Siya Nakatandog ug Daghang Kinabuhi

SA NOBYEMBRE 19, 1994, si Kathy Roberson namatay sa edad nga 26. Siya matinumanong mitambong sa Kristohanong mga tigom hangtod mismo sa semana nga siya namatay. Ang iyang pagpakigbugno batok sa kanser sukad sa edad nuybe narekord sa Pagmata! sa Agosto 22, 1994, ubos sa ulohang “Sa Dihang Dili Masayon ang Kinabuhi.” Human mabasa ang artikulo, daghan sa tibuok kalibotan ang misanong pinaagig sulat ug nagsaysay kon sa unsang paagi ang maisogong panig-ingnan ni Kathy nakatandog gayod kanila.

Mga Batan-ong Nadasig sa Pag-alagad sa Diyos

Si Loida, sa Espanya, misulat: “Ako 16 anyos, ug ako mihilak sa dihang nagbasa ako sa eksperyensiya bahin sa pag-antos ni Kathy. Nahadlok ako niadto nga mamatay, apan tungod niini nga artikulo, nakasabot ako nga, sama sa iyang giingon, ‘ang labing hinungdanon mao, dili kon kita mabuhi o mamatay karon, kondili kon kita ba makabaton sa panalangin ni Jehova nga Diyos, ang Usa kinsa makahatag kanato ug kinabuhing dayon.’”

Si Mari, sa Hapon, misulat: “Tungod kay ako samag edad ni Kathy ug nabawtismohan sa samang adlaw, ang pagbasa sa iyang eksperyensiya daw samag nagbasa sa usa ka makapadasig nga sulat gikan sa usa ka suod nga higala. Ang iyang panghinaot nga ang iyang sugilanon makatukmod sa daghan sa paggamit sa ilang kahimsog, dili sa walay kapuslanang mga pangagpas, kondili sa maalamon sa pag-alagad kang Jehova nagpainit sa akong kasingkasing, sanglit ako hapit nang magsugod sa regular nga pagpayunir [bug-os-panahong ministeryo].”

Si Noemi, sa Italya, susamang misulat, nga nag-ingon nga ang panghinaot ni Kathy alang sa mga batan-on sa paggamit sa ilang kahimsog, dili sa walay kapuslanang mga pangagpas, kondili sa maalamon diha sa pag-alagad kang Jehova “maoy usa ka pagdasig alang sa libolibong mga batan-on, lakip kanako.” Si Noemi midugang: “Naghinamhinam ako nga makita siya sa bag-ong kalibotan sa dihang kining tanan molabay na. Inigkatapos ko gayod sa hayskul, magsugod dayon ako sa pagpayunir.”

“Ako 18 anyos,” misulat si Rachelle gikan sa Florida, T.B.A., “ug taudtaod na akong nagpalandong sa buluhatong pagpayunir. Samtang gibasa ko ang artikulong ‘Sa Dihang Dili Masayon ang Kinabuhi,’ nakaplagan ko kining usa ka dakong pagdasig nga makitang ang usa ka batan-on nga sama kanako nag-antos sa maong kalisod. Si Kathy nakatandog kanako sa paggamit sa akong kahimsog, sa dihang siya miingon, ‘dili sa walay kapuslanang mga pangagpas, kondili sa maalamon diha sa pag-alagad kang Jehova.’”

Ang pipila ka misyonaryo gikan sa pulo sa Chuuk, sa Micronesia, misulat: “Ang among mga payunir dinhi maoy kabos sa materyal. Bisan pa niana, ang eksperyensiya ni Sister Roberson nakatabang kanila sa pagpabili sa ilang nabatonan. Sila nakaamgo nga bisag kabos sa materyal sila gipanalanginan sa malig-ong mga panglawas nga magpaarang kanila sa pag-alagad kang Jehova sa bug-os-panahon. Kadto maoy usa ka maayong pahinumdom alang kanila nga magmapasalamaton sa nabatonan nila ug gamiton ang ilang kusog diha sa pag-alagad kang Jehova.”

Ang usa ka grupo sa 16 ka estudyante nga mitambong sa payunir nga tunghaan sa Pransiya natukmod sa pagpadalag usa ka letrato sa mga liryo ngadto kang Kathy uban ang pagdasig: “Dili namo kalimtan ang imong tambag sa paggamit sa among panahon alang sa atong dakong Maglalalang.”

Laing batan-on sa Pransiya misulat: “Sanglit batan-on ug pangunang mga target ni Satanas, kita usahay mobati nga malisod ang pagpabiling maunongon kang Jehova. Apan, kon makabasa kita ug ingon niini ka tahom ug makapatandog nga mga sugilanon, kita makadawat ug nabag-ong kusog ug kasibot, sa pagkasayod nga ang ubang mga batan-on, sama kang Kathy, naghupot sa ilang integridad bisan pa sa pag-antos. Pagkamaayong panig-ingnan!”

