Ang Pulong sa Diyos Nagtudlo bag Reinkarnasyon?

SI BISAN kinsa nga nagasusi sa Bibliya nga naglaom nga makakitag suportar sa doktrina sa reinkarnasyon tino nga mahigawad. Bisan asa sa Bibliya dili ka makakaplag nga ang mga tawo nagkinabuhi sa kanhing mga kinabuhi. Dugang pa, dili ka makakaplag sa mga pamulong “reinkarnasyon” o “transmigrasyon sa kalag” o “dili-mamatay nga kalag” diha sa Bibliya.

Ugaling, ang pipila nga nagtuo sa reinkarnasyon maninguha sa pagpatin-aw niining kawalay Biblikanhong pagpaluyo sa pag-ingon nga ang ideya sa reinkarnasyon kasagaran kaayo sa karaang panahon nga ang bisan unsang katin-awan mahimong hingapin na. Tinuod, ang doktrina sa reinkarnasyon karaan na kaayo, apan bisan pag unsa ka karaan niini o pagkakasagaran kaha niini o dili man, ang pangutana nagpabilin gihapon, Ang Bibliya nagtudlo ba niini?

Sa 2 Timoteo 3:16, 17, si apostol Pablo misulat: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.” Oo, ang Bibliya maoy inspiradong Pulong sa Diyos, iyang komunikasyon nganha sa tawhanong banay. Ug sumala sa gisulat ni Pablo, kini makapasarang sa matinud-anong tigsusi nga mahimong “bug-os makasarang, kompleto nga masinangkapan” sa pagtubag sa tanang hinungdanong mga pangutana mahitungod sa kinabuhi, lakip ang mga pangutana bahin sa kagahapon, karon, ug umaabot.

Si Pablo miingon usab: “Sa nadawat ninyo ang pulong sa Diyos, nga inyong nadungog kanamo, inyong gidawat kini, dili ingong pulong sa mga tawo, kundili, ingon gayod sa kon unsa kini sa pagkamatuod, ingong ang pulong sa Diyos.” (1 Tesalonica 2:13) Sanglit ang Bibliya nasudlan sa mga hunahuna sa Diyos, dili kadtong iya sa dili-hingpit nga tawo, dili kita angay matingala sa pagkasayod nga ang Bibliya subsob nga malahi gikan sa mga hunahuna sa tawo bisan pag kini sila napopular latas sa katuigan. Apan tingali moingon ka, ‘Dili ba ang Bibliya, sa pila ka dapit, sa labing menos nagpasabot sa reinkarnasyon?’

Mga Tekstong Nasayop Pagsabot

Kadtong nagtuo sa reinkarnasyon nag-ingon nga ang Bibliya nagtumong sa ulohan diha sa Mateo 17:11-13, diin si Jesus naglanggikit kang Juan nga Tigbawtismo sa karaang propetang Elias. Kining tekstoha mabasa: ‘“Si Elias, sa pagkatinuod, moanhi ug ipasig-uli ang tanang butang. Hinunoa, ako magaingon kaninyo nga si Elias miabot na . . .’ Unya ang mga tinun-an nakasabot nga namulong siya kanila bahin kang Juan nga Bawtista.”

Sa pagsulti niini, gipasabot ba ni Jesus nga si Juan nga Tigbawtismo maoy reinkarnasyon sa propetang Elias? Si Juan mismo nasayod nga siya dili mao. Sa usa ka higayon sa gisukna siya, “Ikaw ba si Elias?” si Juan tin-awng mitubag: “Dili ako.” (Juan 1:21) Hinuon, gitagna nga si Juan mag-una sa Mesiyas “uban sa espiritu ug gahom ni Elias.” (Lucas 1:17; Malakias 4:5, 6) Sa laing mga pulong, si Juan nga Tigbawtismo mao si “Elias” sa diwa nga iyang gihimo ang usa ka buluhaton nga sama sa kang Elias.

