Gikan sa Among mga Magbabasa
Paghikog Gibasa nako ang artikulong “Mga Batan-on Nangutana . . . Paghikog ba ang Sulbad?” (Abril 8, 1994) nga may kahadlok ug kabalaka. Ako 20 anyos na ug karon ako usa ka bug-os panahong ministro. Apan dili pa dugay, kanunay akong naghunahuna sa paghikog. Gitabangan ako ni Jehova ug siya nagpadayon sa paghawid sa akong kamot. Sa milabayng pila ka adlaw lamang, sa gisultihan ako sa usa sa akong suod nga mga higala nga siya mismo misulay sa paghikog, nangita akog praktikal nga mga tambag nga magtabang kaniya sa dili pagbiya sa paglaom. Gitubag niining artikuloha ang akong mga pag-ampo.
A. C., Italya
Sa miaging semana lamang ang mga hunahuna sa paghikog kusganon kaayo sa akong kasingkasing. Usa ka Kristohanong ansiano ug iyang asawa nahimong suod nga mga kasumbongan ug gitabangan akong makasagubang. Ang inyong daghang artikulo bahin sa depresyon nakaluwas sa akong kinabuhi.
D. J., Tinipong Bansa
Kinahanglang ipadayag ko ang akong kinasingkasing nga pasalamat kaninyo alang sa artikulo. Kini nakapukaw ug kusganong mga pagbati kanako nga wala pa mahimo sa nangaging mga artikulo nga akong nahinumdoman sukad. Abi god ninyo, sa miaging pila ka tuig nagtuo ako nga ang paghikog mao ang kapilian—usa ka lutsanan sa daw dili-maagwantang mga kahimtang. Bisan pa, uban sa tabang sa mga ginikanan ug mga higala, nakadangat ako sa pagkahibalo nga ako adunay labing maayong katarongan sa pagpabiling buhi—buot ni Jehova nga ako mabuhi.
M. V., Tinipong Bansa
Nakita nako kining artikuloha nga tugob ug maayong pagkasulat. Gibati ko nga usa kini ka bililhon kaayong gamit sa pagtabang kang bisan kinsa nga basin nagahunahuna sa paghikog. Natandog ako sa tanang mga pananglitan nga gilakip.
L. S., Tinipong Bansa
Tigsakayg-Libre nga Hippie Buot kong pasalamatan kamo alang sa artikulo bahin kang Richard Fleet, “Gikan sa Tigsakayg-Libre nga Hippie Ngadto sa Pagka-Misyonaryo sa Habatagang Amerika.” (Marso 22, 1994) Human sa among kasal ang akong pamanhonon ug ako nagplano sa pagbalhin ngadto sa Hungaria aron sa pagtabang sa buluhatong pagsangyaw didto. Hangtod karon mapanagan-on gihapon ako bahin sa bug-os nga kausaban sa paagi-sa-kinabuhi ug sa pagtuon ug bag-ong pinulongan. Ang artikulo klarong nagpakita nga ang hinungdanon dili ang personal nga mga kabalaka kondili ang mga tawo nga among pagasangyawan.
S. H., Alemanya
Nagtuo ako nga kinahanglang basahon kining artikuloha sa tanang mga tawo nga dili-minyo ug amgoha nga ikaw mahimong usa ka alagad ni Jehova ug mahimong malipayon nga walay kapikas. Makalingaw gayod basahon kon giunsa paggamit sa usa ka tawong dili-minyo ang Mateo 6:33 diha sa iyang kinabuhi. Sukad nga nagsugod ako pag-alagad ingong usa ka bug-os-panahong ebanghelisador sa miaging duha ug tunga ka tuig, nasinati ko ang samang kalipay nga gibati ni Richard Fleet.
D. M., Tinipong Bansa
Natandog kaayo ako sa pagkasayod nga adunay mga lalaki nga may kahangawa sa mga ilo nga batang lalaki. Usa ako ka inahan nga dili-minyo nga may upat ka anak nga lalaki. Gihatagag pagtagad sa usa ka Kristohanong igsoong lalaki ang usa kanila, ug karon ang maong anak nga lalaki nangandam na nga magpabawtismo sa dili madugay. Kon adunay mohatag ug kaikag sa mga bata nga walay amahan, kini ginaapresyar gayod.
P. T., Tinipong Bansa
Chile Mao pay akong pagbasa sa Mayo 8, 1994, nga isyu, ug naikag kaayo ako sa artikulong “Chile—Talagsaong Nasod, Talagsaong Kombensiyon.” Gibati ko nga daw nakatambong mismo sa kombensiyon. Namatikdan ko pa gani ang pagbati nga dili-makabiya sa dihang natapos na ang programa.
K. K., Hapon
Mga Compact Disc Salamat sa inyong artikulong “Ang Compact Disc—Unsa Kana?” (Abril 22, 1994) Nakapatin-aw kini sa misteryo diha sa akong hunahuna bahin niining mga disc. Human nakapamati sa compact disc system sa usa ka higala, nahibulong ako sa pagkanindot niini kay sa ubang mga sistema nga nagapatunghag musika.
S. D., Nigeria