Hunahunaa ang Risgo sa Paglalin!
SINULAT SA KORESPONSAL SA PAGMATA! SA HABAGATANG APRIKA
NAGHUNAHUNA ka bang molalin sa laing nasod? Nahunahuna na ba nimo ang mga risgo? Wala lamang namo gipasabot ang risgo sa pinansiyal. Kon buot sabton, kadaghanang tawo naghunahunang molalin aron makabaton ug kasegurohan sa ekonomiya. Among gipasabot ang wala mapadayag nga mga risgo nga madayag lamang human sa aktuwal nga paglalin. Nianang panahona kasagarang ulahi na kaayo ang pagpauli sa imong nasod nga natawhan. Dili maoy tumong sa mosunod nga mga punto nga mabalaka ka, apan kini takos nga konsiderahon:
“Ang pagkat-on ug bag-ong pinulongan nagkinahanglag pagpaubos ug paningkamot. Lisod alang sa usa ka hamtong ang pagkadiskobre nga bisan ang gagmayng mga bata maghunahuna nga siya katingad-an tungod kay sila dili makasabot kaniya. Ang pagsigeg kasayop samtang kanunayng kataw-an sa imong mga sayop maoy dakong pagsulay sa garbo sa daghan. Ang kinabuhi masulob-on kaayo alang sa mga langyaw nga dili makasulti sa lokal nga pinulongan.”—Rosemary, usa ka misyonaryo sa Hapon.
Tingali gibati nimo nga may igo kang nahibaloan sa pinulongan aron ikasugakod. Apan nakaseguro ka ba nga ang imong tibuok pamilya may igong kahibalo sa pinulongan aron malipay nga molalin?
Unsa unyay epekto diha sa pamilya kon ang pipila ka membro gihaylo sa paglalin nga supak sa ilang kabubut-on? “Ang pipila ka babaye [gikan sa Mexico],” matod sa magasin nga Psychology of Women Quarterly, “dili konsultahon sa paghimog desisyon nga molalin ug dili gayod buot nga molalin, ni buot nilang magpabilin sa Tinipong Bansa human molalin.” Ubos sa maong mga kahimtang, ang pinugos nga paglalin makadaot sa panaghiusa sa pamilya. Apan komosta na man kon ang bana lamang ang molalin?
Gibanabana diha sa basahong Population, Migration, and Urbanization in Africa nga sa usa ka gamay nga nasod sa banika sa habagatang Aprika, kapin sa 50 porsiyento sa “hamtong nga mga lalaki wala magpuyo sa balay sa usa ka panahon.” Kining pagkawala-diha-sa-balay maghikaw sa pamilya sa pagkakontento ug kalig-on. Maghatag usab kanag kahigayonan sa mga kapikas sa kaminyoon nga mahaylo sa imoralidad. Pagkalabi pang maayo alang sa pamilya, mohukom man kini sa paglalin o dili, nga magpabiling nahiusa! Ang panaghiusa sa pamilya maoy usa ka butang nga dili mabayran ug salapi.
Unya, anaa ang bug-at nga palas-anon sa pagsagubang sa pagpihig. “Sa paglalin pa nako sa Inglaterra nga akong nadiskobrehan ang rasismo,” nahinumdom ang usa ka Indian nga lalin. “Makalilisang kadto [nga kaamgohan]. Makapahiubos kaayo. Buot kong mopauli, aron makalikay nianang tanan.”—The Un-melting Pot.
Busa sa dili pa molalin, pangutan-a ang imong kaugalingon: ‘Unsa ang mga kapilian? Dili ba namo mahimo ang mga kausaban diha sa panimalay? Ang paglalin ba sa laing nasod takos gayod niana?’ Tingali takos o dili takos niana, apan sa dili ka pa mohukom, konsideraha kining maayong tambag gikan kang Jesus: “Kinsa kaninyo nga buot motukod ug tore nga dili una molingkod ug kuwentahon ang gasto, aron tan-awon kon siya aduna bay igo sa paghuman niini?”—Lucas 14:28.