“Ako sama kanimog edad ug may piskay kaayong panglawas,” misulat si Nadine gikan sa Ohio, T.B.A. “Daghang higayon nga nagpadala ako sa gagmayng mga butang sa pagbabag sa akong pag-alagad kang Jehova. Ang pagbasa sa imong sugilanon nagtukmod kanako sa pagtan-awg maayo sa akong kinabuhi, nga nakaamgo kon unsa ka dako sa bililhong panahon ang akong nausik. Ikaw nahimong inspirasyon kanako.”

Usa ka dalagita sa Brazil miingon: “Siya nakatandog gayod sa akong kasingkasing ug nakadugang sa akong tinguha sa pag-alagad sa atong Diyos sa mas bug-os pa.”

Usa ka batan-ong taga-Canada misulat: “Ako 15 anyos. Sa milabayng duha ka tuig, akong nahibaloan nga ako may sakit nga autoimmune hepatitis. Tungod sa kasinatian ni Kathy Roberson, ako nakaamgo nga bisan pa sa akong kahimtang sa panglawas, ako usab makaalagad kang Jehova nga matinumanon samtang may panahon pa ug nga ako kinahanglang mapailobong maghulat sa saad sa Diyos nga bag-ong sistema alang sa bug-os nga pagkaayo.”

Si Jennette sa New Jersey, T.B.A., misulat: “Ang tanang kababagan nga iyang naagoman ug ang pagtuo nga gipakita niya motabang kanatong tanan nga magmadeterminado sa pagpadayon sa pagpaningkamot nga makabuhat ug mas labaw pa sa pag-alagad kang Jehova bisan pa sa mga kalisod nga atong ginaatubang. Ako nagplano sa paggamit sa iyang kasinatian uban sa pipila sa akong mga estudyante sa Bibliya sa pagdasig kanila sa paghimog mga tumong sa payunir nga pag-alagad iniggraduwar nila sa eskuylahan.”

Mga Edaran Nadasig Usab

Usa ka babaye sa California, T.B.A., misulat: “Tino nga imong gihiklin ang dili kaayo hinungdanong mga isyu sa atong mga kinabuhi ug nagpunting kon unsa gayod ang labing hinungdanon sa kinabuhi​—ang atong relasyon kang Jehova.” Siya midugang: “Bisag ako milapas na sa pagkabatan-on, ako natandog gayod ug natukmod sa imong mga kasinatian ug sa imong panglantaw. Kini nakatabang kanako sa pagsubli pag-usab sa mga butang nga angay nakong hatagan ug pangunang pagtagad.”

Laing sulat gikan sa California nag-ingon: “Ang imong naagoman maoy ingon ka dako sa paglutos nga naagian sa mga igsoong lalaki ug babaye sa Alemanya o sa Malawi o sa bisan haing dapit nga akong nabasa. Ako 68 na karon, busa ako nakakita, nakadungog, ug nakabasag daghang kasinatian. Ang imong sugilanon maoy usa ka panalangin alang sa mga batan-on ug ingon man usab sa mga tigulang.”

Usa ka babaye sa Habagatang Carolina, T.B.A., miadmiter: “Ako dili na bata. Ako hapit nang mag-70 anyos.” Siya misulat agig apresasyon: “Ikaw maoy laing Job. Ako nanghinaot nga sundogon sa tanang batan-on ug tigulang ang imong paglahutay.”

Laing sulat nag-ingon: “Ang pagtuo ug determinasyon ni Kathy nakatandog sa akong kasingkasing. Ako hapit nang mag-57 anyos, ug usa sa akong mga tumong mao ang paggugol ug dugang panahon sa pag-alagad kang Jehova sa dihang ako moretiro na, apan niining bag-o pa ako nahiling nga may kanser. Pagkadako sa akong pagbasol nga sa batan-on pa ako ug may mahimsog nga panglawas, ako wala mohimo ug labaw pa alang kang Jehova! Walay usa kanato ang makatag-an kon kanus-a kuhaon sa grabeng sakit kanang pribilehiyoa.”

Usa ka Kristohanong ansiano misulat: “Tagoon ko kining artikuloha diha sa espesyal nga payl aron akong mabasa sa dihang modangat ang wala damhang panghitabo nga magsulay sa akong pagtuo. Tagoon ko usab kining artikuloha diha sa akong payl alang sa buluhaton isip magbalantay aron magamit sa pagdasig sa minahal nga mga higala nga gimakmakan sa mga kalisod samtang nagakaduol na sa kataposan kining sistemaha.”

Sa pagkatinuod, kita napalig-on sa pagtuo ug kaisog sa tanang mga membro sa atong tibuok-kalibotang panag-igsoonay. (1 Pedro 5:9) Kitang tanan nagalantaw sa unahan, sama kang Kathy, sa katumanan sa saad sa Bibliya sa usa ka panahon sa dihang ‘ang kamatayon mawala na unya.’ (Pinadayag 21:​3, 4) Pagkamalipayong panahon na unya sa dihang “wala nay molupyo ang moingon: ‘May sakit ako.’”​—Isaias 33:24.

[Hulagway sa panid 20]

Si Kathy Roberson