Gikan sa Among mga Magbabasa

Naluwas sa Pagmata! Pipila ka tuig kanhi (Mayo 8, 1984) ang Pagmata! misugyot nga ang matag pamilya maghisgot kon unsay buhaton enkasong may sunog ug adunay regular nga mga pagbansaybansay bahin sa sunog. Ang akong bana ug ako misunod niining tambaga. Sa Enero niining tuiga, nakahigayon kami sa pagbuhat sa among mga ginaplano sa dihang namat-an nako nga ang ubos nga andana sa among balay nagdilaab na pag-ayo. Matag usa kanamo mibuhat sa among gibansay ug nakagawas nga luwas. Pagkamapasalamaton gayod nako sa artikulo sa Pagmata!

G. E., Alemanya

Mga Saksi Lang ang Neyutral? Ang inyong Mayo 8, 1995, nga isyu (“Dili Na Kini Sekreto”) nag-ingon: “Ang mga Saksi ni Jehova lamang ang nakahupot sa ilang neyutralidad ug midumili sa pagkat-on o pagbansay pa sa gubat.” Sa Gubat sa Kalibotan II, sa 11,996 ka tawo nga midumili sa pagpakiggubat, 940 lamang ang mga Saksi ni Jehova. Ako mismo maoy usa ka matanlagong magsusupak. Ang pulong “lamang” sa inyong pahayag gigamit sa paghatag ug sayop nga ideya nga ang mga Saksi ni Jehova lamang ang naghupot niining pagtuoha.

P. B., Tinipong Bansa

Kami nakaamgo nga may pila ka indibiduwal nga midumili sa pag-apil sa gubat, ug amo kanang giila sa among mga publikasyon. (Tan-awa ang “Pagmata!” sa Septiyembre 8, 1987, panid 7.) Hinunoa, ang pahayag nga gihisgotan sa linain nagtumong sa kapakyasan sa “Katoliko ug Ortodoksong mga magtutuo” sa paghupot ug neyutralidad sa Rwanda, Liberia, Balkan nga kanasoran, ug ubang mga dapit nga bag-ong nag-awayay. Taliwala sa relihiyosong mga organisasyon, ang mga Saksi ni Jehova lamang ang padayong naghupot ug neyutral nga baroganan.​—ED.

Mga Seminar sa Ospital Daghang salamat sa artikulong “Mga Seminar sa Pagpalambo sa mga Relasyon sa mga Doktor ug mga Saksi ni Jehova.” (Marso 22, 1995) Ako mapasalamaton kaayo sa Hospital Liaison Committee. Ako 81 anyos, ug nabalian ako ug bat-ang ug abaga samtang wala sa balay. Ang lokal nga komite didto sa ospital 30 minutos sa wala pa ako moabot. Sanglit wala akoy pamilya sa maong dapit, usa sa mga igsoon ang nagpabilin uban kanako latas sa operasyon. Pagkamakapahupay! Ang kahikayan nga HLC tinuod nga usa ka panalangin gikan kang Jehova.

A. W., Tinipong Bansa

Mga Riyesgo sa Pag-jogging Ako usa ka regular nga magdadagan. Tungod sa inyong artikulo nga “Kalingawi ang Pag-jogging​—Apan Pagbantay sa mga Kapeligrohan!” (Marso 22, 1995), nakaseguro ako nga daghan sa akong kaubang mga Kristohanon maglantaw kanako nga dili timbang. Nahadlok usab ako nga daghan ang maglikay sa pagdagan tungod sa negatibong pagsabot nga inyong gipresentar. Ang mga magdadagan dili daling atakehon sa kasingkasing ingon sa inyong giangkon. Ug ang mga endorphin makaplagan sa utok dili sa mga nerbiyos sa kaunoran sa lawas sumala sa inyong giingon.

C. D., Tinipong Bansa

Dili namo tumong nga sawayon ang pagdagan. Among giila ang mga kaayohan sa ehersisyo apan nagdasig sa mga magbabasa nga magmabalanse ug dili hagoon ang ilang lawas saylo sa maarangan. Dugang panukiduki ang pagahimoon pa una mahibaloi kon unsa ka dakong kapeligrohan sa panglawas ang ipahinabo sa tag-as-ug-distansiya nga pagdagan alang sa pipila ka indibiduwal. Mahitungod sa mga endorphin, ang “The New Encyclopædia Britannica” nagpamatuod nga kini sila “giapod-apod diha sa kinaiyanhong gidaghanon sa tibuok sistema nerbiyos.” Bahin sa kapeligrohan sa mga atake sa kasingkasing, ang “The Medical Post” miangkon nga ang hago nga ehersisyo magpakunhod sa katibuk-ang kapeligrohan sa kalit nga paghunong sa kasingkasing; apan, kini nag-ingon nga adunay “napauswag nga kapeligrohan alang sa nag-ehersisyo sulod sa yugto nga sila aktuwal nga nag-ehersisyo.”​—ED.

Pagkolektag Prangkiyo Nagustoan nako ang artikulong “Pilatelia​—Makalingaw nga Pasatiempo ug Dakong Negosyo.” (Enero 8, 1995) Ako nakombinser nga ang Pagmata! dili magpakawalay-bili sa bisan unsang butang​—bisan gani sa mga prangkiyo. Nangolekta ako ug prangkiyo ingong pasatiempo ug mibati nga ang artikulo kompleto kaayo. Salamat sa inyong bililhong mga sugyot.

R. C., Venezuela