Kapintasan—Batok sa Kababayen-an
SINULAT SA KORESPONSAL SA PAGMATA! SA NIGERIA
GIKAN sa tagoangkan hangtod sa lubnganan, ang kababayen-an mabiktima sa kapintasan, sumala sa Human Development Report 1995 sa Hiniusang Kanasoran. Ang mga pagtuon gikan sa tibuok kalibotan nagpadayag sa mosunod:
Sa dili pa ipanganak. Sa pipila ka nasod himoon ang mga pagsusi aron matino kon ang bata sa tiyan lalaki ba o babaye. Ang mga babaye kasagarang itaktak.
Sa pagkabata. Sa Barbados, Canada, Netherlands, New Zealand, Norway, ug Tinipong Bansa, 1 ka babaye sa 3 nagtaho nga giabusahan sa sekso sa pagkabata o pagkadalagita. Sa Asia ug sa ubang dapit, mga usa ka milyong bata—kadaghanan mga babaye—mapugos nga mahimong pampam kada tuig. Milyonmilyong batang babaye sa tibuok kalibotan nag-antos sa paghiwa sa kinatawo.
Sa pagkahingkod. Sa Chile, Mexico, Papua New Guinea, ug Republika sa Korea, 2 sa matag 3 ka minyong mga babaye maoy mga biktima sa kapintasan sa panimalay. Sa Canada, New Zealand, Tinipong Bansa, ug United Kingdom, 1 ka babaye sa 6 ang lugoson.
Sa ulahing kinabuhi. Kapin sa katunga sa kababayen-ang gipatay sa Bangladesh, Brazil, Kenya, Papua New Guinea, ug Thailand gipatay sa nangagi o presenteng mga kaparis sa sekso. Sa Amerika del Sur, Aprika, ubay-ubayng mga isla sa Pasipiko, ug Tinipong Bansa, ang kapintasan sa panagtiayon maoy pangunang hinungdan sa paghikog sa babaye.
Ang kapintasan batok sa kababayen-an mahulagwayon sa gitawag sa Bibliya nga “ang kataposang mga adlaw,” diin daghan ang mahimong “mapasipalahon,” “dili-mabination,” ug “mabangis.” (2 Timoteo 3:1-5, New American Bible) Makapasalamat kita sa saad ni Jehova nga Diyos nga tapos niining gubot nga “kataposang mga adlaw,” iyang pagatukoron ang malinawong bag-ong kalibotan diin ang mga molupyo sa yuta “magapuyo gayod sa kasegurohan, nga walay usang magpakurog kanila.” (Ezequiel 34:28; 2 Pedro 3:13) Ilalom sa Gingharian sa Diyos, si Jesu-Kristo “magaluwas sa kabos nga nagatuaw alang sa tabang, sa sinakit usab ug si bisan kinsa nga walay magtatabang. Gikan sa pagdaogdaog ug gikan sa kapintasan iyang pagalukaton ang ilang kalag.”—Salmo 72:12, 14.