Gikan sa Among mga Magbabasa

Pagtungha Diha sa Balay Giapresyar ko ang inyong artikulong “Pagtungha Diha sa Balay—Kana ba Alang Kanimo?” (Abril 8, 1993) Ako gitudloan mismo sa balay, ug nangiwit ako sa akong buluhaton sa eskuylahan. Apan sa gibasa ko ang inyong artikulo, kini nagdasig kanako. Karon ako nakabalik na sa akong eskedyol.

N. S., Tinipong Bansa

Pagplano sa Pamilya Natugaw kaayo ako sa inyong pangunang mga artikulo sa Pebrero 22, 1993, “Pagplano sa Pamilya​—Tibuok Kalibotang Isyu.” Binuang ang pagsugyot nga ang responsableng mga Kristohanon kinahanglang maglimite sa gidak-on sa ilang pamilya. Unsay gibasehan sa inyong pagsugyot nga ang sugo sa Diyos sa Genesis [sa “pagpuno sa yuta”] dili aplikado sa mga Kristohanon?

A. D., Tinipong Bansa

Ang sugo sa Diyos kang Adan ug Eva sa “pagpuno sa yuta” gisubli ngadto kang Noe ug sa iyang pamilya. Apan, walay makita nga ang Bibliya nagpahamtang sa sugo sa pagpanganak diha sa mga Kristohanon. (Genesis 1:28; 9:1-5; Buhat 15:29) Ngani, gidayeg sa Bibliya ang mga Kristohanon nga magpabiling dili minyo “alang sa gingharian.” (Mateo 19:12; 1 Corinto 7:38) Busa ang tagsatagsa ka magtiayon ang kinahanglang mohimo sa ilang kaugalingong mga desisyon kon bahin sa pagpanganak ug sa pagpugong sa pagpanganak. Sanglit ang mga Kristohanon gisugo sa pag-atiman sa pisikal, emosyonal, ug espirituwal nga mga panginahanglan sa ilang mga anak, ang responsableng mga ginikanan mobati nga maalamon ang paglimite sa gidak-on sa ilang pamilya aron ang maong pag-atiman ikahatag. (1 Timoteo 5:8) Kini wala gayod magpakamenos sa kamatuoran nga ang kabataan “maoy panulondon gikan kang Jehova.” (Salmo 127:3)​—ED.

Alkoholismo Salamat kaninyo alang sa ekselenteng mga artikulo diha sa “Mga Batan-on Nangutana . . . ” sa mga isyu sa Enero 8 ug 22, 1993, nga mao, “Ang Pag-inom ba Tinuod nga Makapagiyan Kanako?” ug “Sa Unsang Paagi Makahunong Ako sa Pag-inom?” Ako 48 anyos ug [nagapaayo] sa pagkaalkoholiko. Ang malaglagong mga epekto bahin niining “sakit” sa lawas, hunahuna, ug espiritu makasubo gayod. Sa dihang naamgohan ko nga ako nagiyan na sa alkohol, gibati ko nga daw dili na gayod ako pasayloon ni Jehova. Apan miduol ako sa mga ansiano, ug gihatagan nila ako ug mahigugmaong tabang. Human nga ako nahulog pag-usab sa pag-inom, misulod ako sa programa sa pagtambal sa alkohol. Karon kon mosugmat ang gana sa pag-inom, ako mag-ampo ug mamalandong sa bag-ong kalibotan sa Diyos. Mobasa usab ako sa daghang artikulo sa Bantayanang Torre ug Pagmata! nga naghisgot sa alkoholismo o nianang nagaasoy sa makapadasig nga mga kasinatian sa kinabuhi. Salamat sa inyong pagkamasinabtanon sa mga problema nga ginaagoman sa katawhan ni Jehova ug sa paghatag kanamog maayong mga artikulo.

C. D., Tinipong Bansa

Mga Batan-on Nangutana . . . Akong kinasingkasing nga pasalamat alang sa artikulong “Angay Bang Moadto Ako sa Prom”? (Marso 8, 1993) Gipugos akog maayo sa pagtambong sa “akong” senyor prom. Apan human nga nakabasa niining hamiling artikulo, nawala ang tanan kong pagduhaduha. Dili na ako moadto, ug wala ko maghunahuna nga may mawala kanako.

J. L., Tinipong Bansa

Salamat kaayo kaninyo sa artikulong “Unsay Akong Mahimo Mahitungod sa Daghan Kaayong Homwork?” (Abril 8, 1993) Gipadapat ko dayon ang mga sugyot nga sulod niini, ug nakabaton gayod akog kaayohan gikan niini. Karon makadaginot na akog dugang panahon alang sa espirituwal nga mga butang. Daghang salamat!

M. M., Italya

Salamat kaayo kaninyo sa pagpatik sa artikulong “Sa Unsang Paagi Ako Makasagubang sa Napakyas nga Panagtratohay?” (Mayo 8, 1993) Giantos ko ang malisod kaayo nga panahon. Sagad morag wala na akoy higayon nga maminyo. Busa samtang gibasa ko kining magasina, wala akoy kusog sa pagpugong sa akong mga luha. Bisan pa, ang pagbasa niana mipabati kanako nga nasabtan ug gipabilhan. Kini sa bug-os nagpaamgo kanako nga si Jehova nahigugma kanato ug makasabot sa atong ginaagoman.

R. Z., Italya