Imong Sakyanan—Salipdanan o Tanggongan?
“Human sa halos matag katalagman,” nagpasidaan ang FEMA (U.S. Federal Emergency Management Agency), “ang motabang nga mga tem makakaplag ug mga biktima nga maluwas unta kon nahibalo pa sila kon kaha mopabilin o mogawas sa ilang mga sakyanan.” Oo, ang usa ka sayop nga desisyon mahimong mopatay kanimo. Nasayod ka ba kon unsay buhaton enkasog adunay katalagman? Tubaga ang mosunod nga pasulit, ug dayon itandi ang imong mga tubag niadtong gihatag sa ubos.
1. LINOG
□ Pabilin sa sakyanan
□ Gawas sa sakyanan
2. BUHAWI
□ Pabilin sa sakyanan
□ Gawas sa sakyanan
3. BUNOK SA NIYEBE
□ Pabilin sa sakyanan
□ Gawas sa sakyanan
4. BAHA
□ Pabilin sa sakyanan
□ Gawas sa sakyanan
MGA TUBAG:
1. Linog: PABILIN SA SAKYANAN.
Bisan pag ang sistema sa suspensiyon sa sakyanan makapauyog ug kusog niini, lagmit ikaw labing luwas sa sulod—basta wala ka mahiduol sa mga tinukod, mga karsada sa ibabaw, o mga alambre sa koryente.
2. Buhawi: GAWAS SA SAKYANAN.
Lagmit ang sulod sa sakyanan ang labing peligrosong dapit panahon sa buhawi. Apan unsa man kon walay luwas nga mga salipdanan sa duol? Ang FEMA nag-ingon: “Higda sa usa ka kanal o ubang lub-ang sa yuta nga walay naalsang bahin sa lawas uban sa imong mga bukton nga gipaibabaw sa imong ulo.”
3. Bunok sa niyebe: PABILIN SA SAKYANAN.
Gawas kon makakita kag luwas nga dangpanan nga dili kaayo layo, labing maayo nga magpaabot sa tabang. Ang makina mahimong paandaron sa mugbong mga yugto aron motaganag kainit, apan ablihag diyutay ang usa ka bentana aron dili mahilo sa carbon monoxide. Pasagding nagsiga ang usa ka suga sa sulod ingong usa ka senyal alang sa mga motabang.
4. Baha: GAWAS SA SAKYANAN.
“Kon ang usa ka sakyanan maaberiya sa tubig sa baha,” nagpasidaan ang FEMA, “gawas dayon ug adto sa habog nga dapit. Ang tubig sa baha basin nagpataas pa, ug ang sakyanan basin ianod sa bisan unsang gutlo.” Ayaw pagpamasin. Ang tubig mahimong mas lalom kay sa imong pagtan-aw, ug ang gitas-on sa tubig tulin nga motaas.
Ang FEMA nagtambag nga tagoan nimo kining impormasyona sa sudlanag guwantis sa imong sakyanan. Ug ginasugyot niini nga sa tanang kahimtang, “ang labing hinungdanong lagda mao: Ayaw katarantar.”