Sa Juan 9:1, 2, atong mabasa: “Karon samtang siya [si Jesus] nagaagi siya nakakita ug usa ka tawo nga buta sukad sa pagkahimugso. Ug ang iyang mga tinun-an nangutana kaniya: ‘Rabbi, kinsa ang nakasala, kining tawhana o ang iyang mga ginikanan, mao nga natawo siya nga buta?’” Ang pipila nga nagtuo sa reinkarnasyon nagpasabot nga sanglit ang maong tawo natawo nga buta, ang iyang sala nahitabo gayod sa kanhing kinabuhi.

Apan bisan unsa man ang nagpatungha sa pangutana sa mga tinun-an, ang tubag nga gihatag ni Jesus kinahanglang maoy maghukom. Siya mipahayag: “Dili kining tawhana ang nakasala ni ang iyang mga ginikanan.” (Juan 9:3) Kini mosupak sa reinkarnasyon, nga nagpasabot nga ang mga depekto nagdepende sa mga sala gikan sa kanhing kinabuhi. Ang punto nga walay usa nga makasala una pa matawo gipahayag usab ni Pablo sa misulat siya mahitungod kang Esau ug Jacob nga “sila wala pa matawo ni magbuhat ug bisan unsang maayo o ngil-ad.”​—Roma 9:11.

Pagkabanhaw, Dili Reinkarnasyon

Bisan pag ang Bibliya wala magpaluyo sa doktrina sa reinkarnasyon, walay usa nga kinahanglang mahigawad. Ang mensahe sa Bibliya nagtanyag ug butang nga labi pang makapahupay kay sa ideya nga matawo pag-usab diha sa kalibotan nga puno sa sakit, kasub-anan, kaul-ol, ug kamatayon. Ug dili lamang makapahupay ang gitanyag sa Bibliya kondili kini ang kamatuoran, ang Pulong mismo sa Diyos.

Si Pablo mipahayag sa makapadasig nga doktrina niining paagiha: “Ako adunay paglaom ngadto sa Diyos . . . nga aduna unyay pagkabanhaw sa mga matarong ug sa mga dili-matarong.” Ang pulong “pagkabanhaw,” o usa ka dagway niini, makitag kapin sa 50 ka beses diha sa Kristohanon Gregong Kasulatan, ug si Pablo naghisgot niini ingong usa ka pangunang doktrina sa Kristohanong pagtuo.​—Buhat 24:15; Hebreohanon 6:1, 2.

Ang pagkabanhaw gikan sa mga patay nagkahulogan, nga dayag, nga ang kamatayon naglungtad. Bisan asa sa Bibliya dili ka makakaplag ug pagpasabot nga ang tawo adunay dili-mamatay nga kalag. Kon ang tawo adunay dili-mamatay nga kalag nga mobulag sa lawas inigkamatay ug moadto sa walay-kataposang dulnganan sa langit o sa impiyerno o matawo pag-usab, nan dili na kinahanglan ang pagkabanhaw. Sa laing bahin, mga usa ka gatos ka teksto sa Bibliya nagpakita nga ang tawhanong kalag maoy, dili kay dili-mamatay, kondili mamatay ug malaglag. Ang Bibliya sa kanunay naghisgot nga ang kamatayon mao ang kaatbang sa kinabuhi, nga mao, pagkawala-maglungtad ingong kaatbang sa paglungtad.

Ang kamatayon, o pagkawala-maglungtad, mao ang silot sa sala ni Adan ug Eva batok sa Diyos. Kadto maoy usa ka silot, dili usa ka ganghaan ngadto sa dili-mamatay nga kinabuhi sa laing dapit. Ang Diyos tin-awng nagpahayag nga sila mobalik sa dapit diin sila gikuha​—ang abog sa yuta: “Kay gikan niini gikuha ka. Kay abog ka ug sa abog ikaw mopauli.” (Genesis 3:19) Sila walay dili-mamatay nga kalag sa wala pa sila lalanga sa Diyos ug ibutang sa yuta, sa tanaman sa Eden, ug sila wala magbaton niana human sa ilang pagkamatay.

Ang pagkabanhaw gikan sa kamatayon gipakasama sa pagkagipukaw gikan sa pagkatulog, o pagpahulay. Pananglitan, si Jesus miingon mahitungod kang Lazaro nga iyang pagabanhawon: “Si Lazaro . . . mipahulay, apan ako mopanaw didto aron pukawon siya gikan sa pagkatulog.” (Juan 11:11) Mahitungod sa propetang Daniel, atong mabasa: “Ikaw mopahulay, apan ikaw motindog alang sa imong bahin sa kataposan sa mga adlaw.”​—Daniel 12:13.

