Usa ka Kinasingkasing nga Hangyo
ANG Pagmata! sa Mayo 8, 1996, naundan sa serye sa mga artikulo bahin sa ulohang pagsagop. Kami malipayong natingala nga nakita ang sanong sa magbabasa nga among nadawat gikan sa tibuok kalibotan. Ang mosunod nga sulat ilabinang makapatandog.
“Ako natukmod sa pagpunting nga daghan kanamo nga nagpasagop sa among mga anak sa pagkatinuod dili buot nga buhaton kana. Ako kanhi dili-minyong tin-edyer, nagtungha pa. Sa dihang nahibaloan sa akong mga ginikanan nga ako nagsabak, ila akong giingnan nga akong unahon ang kaayohan sa bata kay sa akoa ug ipasagop siya. Ako giingnan nga ‘ang usa ka bata nagkinahanglan sa inahan ug amahan,’ nga dili nako ikatagana. Buot sa akong mga ginikanan nga ipasagop ang bata—walay dapit sa ilang balay alang kanako kon dili nako ipasagop ang bata. Unsay akong mahimo? Sila nangatarongan: ‘Maglagot ka sa imong anak tungod sa paghikaw kanimo sa imong kagawasan.’
“Sa dihang naklaro na ang akong tiyan, ako gipaundang pagtungha ug gipapuyo sa usa ka paryente. Sa akong pagbiya sa balay, ako nahibalo nga dili ako pabalikon hangtod ako makapanganak ug napasagop na nako ang bata.
“Gipadala ako sa usa ka puy-anan alang sa dili-minyong mga inahan. Sa dihang ang sosyal worker nangutana kanako kon segurado ba ako sa akong desisyon nga ipasagop ang bata, ako nahibalo nga wala siya makaamgo nga wala akoy laing kapilian. DILI KO GUSTONG IPASAGOP ANG AKONG BATA! Ako kanunayng nangandoy nga makita siya nga nagkatawa ug malipayon. Ang inyong mga magbabasa kinahanglang masayod nga daghang tinuod nga mga inahan mibati sama sa akong gibati.
“Wala ako hatagi ug posibleng kapilian. Busa gibuhat nako ang gisulti kanako nga maoy ‘labing ikaayo’ sa bata. Ug ako nagkinabuhi uban ang dulot nga mental ug emosyonal nga kasakit sukad niadto. Ako nabalaka nga basin ang akong anak lalaki maghunahuna nga wala ako mahangawa ug nga gusto ko siyang ipasagop.
“Karon, ingong usa ka Kristohanon, kanunay nakong giapresyar ang tambag sa Bibliya bahin sa labi pang lisod nga mga kahimtang nga atong gipahinabo sa atong kaugalingon tungod sa dili pagpadapat sa Pulong sa Diyos diha sa atong mga kinabuhi. Gipakita niini ang masakit ug halayog-abot nga mga epekto sa kalibotanong pangatarongan. Apan ang mga sinagop kinahanglang masayod nga bisan gipasagop sila, wala kini magkahulogan nga wala sila kinahanglana. Palihog pahibaloa sila!”