo, diin ba gikan ang tanang tuman ka daotang tawo? Dili ba angay unta nga menos ug menos na lang ang tuman ka daotang mga tawo? Ang tinuod mao: Walay bisan kinsa, maayo o tuman ka daotan, ang sukad natawo pag-usab aron mosugod sa laing kinabuhi ingong usa ka tawo o bisan unsa pa.

Bisan pa, ikaw tingali moingon, ‘Dili ba ang reinkarnasyon usa ka pagtulon-an sa Bibliya?’ Hisgotan nato kining pangutanaha sa sunod nga artikulo.

[Blurb sa panid 6]

Ang atong nagapahipi nga panghunahuna nahisama sa librarya sa impormasyon nga gihiposan apan mahimong ipagawas sa ulahi

[Blurb sa panid 7]

“Ang kamatayon maoy usa ka kahimtang,” dili usa ka proseso.​—Dr. Richard Blacher diha sa The Journal of the American Medical Association