Kinabuhing Dayon sa Yuta

Unsa ba unya ang sangpotan niadtong banhawon gikan sa kamatayon? Ang Bibliya naghisgot ug duha ka matang sa pagkabanhaw​—usa nga langitnon ug usa nga yutan-on. Ang yutan-ong pagkabanhaw mao ang mahimong bahin sa kinabag-an niadtong sukad nabuhi ug namatay. Diyutay ra kaayo ang adunay langitnong pagkabanhaw, aron magmando uban ni Kristo sa langitnong Gingharian sa Diyos. (Pinadayag 14:1-3; 20:4) Kanus-a ba magsugod ang yutan-ong pagkabanhaw? Kini magsugod human laglagon sa Diyos kining presenteng daotang sistema ug ang “usa ka bag-ong yuta,” usa ka matarong bag-ong tawhanong katilingban, nahimong usa ka katinuoran.​—2 Pedro 3:13; Proverbio 2:21, 22; Daniel 2:44.

Sa “bag-ong yuta,” wala na unyay sakit o pag-antos. Bisan ang kamatayon mawala na apan pagapulihan sa palaabotong kinabuhing dayon. “Pahiran [sa Diyos] ang matag luha sa ilang mga mata, ug wala na unyay kamatayon, ni may pagbangotan ni pagtiyabaw ni may kasakit pa. Ang kanhing mga butang miagi na.” (Pinadayag 21:4) Gawas pa, ang salmista mitagna: “Ang mga matarong mismo magapanunod sa yuta, ug sila magapuyo ibabaw niana sa walay kataposan.” (Salmo 37:29) Sa susama, si Jesus nagpahayag: “Malipayon ang mga malumog-buot, sanglit magapanunod sila sa yuta.”​—Mateo 5:5.

Itandi ang maong talagsaong mga panaad sa Diyos sa doktrina sa reinkarnasyon. Sumala nianang ideyaha, gituohan nga mobalik ka sa sunodsunod nga panahon aron magkinabuhi niining samang hiwi nga daotang sistema sa mga butang. Kana magpasabot nga padayon kang libotan sa pagkadaotan, pag-antos, sakit, ug pagkahimalatyon sa halos way-pagkatapos nga balikbalik nga panghitabo. Pagkawalay-paglaom sa maong panglantaw!

Busa, ang Bibliya nagtubag sa mga pangutana, Nabuhi ka ba kanhi? ug, Mabuhi ka ba pag-usab? niining paagiha: Wala, wala ka magkinabuhi sa bisan unsang kinabuhi gawas sa presenteng kinabuhi. Apan mahimo nga imong himoon ang imong kinabuhi nga malungtaron, sa pagkatinuod, walay-kataposang kinabuhi. Karong adlawa, niining “kataposang mga adlaw” niining presenteng sistema, makalaom ka nga maluwas sa kataposan niining kalibotana ug makasulod sa bag-ong kalibotan sa Diyos nga dili na mamatay. (2 Timoteo 3:1-5; Pinadayag 7:9-15) O kon ikaw mamatay una pa moabot ang bag-ong kalibotan sa Diyos, makalaom ka nga mabanhaw ngadto sa kinabuhing dayon sa usa ka paraisong yuta.​—Lucas 23:43.

Kon ikaw nagpakitag pagtuo kang Jesus, bisan pag unsay mahitabo tingali, ang mga pulong ni Jesus ngadto kang Marta sa dihang namatay ang iyang igsoong lalaki nga si Lazaro mapadapat usab kanimo: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi; ug ang matag usa nga buhi ug nagapasundayag ug pagtuo kanako dili gayod mamatay.”​—Juan 11:25, 26.

[Blurb sa panid 8]

Si Adan wala magbaton ug dili-mamatay nga kalag apan mipauli sa abog sa dihang siya namatay

[Hulagway sa panid 9]

Ang Pulong sa Diyos nagtudlo sa pagkabanhaw, dili sa reinkarnasyon