Gikan sa Among mga Magbabasa
Kapeligrohan sa Pagmaneho Ang pagbasa sa ulohang “Gikapoy Samtang Nagamaneho?” (“Pagpaniid sa Kalibotan,” Pebrero 22, 1994) nagpabalik sa mga panumdoman sa dihang ako usa pa ka drayber sa lorry (trak) mga 20 ka tuig na kanhi. Ako paingon na sa pagpauli human sa tibuok adlaw nga pagmaneho sa dihang ako nakatulog samtang nagmaneho. Sa kalit, ang kusog nga pagkabangga nagpamata kanako, ug sa akong kalisang ako nagmaneho sa sayop nga kiliran sa dalan. Nabangga ko ang alsadong bahin sa daplin sa karsada, apan walay nakit-ang mga sakyanan o mga maglalakbay. Nakalingkawas ako sa multa, apan kadto usa ka leksiyon nga dili gayod nako makalimtan. Nakapatay na unta akog tawo tungod lang kay wala ako magpahulay sa dihang gikinahanglan ko kana. Ang akong tambag? Basaha kanang bahina sa Pagmata!, ug sunda ang tambag niana!
M. Y., Inglaterra
Sobrang Timbang Buot kong ipahayag ang linaing pagpasalamat alang sa “Mga Batan-on Nangutana . . .” nga artikulo sa Abril 22, 1994, “Nganong Tambok Kaayo Ako?” Ako 13 anyos ug kanunayng nag-isip sa akong kaugalingon nga tambok, bisag ang tsart sa timbangan nagpadayag nga ako kasarangan. Tungod sa akong tinamdan, nawad-an ako sa tanang pagsalig sa akong kaugalingon ug nag-antos sa depresyon. Kas-a gitinguha ko gani nga ako mamatay na. Kini mopadayag nga binuang, apan kana ang akong gibati. Salamat kang Jehova ug sa artikulo, madumala ko na ug maayo ang akong depresyon.
C. S., Alemanya
Batan-ong Pasyente sa Kanser Kay nakabasa sa dili pa dugay sa artikulong “Sa Dihang Dili Masayon ang Kinabuhi,” sumala sa giasoy ni Kathy Roberson, kinahanglan kong isulti nga ako natandog gayod. (Agosto 22, 1994) Angay kong mosulat ug ipadayag ang akong dulot nga apresasyon alang sa maong maanindot nga artikulo. Ako 14 anyos ug nakasinatig paglutos sa tunghaan tungod kay usa sa mga Saksi ni Jehova. Ang akong kahimtang dili ingon ka lisod kay sa kang Kathy Roberson, apan ang pagkasayod kon sa unsang paagi gipaluyohan siya ni Jehova sa tibuok niyang pag-antos maoy usa ka inspirasyon.
C. G., Tinipong Bansa
Pagkamaayong artikulo! Grabe usab ang akong pagkasakit sa edad nuybe ug sa ulahi migugol ug daghang bulan diha sa ospital. Bisan pa niana, ako naulian sa maayong panglawas sa panahon nga ako mitungha sa hayskul. Pagkalisod gayod alang kang Kathy Roberson nga atubangon ang pagtungha pag-usab sa iyang sakit nga balikbalik. Ang iyang tinamdan ug kalig-on nakatabang kanako nga batonan ang mas positibong panghunahuna.
D. V., Tinipong Bansa
Pagpasuso Ako manganak na sa among ikaduhang anak human sa tulo ka bulan. Busa sa dihang nadawat ko ang akong Agosto 22, 1994, nga isyu sa Pagmata! ug gibuksan ang artikulong “Mga Kinahanglanon sa Pagpasuso sa Inahan,” ako nalipay pag-ayo. Pagkamakapahayahay gayod nga basahon ang usa ka artikulo nga naghatag ug pasidungog ug pagdayeg sa Magmumugna sa kinabuhi. Dili ko hisabtan kon nganong adunay nagalimod nga may usa ka maalamon ug mahigugmaong Maglalalang sa dihang tagdon sa usa kon sa unsang paagi sa kasayon nasangkapan pag-ayo ang inahan sa pagpakaon sa iyang bata.
L. K., Tinipong Bansa
Segurado ako nga makadawat kamog daghang sulat sa pagpasalamat tungod niining artikuloha. Sa paghinumdom sa nangagi, nakita ko ang pagkadako sa panalangin ug pagkamaalamon nga kapilian ang pagpasuso sa tanang tulo namo ka anak. Ako nasayod nga kining artikuloha magdasig sa mga inahan ug sa mahimong mga inahan.
C. S., Tinipong Bansa
Epektibong Buhat-sa-Arte Ako nalipay sa nakita ko ang hulagway bahin sa pagkabanhaw sa Hunyo 8, 1994, nga isyu. Ang akong pagpabili sa kahibulongang paglaom sa pagkabanhaw napalig-on pa ug maayo. Sa pagkatinuod dili ikapahayag sa mga pulong ang akong kalipay sa dihang makita ko ang akong manghod nga babaye sa umaabot nga Paraiso.
M. U., Hapon
Gugma sa Salapi Salamat sa artikulong “Ang Gugma sa Salapi—Gamot sa Daghang Kadaotan.” (Marso 22, 1994) Sa akong nasod adunay daghang pagpanglungkab, pagpangawat, ug pagpanghasi sa publiko—ang tanan aron makasapi. Busa kining magasina tukma sa panahon ug haom, ug ako nalipay pag-ayo sa pagpahimutang niining isyuha sa uban. Ngani, ang pila ka tigbaligyag tinapay nag-ilog niini dihang kulang ang akong mga kopya!
A. F. S., Kasadpang Aprika